ភ្នំពេញ៖ តំណាងកសិករនៅទូទាំងប្រទេសប្រមាណ ២០០នាក់ ដែលតំណាងអោយសមាគមកសិករចំនួនជាង ១០០០សមាគម ស្ថិតនៅក្នុង៦០ស្រុក នឹងជួបប្រជុំគ្នាក្នុងកម្មវិធីសមាជមួយ ចាប់ពីថ្ងៃទី ២៥ ដល់២៦ ខែមីនា ឆ្នាំ ២០១៤នេះ នីមជ្ឈមណ្ឌលសហប្រតិបត្តិការកម្ពុជា ជប៉ុន (CJCC) ក្នុងទីក្រុងភ្នំពេញ។យោងតាមសេចក្តីប្រកាសព័ត៌មានដែលបានចេញផ្សាយកាលពីព្រឹកថ្ងៃអង្គារនេះបានឲ្យដឹងថា គោលបំណងសំខាន់ នៃអង្គសមាជ គឺ ដើម្បីធ្វើការបូកសរុបការងារប្រចាំឆ្នាំផ្តោតសំខាន់លើ ការងារសហគមន៍សន្សំប្រាក់ដើម្បីភាពអាស្រ័យលើខ្លួនឯង សហគមន៍ម៉ាស៊ីនកិនស្រូវ ការផលិតនិងទីផ្សារផលិតផលកសិកម្ម ពិសេសស្រូវសរីរាង្គនិបន្លែសរីរាង្គ ការងារឡជីវឧស្ម័ន និងការដាំដើមឈើ ជាដើម។ល។ លើសពីនេះទៀត អង្គសមាជក៏នឹងពិភាក្សាធ្វើផែនការយុទ្ធសាស្រ្តកម្មវិធីសេដ្ឋីស្រុកស្រែឆ្នាំ ២០២២ (ស២២) ដែលអនុវត្តដោយអង្គការសេដាក និងធ្វើការបោះឆ្នោតជ្រើសរើសតំណាងកសិករថ្នាក់ជាតិ និងតំណាងស្រ្តីថ្នាក់ជាតិផងដែរ។
ប្រធានអង្គការសេដាក លោកបណ្ឌិត យ៉ង សាំងកុមារ មានប្រសាសន៍ថា “ការរៀបចំអោយមានសហគមន៍និង បណ្តាញសមាគមកសិករដែលសហការជាមួយអង្គការសេដាក មានសារៈសំខាន់ណាស់ ពីព្រោះតាមរយៈរចនា សម្ព័ន្ធនេះ កសិករអាចបន្តនូវនិរន្តរភាពការងារអភិវឌ្ឍន៍ដោយខ្លួនឯង និងចូលរួមចំណែកពង្រីកសកម្មភាអភិវឌ្ឍន៍ កសិករផ្សេងទៀតយ៉ាងទូលំទូលាយ”។ លោក អ៊ួន សុផល ប្រធានបណ្តាញកសិករនិងធម្មជាតិ មានប្រសាសន៍ថា “បណ្តាញកសិករដើរតួនាទីសំខាន់ក្នុង ការជួយគាំទ្រដល់ការផលិត ផលិតផលកសិកម្មរបស់កសិករ ព្រមទាំងពង្រីកទំនាក់ទំនងរវាងកសិករនិងអជ្ញាធរ មូលដ្ឋាន (ឃុំ ស្រុក) ក្នុងការជួយដោះស្រាយនិងទទួលយកនូវរាល់សំណូមពររបស់កសិករ”។
ដោយ៖ អភិរក្ស