ភ្នំពេញ៖ កម្ពុជាជាប្រទេសកសិកម្ម ដែលមានប្រជាពលរដ្ឋជាង១លានគ្រួសារប្រកបមុខរបរចិញ្ចឹមជីវិតជាអ្នកធ្វើស្រែ ចំការ ។ គោលបំណងរបស់អ្នកធ្វើស្រែគឺធ្វើយ៉ាងណាបានផលស្រូវច្រើន និងលក់ស្រូវបានតម្លៃខ្ពស់។ ដើម្បីសំរេចនូវគោលបំណងនេះមានកត្តានិងវិធានការណ៍ជាច្រើនដែលគេត្រូវយកចិត្តទុកដាក់ ក្នុងនោះគឺការជ្រើសរើសពូជសុទ្ធល្អជារឿងសំខាន់បំផុត ។រដូវច្រូតកាត់ស្រូវវស្សាបានចូលមកដល់ ក្រុមអ្នកជំនាញខាងកសិកម្ម អង្គការសេដាក បានផ្ញើសារទៅកាន់ប្រជាកសិករទាក់ទងនឹងការជ្រើសរើស និងទុកដាក់ពូជសុទ្ធល្អសំរាប់ការបង្កើនផលស្រូវ បន្ថែមនៅរដូវក្រោយបន្តទៀត។លោក យ៉ង សាំងកុមារ ប្រធានអង្គការសេដាក បានមានប្រសាសន៍ថា ដើម្បីបានពូជ ស្រូវល្អកសិករគួរអនុវត្តន៍វិធានការណ៍បច្ចេកទេសសំខាន់ៗដូចខាងក្រោមនេះ៖ ជ្រើសរើស កន្លែងណាដែលស្រូវលូតលាស់ល្អ (កន្លែងនៅឆ្ងាយពីភ្លឺបន្តិច) សំរាប់ច្រូតទុកធ្វើពូជរើសយក កួរមិនសុទ្ធល្អនិងកួរខ្លីចេញ ដោយសំរាំងទុកតែកួរដែលវែងហើយសុទ្ធល្អ។ យកល្អមែនទែន កួរស្រូវដែលរើសបានហើយ ត្រូវប្រឡះយកស្មែងខាងលើនិងស្មែងខាងក្រោមចេញ ដោយទុក តែស្មែងកណ្តាល។
លោកបន្តថា យកកួរស្រូវដែលរើសបានមកប្រឡះឬបែននឹងជើង ដើម្បីយកគ្រាប់ទុកជាពូជ ។ ជាងនេះទៅទៀតគួរធ្វើការប្រឡះដោយដៃ ហើយចៀសវាងការបោកដោយដៃ និងការបោកដោយម៉ាស៊ីន។យកគ្រាប់ពូជស្រូវហាលឱ្យស្ងួត ហើយរក្សាទុកឱ្យបានល្អ តែគួរឧស្សាហ៍យកវាចេញមកហាល ដើម្បីរក្សានូវភាពស្ងួតឱ្យបានល្អ”លោកបញ្ជាក់ថា តាមបទពិសោធន៍របស់សេដាកកន្លងមកគេត្រូវការមនុស្សតែ ២នាក់ ដើម្បីអាចរើសកួរស្រូវបានគ្រប់គ្រាន់សំរាប់ដី១ហិកតា (ស្រែស្ទូង) ដោយប្រើពេល១ថ្ងៃ។ បើគិតជាការចំណាយអស់ប្រហែលពី២ទៅ-៣ម៉ឺនរៀលតែប៉ុណ្ណោះ ប៉ុន្តែផលស្រូវកើនបានច្រើនរយគីឡូក្រាមក្នុង១ហិកតា ឬ រាប់សែនរៀល ពីការប្រើពូជសុទ្ធល្អ។អ្នកស្រី ភោគ ឡា កសិកររស់នៅភូមិព្រហ៊ូត ឃុំក្រាំងលៀវ ស្រុកបាទី ខេត្តតាកែវបានឲ្យដឹងថា ចាប់តាំងពីគាត់បានអនុវត្តន៍ការជ្រើសរើសនិងទុកដាក់ពូជនៅឆ្នាំ ២០០៨មក ផលស្រូវរបស់គាត់មានការកើនឡើងជាលំដាប់ពីមួយឆ្នាំទៅមួយឆ្នាំប្រហែល ២០ភាករយ បើប្រៀបធៀបទៅនឹងស្រែដែលមិនបានជ្រើសរើសពូជត្រឹមត្រូវ។ចំណែកកសិករ តុក លៀប រស់នៅភូមិត្រពាំងអង្គ ឃុំក្រាំងលៀវ ក៏បានឥឲ្យដឹងដែរថាៈ តាមរយៈការជ្រើសរើសពូជស្រូវចំនួនស្មែងស្រូវមានការកើនឡើង ពី១០ទៅ១៤ស្មែងក្នុងមួយកួរ ហើយចំនួនគ្រាប់ស្រូវបានកើនឡើងពី១៥០គ្រាប់ទៅ២២០គ្រាប់ក្នុងមួយស្មែង ធ្វើឱ្យទិន្នផលស្រូវកើនឡើងខ្ពស់ ហើយគាត់លក់បានថ្លៃ។ សូមបញ្ជាក់ថា មានពូជស្រូវសុទ្ធល្អជាការចាប់ផ្តើមដ៏សំខាន់ សំរាប់ទៅកាន់ភាពជោគជ័យក្នុងការធ្វើស្រែនៅរដូវក្រោយ។ ហើយសិករអ្នកផលិតស្រូវអនុវត្តបាននូវកិច្ចការខាងលើរៀងរាល់រដូវផលស្រូវនឹងកើនឡើងជាប់ជានិច្ច ហើយកសិករនឹងមានភាពជាម្ចាស់លើពូជស្រូវខ្លួនឯង៕
ដោយ៖ ស.ស្អាត