ក្រុង តូក្យូៈ រដ្ឋមន្ត្រីការពារជាតិជប៉ុន បាននិយាយពីថ្ងៃពុធថា ប្រទេសជប៉ុនកំពុងស្ថិតក្នុងការប្រុងជើងការណ៍ពេញលេញនៅមុនការ បាញ់មីស៊ីលចម្ងាយមធ្យមរបស់កូរ៉េខាងជើងខណៈដែលកូរ៉េខាងត្បូងនិង អាមេរិកបង្កើនការប្រុងប្រយ័ត្នឃ្លាំមើលខាងយោធាទៅកាន់«ការគំរាម កំហែងដ៏ សំខាន់»។
រដ្ឋមន្ត្រីការពារជាតិលោក Itsunori Onodera បានប្រាប់អ្នកកាសែតថា៖ «យើងស្ថិតក្នុងការប្រុងប្រយ័ត្នពេញលេញ ចាប់តាំងពីយើងបានពង្រាយកងឯកភាពយោធាជាច្រើន ហើយធ្វើដូច្នោះយើងនឹងរក្សាបាននូវការតាមដានឃ្លាំមើល»។
នាយករដ្ឋមន្ត្រី ស៊ីនហ្សូ អាបេ បាននិយាយដោយឡែកថា៖«យើងកំពុងធ្វើការប្រឹងប្រែងអស់ពីសមត្ថភាព ដើម្បីការពារជីវិតពលរដ្ឋយើង និងធានាដល់សុវត្ថិភាពរបស់ពួកគេ»។
កម្លាំងកូរ៉េខាងត្បូង និងអាមេរិកបានបង្កើតការប្រុងជើងការខ្ពស់ចំពោះ«ការគំរាមកំហែង ដល់ជីវិត»ពីថ្ងៃពុធមុនពេលកូរ៉េខាងជើងត្រូវគេរំពឹងថានឹងធ្វើ តេស្តមីស៊ីលខណៈភាពតានតឹងកើនឡើង៥ថ្ងៃសម្រាប់ខួបដ៏សំខាន់មួយ។
ដោយស្រង់សម្ដីមន្ត្រីយោធាជាន់ខ្ពស់ម្នាក់ទីភ្នាក់ងារព័ត៌មាន យ៉ុនហាប់របស់កូរ៉េខាងត្បូង បាននិយាយថា ទីបញ្ជាការកម្លាំងចម្រុះ កូរ៉េខាងត្បូង-អាមេរិកបានដំឡើងឋានៈឃ្លាំមើល«Watchcon»របស់ខ្លួន ពី៣ទៅ២ដើម្បីឆ្លុះបញ្ចាំងពីការគំរាមកំហែងដល់អាយុជីវិត។
ឋានៈឃ្លាំមើល Watchcon 4 ចូលជាធរមានក្នុងពេលសន្តិភាពធម្មតា ខណៈឋានៈឃ្លាំមើល Watchcon 3 គឺឆ្លុះបញ្ចាំងពីការគំរាមដ៏សំខាន់ ហើយឋានៈឃ្លាំមើល Watchcon 1 ត្រូវប្រើក្នុងពេលសង្គ្រាមតែម្តង។
ក្នុងរបាយការណ៍ដោយឡែកមួយ ទីភ្នាក់ងារយ៉ុនហាប់បានស្រង់ប្រភពរដ្ឋាភិបាលមួយដូចបាននិយាយថា ក្រុងព្យុងយ៉ាងអាចកំពុងរៀបចំការបាញ់ពហុមីស៊ីល បន្ទាប់ពីរថយន្តប្រព័ន្ធបាញ់ជាច្រើនទៀតត្រូវបានគេរាយការណ៍ថា កំពុងដឹកមីស៊ីល SCUD ចម្ងាយខ្លីជាងនិងមីស៊ីល Radong។
