រដ្ឋមន្ដ្រីក្រសួងឧស្សាហកម្ម និងសិប្បកម្ម ចុះពិនិត្យនិងពង្រឹងការគ្រប់គ្រង សហគមន៍អ្នកផលិតអំបិល ខេត្ដកំពត និងខេត្ដកែប ដើម្បីស្វែងយល់ពីការគ្រប់គ្រង អ្នកផលិតអំបិល ពីព្រោះអំបិល គឺជាសារធាតុចាំបាច់ម្យ៉ាងដែលសរីរាង្គកាយត្រូវការជាចាំចាច់ ដើម្បីទ្រទ្រង់ជីវិត ។ ឯ/ឧទេសរដ្ឋមន្ដ្រី ចម ប្រសិទ្ធ រដ្ឋមន្ដ្រីក្រសួងឧស្សាហកម្ម និងសិប្បកម្ម បានអញ្ជើញចូលរួម ក្នុងកិច្ចប្រជុំពិនិត្យស្វែងយល់ ពីការគ្រប់គ្រង របស់សហគមន៍ អ្នកផលិតអំបិល ខេត្ដកំពត និងខេត្ដកែប នៅទីស្នាក់ការសហគមន៍ ស្ថិតនៅក្នុងស្រុកទឹកឈូ ខេត្ដកំពត ដើម្បីជំរុញការផលិតទិន្នផលឲ្យបានច្រើនសំរាប់តំរូវការ សន្តិសុខស្បៀង នាពេលអនាគត ។ ឯ/ឧទេសរដ្ឋមន្ដ្រី បានមានប្រសាសន៍ថា ការអនុវត្ដនូវគោលការណ៍ ផែនការវិលជុំច្បាស់លាស់ អាចសំរេចបាននូវលទ្ធិផល ក្នុងការផលិតអំបិត។ ការគោរពសិទ្ធិទៅវិញទៅមក ទើបសហគមន៍សម្រេចបានលទ្ធផលល្អៗ ជាពិសេសសម្រេចបាននូវការបញ្ចូលជាតិ អ៊ីយ៉ូដ ទៅក្នុងអំបិល ជាសកលបាន ១០០% តាមអនុក្រឹត្យលេខ៦៩ អនក្រ បក ចុះថ្ងៃទី២០ ខែតុលា ឆ្នាំ២០០៣ របស់រាជរដ្ឋាភិបាលកម្ពុជា។ឯ/ឧបានបញ្ជាក់ថា៖ ដើម្បីឆ្លើយតបចំពោះការយកចិត្ដទុកដាក់ ការផ្ដល់ទំនុកចិត្ដ និងការលើកទឹកចិត្ដពី ប្រមុខរាជរដ្ឋាភិបាល ដើម្បីបន្ដនិរន្ដរភាព ផលិតកម្មអំបិល ក្នុងសហគមន៍តកូនតចៅ និងធានាបានការផ្គត់ផ្គង់ ក្នុងស្រុកកាត់បន្ថយការនាំចូលអំបិល ពីខាងក្រៅ។ឯ/ឧទេសរដ្ឋមន្ត្រីបន្តបានផ្ដល់អនុសាសន៍ និងការដោះស្រាយជាក់ ស្ដែង មួយចំនួនដូចជា បង្កើតគណៈកម្មការអន្ដរក្រសួងឡើងវិញ ដើម្បីកំណត់ទីតាំង ដីស្រែអំបិល ពិតប្រាកដ ធ្វើប្លង់កម្មសិទ្ធិជូនសហគមន៍ និងដោះស្រាយដី ដែលជាន់សមត្ថកិច្ចគ្រប់គ្រង របស់ខ័ណ្ឌរដ្ឋបាល ជលផល។ រក្សានិងពិនិត្យលទ្ធភាពពង្រីកផ្ទៃដី ដោយទប់ស្ថាត់ការសុំប្ដូរប្រភេទដី ធ្វើអាជីវកម្ម ទៅមុខសញ្ញាផ្សេងៗ។ពិនិត្យលទ្ធភាពតាមផ្លូវច្បាប់ ដោយបង្វែរពីការបង់ពន្ធ ស៊ុយសារ៉ែអំបិល ទៅជាការចុះបញ្ជីសហគ្រាស ឬសិប្បកម្ម។ ធ្វើយ៉ាងណាឱ្យអ្នកផលិតអំបិលទាំងអស់ ចូលក្រោមឆ័ត្រសហគមន៍តែមួយ ។ រិៈរកវិធី និងបច្ចេកទេសថ្មីៗ ដើម្បីបង្កើនគុណភាពផលិតភាព សោភ័ណភាព សុវត្ថិភាពនិងអនាម័យជាពិសេសអំបិល ដែលត្រូវយកមកបរិភោគ ត្រូវរក្សាឱ្យមានជាតិអ៊ីយ៉ូដ ១០០% ជានិច្ច ។ ឯ/ឧទេសរដ្ឋមន្ដ្រី ចម ប្រសិទ្ធ និងសមាជិកអង្គប្រជុំទាំងអស់ បានអញ្ជើញចុះពិនិត្យជាក់ស្ដែង ពីដំណើរការផលិតកម្មអំបិល នៅលើវាលស្រែអំបិល ដ៏ធំល្វឹងល្វើយ ដោយជាដំបូង ចុះទស្សនកិច្ចក្រុមហ៊ុន Asia Saltដែលជាក្រុមហ៊ុន ផលិតអំបិល មកពីប្រទេសកូរ៉េខាងត្បូង ផលិតតាមបច្ចេកទេសទំនើប ដោយប្រើជាតិប្លាស្ទីកពណ៌ខ្មៅ សម្រាប់ទ្រាប់កំណកអំបិល និងអនុវត្ដផែនការវិលជុំ ច្បាស់លាស់ ធ្វើឱ្យផលិតផលអំបិល ចេញមក មានលក្ខណៈសស្អាត មិនជាប់ដី និងអនាម័យ ។
លោក ប៊ុន បារាំង សហប្រធានសហគមន៍ អ្នកផលិតអំបិល ខេត្ដកំពត និងខេត្ដកែប បានបញ្ជាក់ថា មកដល់បច្ចុប្បន្ននេះ ផ្ទៃដីផលិតអំបិល មានរហូតដល់ ៤.៥៨៨,៦៨ ហិកតា មានសមាជិកកើនឡើង ចំនួន ១៩៧ ក្រុមសាមគ្គី។ លោកបានបញ្ជាក់ផងដែរថា ផលិតកម្មអំបិល មានការប្រែប្រួល ជារៀងរាល់ឆ្នាំ ទៅតាមអាកាសធាតុ និងបានលើកឡើងនូវភាពប្រឈមនានាផងដែរ៕
ដោយ៖ អភិរក្ស