ភ្នំពេញៈ សម្តេចតេជោ ហ៊ុន សែន នាយករដ្ឋមន្រ្តី កម្ពុជា អមដោយមន្រ្តីជាន់ខ្ពស់ នៃរាជរដ្ឋាភិបាលកម្ពុជាជា ច្រើនរូប នៅព្រឹកថ្ងៃព្រហស្បតិ៍ ទី១៤ ខែកុម្ភៈ ឆ្នាំ២០១៣នេះ បានអញ្ជើញសម្ពោធដាក់ឲ្យដំណើរការអគារពុទ្ធិក សាកលវិទ្យាល័យព្រះសីហមុនីរាជា ស្ថិតននៅវត្តស្វាយពពែ ក្នុងសង្កាត់ទន្លេបាសាក់ ខណ្ឌចំការមន។
នៅក្នុងពីសម្ពោធនោះ ក៏មានការនិមន្តចូលរួមដោយព្រះសង្ឃរាជាធិបតី បួរ គ្រី និងព្រះសង្ឃសាមណនិស្សិត ជាច្រើនអង្គ ហើយក៏មានការអញ្ជើញចូលរួមអបអរសាទរពី តាជី យាយជី សិស្សានុសិស្ស យុវជនកាយឬទ្ធិ កាកបាទក្រហម និង ប្រជាពលរដ្ឋជាច្រើននាក់ផ្សេងទៀត។
សម្តេចព្រះអភិសិរី សុគន្ធា មហាសង្ឃរាជាធិបតី បួរ គ្រី សម្តេចព្រះមហាសង្ឃរាជ នៃគណៈធម្មយុត្តិកនិកាយ និង ជាព្រះសាកលវិទ្យាធិការ បានមានព្រះសង្ឃដីកាថា អគារពុទ្ធិកសាកលវិទ្យាល័យមួយខ្នងនេះ ត្រូវបានបញ្ចុះបឋមសិលា សាងសង់នៅខែធ្នូ ឆ្នាំ២០០៩ ហើយត្រូវដាក់សម្ពោធឲ្យប្រើប្រាស់នៅថ្ងៃព្រសហ្បតិ៍នេះ។
សម្តេចសង្ឃ បួរ គ្រី បានមានសង្ឃដីកាបន្តថា អគារពុទ្ធិកសាកលវិទ្យាល័យ ដែលបម្រើដល់ការសិក្សាវិស័យ ពុទ្ធចក្រនេះ បានចំណាយថវិកាសាងសង់ជិត ៥០ម៉ឺនដុល្លារ ដែល១៥ភាគរយ ជាថវិកាផ្ទាល់របស់ព្រះអង្គ និង ៨៥ភាគរយទៀត ជាមហាសទ្ធារបស់សម្តេចតេជោ ហ៊ុន សែន និងលោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន។
អគារមួយខ្នងនេះ មានកម្ពស់៤ជាន់ បន្ទប់សិក្សាចំនួន ២០បន្ទប់ បន្ទប់ការិយាល័យចំនួន២ បន្ទប់អនាម័យចំនួន ២០ និងសាលប្រជុំមួយ៕
ដកស្រង់ចេញពីគេហទំព័រដើមអំពិល