ភ្នំពេញ៖ កម្ពុជាកាន់ជោគជ័យលើផែនការលុបបំបាត់ជំងឺគ្រុនចាញ់ឲ្យអស់នៅឆ្នាំ២០២៥ និងលុបបំបាត់អ្នកស្លាប់ឲ្យអស់ត្រឹមឆ្នាំ២០១៥។ អ្នកស្លាប់ដោយជំងឺគ្រុនចាញ់នៅឆ្នាំ២០១៣ ក្នុងប្រទេសកម្ពុជា មានចំនួន១២នាក់ ដែលករណីនេះ ត្រូវគេឃើញកាន់តែធ្លាក់ចុះថែមទៀត បើប្រៀបធៀបទៅនឹងឆ្នាំកន្លងទៅ។ សេចក្តីរាយការណ៍ពីក្រសួងសុខាភិបាលបានបញ្ជាក់ថា កាលពីឆ្នាំ២០១២ ចំនួនមនុស្សដែលស្លាប់ដោយសារជម្ងឺគ្រុនចាញ់ មានចំនួនដល់ទៅ៤៦នាក់ឯណោះ។
ប៉ុន្តែបើទោះជាយ៉ាងណាក៍ដោយ គេក៏នៅមានបញ្ហាប្រឈមមួយ ចំនួនផងដែរ ដូចជាចលនាចល័តរបស់ប្រជាជន ឬចំណាកស្រុកពីតំបន់មិនប្រឈមគ្រុនចាញ់ចូលទៅកាន់តំបន់គ្រុនចាញ់ ដែលងាយនឹងឆ្លងជំងឺគ្រុនចាញ់ ពូជធារមេរោគគ្រុនចាញ់ ប្រភេទហ្វាស់ស៊ីហ្វារ៉ូម មួយចំនួននៅកម្ពុជាមានលក្ខណៈសម្បត្តិអាចបង្កើតភាពស៊ាំនឹងឳសថព្យាបាល និងខ្សែស្រឡាយ ពូជធារប្រជាជនមួយចំនួន នៅកម្ពុជា គឺមានគ្រាប់ឈាមក្រហម ខ្វះសារធាតុ G6PD - Deficiency ដែលបណ្ដាលឲ្យមានហានីភ័យខ្ពស់ក្នុងការរងផលរំខានធ្ងន់ធ្ងរ បើគេប្រើឳសថព្យាបាលគ្រុនចាញ់ប្រ ភេទ ព្រីម៉ាកគីន Primaquine ដែលជាឳសថតែមួយគត់ ដែលអាចព្យាបាលផ្ដាច់សម្លាប់មេរោគគ្រុនចាញ់ ប្រភេទ វីវ៉ាក់ ដែលអាចពួនសំងំក្នុងថ្លើមមនុស្សច្រើនឆ្នាំបាន។
ផលវិបាកនៃជំងឺគ្រុនចាញ់អាចបណ្តាលអោយមានគ្រោះថ្នាក់ដល់ជីវិតបាន ជាពិសេសភាពមិនទៀងទាត់នៃការ ប្រែប្រួលអាកាសធាតុក្នុងតំបន់ត្រូពិចនៃប្រទេសអាហ្វ្រិក ។ មជ្ឈមណ្ឌលគ្រប់គ្រងនិងបង្ការជំងឺ (CDC)បានធ្វើស្ថិតិថា ៩០ភាគរយនៃអ្នកស្លាប់ដោយសារជំងឺគ្រុនចាញ់កើតឡើងនៅក្នុងប្រទេស អាហ្វ្រិក ដែលភាគច្រើនគឺជាកុមារអាយុក្រោម ៥ឆ្នាំ។ ភាគច្រើននៃករណី អ្នកស្លាប់ដោយសារជំងឺគ្រុនចាញ់គឺមានជាប់ទាក់ទងនឹងផលវិបាកធ្ងន់ធ្ងរមួយឬច្រើនដូចខាងក្រោម៖
-
គ្រុនចាញ់ក្នុងខួរក្បាល៖ ប្រសិនបើគ្រាប់ឈាមក្រហមដែលផ្ទុកទៅដោយប៉ារ៉ាសិតទៅស្ទះក្នុង សរសៃ ឈាមតូចៗរបស់ខួរក្បាល ការហើមខួរក្បាល ឬខូចខួរក្បាលប្រហែលជាអាចកើតមាន ។
-
ពិបាកដកដង្ហើម៖ ការចាលជាត់ទឹកនៅក្នុងសួតរបស់អ្នក(ហើមសួត) អាចធ្វើអោយពិបាកក្នុងការដក ដង្ហើម។
-
ខ្សោយសិរីរាង្គ៖ ជំងឺគ្រុនចាញ់អាចធ្វើអោយតម្រងនោម ឬថ្លើមរបស់អ្នកខ្សោយ ឬបែកអណ្តើក។ បញ្ហាទាំងអស់នេះអាចធ្វើអោយគ្រោះថ្នាក់ដល់ជីវិតបាន។
-
ស្លេកស្លាំងធ្ងន់ធ្ងរ៖ ជំងឺគ្រុនចាញ់ធ្វើអោយខូចខាតដល់គ្រាប់ឈាមក្រហម ដូច្នេះការស្លេកស្លាំងធ្ងន់ធ្ងរអាចនឹងកើតមាន។
-
ជាតិស្ករក្នុងឈាមថយចុះ៖ ទម្រងធ្ងន់ធ្ងរបស់ជំងឺគ្រុនចាញ់អាចធ្វើអោយជាតិស្ករក្នុងឈាមថយចុះហើយថ្នាំគីនីនគឺជាថ្នាំមួយប្រភេទដែលគេប្រើជាញឹកញាប់សម្រាប់ ព្យាបាលជំងឺគ្រុនចាញ់។ការដែលមានជាតិស្ករចុះខ្លាំងអាចធ្វើអោយអ្នកជំងឺសន្លប ឬស្លាប់។ ការលាប់ឡើងវិញប្រហែលជាអាចកើតមានប៉ារ៉ាសិតជំងឺគ្រុនចាញ់មួយចំនួន ដែលបង្កអោយមានជំងឺស្រាលៗ អាចនឹងក្នុងខ្លួនរបស់អ្នករាប់ឆ្នាំ ហើយអាចលាប់ឡើងវិញដែរ។
សូមបញ្ជាក់ថា រយៈពេល១៣ឆ្នាំនៃចំនួនអ្នកស្លាប់ដោយជំងឺគ្រុនចាញ់តាំងពីឆ្នាំ២០០០មក ត្រូវគេរាយការណ៍ថា មានចំនួន៦០៨នាក់ នៅឆ្នាំ២០១០បានថយចុះមកនៅ១៥១នាក់ ឆ្នាំ២០១១ថយចុះមកត្រឹម៩៣នាក់ ឆ្នាំ២០១២ ថយចុះមកនៅ៤៦នាក់ និងនៅឆ្នាំ២០១៣ ថយចុះមកនៅត្រឹមតែ១២នាក់ប៉ុណ្ណោះ៕ ដោយ៖ ភីន រ៉ា