ជប៉ុនដែលកម្លាំងប្រដាប់អាវុធខ្លួនត្រូវបានអនុញ្ញាតឲ្យបាញ់ រាល់ មីស៊ីលរបស់កូរ៉េខាងជើងឆ្ពោះមក ទឹកដីខ្លួនកាលពីថ្ងៃអង្គារបានពង្រាយមីស៊ីល Patriot ជាច្រើនគ្រឿងនៅក្រុងតូក្យូ ដើម្បីការពារប្រជាជន៣០លាននាក់របស់ខ្លួនដែលរស់នៅទីនោះ។
មេបញ្ជាការយោធាកំពូលអាមេរិកមួយរូប កាលពីថ្ងៃអង្គារថា លោកគាំទ្រការបាញ់ទម្លាក់មីស៊ីល កូរ៉េខាងជើងតែបើសិនវាគំរាមកំហែងអាមេរិក ឬសម្ព័ន្ធមិត្តនៅក្នុងតំបន់។
បន្ថែមពីលើប្រព័ន្ធមីស៊ីល PAC 3 នាវាពិឃាត Aegis ដែលបំពាក់ដោយមីស៊ីលស្ទាក់ចាប់ដែលមានមូលដ្ឋាននៅសមុទ្រ ក៏ត្រូវបានពង្រាយនៅក្នុងសមុទ្រជប៉ុនផងដែរ។
កាលពីសប្តាហ៍មុនកូរ៉េខាងជើងប្រាប់អ្នកការទូតបរទេសនៅក្រុង ព្យុងយ៉ាងថាពួកគេមានពេលរហូតដល់ថ្ងៃទី១០មេសា ដើម្បីពិចារណាជម្លៀសចេញដោយបង្កពាក្យចចាមអារ៉ាមនៃការបាញ់មីស៊ីល រវាងថ្ងៃពុធ និងការអបអរខួបកំណើត លោក គីម អ៊ីលស៊ុងថ្ងៃទី១៥ ខែមេសា។
ជាថ្មីម្តងទៀត កាលពីថ្ងៃអង្គារ កូរ៉េខាងជើង បានព្រមានថា ឧបទ្វីបបានឈានទៅរកសង្គ្រាមនុយក្លេអ៊ែរក្តៅគគុក និងណែនាំឲ្យជនបរទេសនៅកូរ៉េខាងត្បូងពិចារណាក្នុងការជម្លៀស ខ្លួនចេញ។
រដ្ឋមន្ត្រីការបរទេសកូរ៉េខាងត្បូងលោកយ៉ុន ប្យុងសេ បានប្រាប់សភាថា ការបាញ់មីស៊ីលនោះអាចកើតមាននៅពេលណាមួយនិងបានព្រមានក្រុង ព្យុងយ៉ាងថា គេនឹងប្រឈមនឹងទណ្ឌកម្មជុំថ្មីពីអ.ស.ប.។
ចារកម្មកូរ៉េខាងត្បូងនិយាយថា កូរ៉េខាងជើងបានរៀបចំមីស៊ីលចម្ងាយឆ្ងាយពីរគ្រឿងសម្រាប់ការបាញ់ នៅពេលឆាប់ៗខាងមុខពីឆ្នេរសមុទ្រខាងកើតរបស់ខ្លួន ថ្វី បើមានការព្រមានពីសម្ព័ន្ធមិត្តចិនឲ្យចៀសទង្វើបង្កហេតុចំពេល មានភាពតានតឹងខ្ពស់៕
រដ្ឋមន្ត្រីការពារជាតិជប៉ុន លោក Itsunori Onodera ចុះត្រួតពិនិត្យប្រព័ន្ធមីស៊ីល Pac-3 ដែលបានពង្រាយក្នុងក្រុងតូក្យូ កាលពីថ្ងៃទី១០ មេសា ២០១៣។ AFP
ប្រភព៖Phnom Penh Post