ភ្នំពេញ៖ លោក ទូច សើ អនុប្រធានសហជីពសេរីកម្មករ នៃព្រះរាជាណាចក្រកម្ពុជាបានថ្លែងប្រាប់កាលពីព្រឹកថ្ងៃចន្ទ័ថា ក្រុមកម្មករ-កម្មការិនីជាង៥០០០នាក់ ដែលបម្រើការងារនៅរោងចក្រវិនស្តារ ស្ថិតនៅភូមិអុងសុគន្ធា ឃុំមហាឬស្ស៊ី ស្រុកគងពិសី ខេត្តកំពង់ស្ពឺ បានបន្តផ្ទុះកូដកម្មមិនព្រមចូលបំរើការងារអស់រយៈពេល៣ថ្ងៃកន្លងមកហើយ។លោកបន្តថា ក្រុមកម្មករបានបន្តធ្វើកូដកម្មរហូតមកដល់ព្រឹកថ្ងៃទី១៧ ខែមីនា ឆ្នាំ២០១៤នេះ គឺដើម្បីទាមទារលក្ខខណ្ឌ ការងារមួយចំនួនពីថៅកែរោងចក្រ ប៉ុន្តែភាគីទាំងពីរនៅមិនទាន់ជួបចរចារគ្នានៅឡើយទេ។
បើតាមមន្ត្រីខាងលើនេះបានបញ្ជាក់ដែរថា មូលហេតុចំបង ដែលក្រុមកម្មករធ្វើកូដកម្ម ដោយសារម្ចាស់រថយន្តដែល ដឹកកម្មករជារៀងរាល់ថ្ងៃ បាន ដំឡើងថ្លៃ ទើបក្រុមកម្មករធ្វើកូដកម្មទាមទារឲ្យថ្លៃរថយន្តចំនួន១៥ដុល្លារ ព្រោះបច្ចុប្បន្នថៅកែឲ្យថ្លែ រថយន្តត្រឹមតែ១០ដុល្លារទេ ខណៈរោងចក្រផ្សេងដែលនៅក្បែរទីតាំងនោះថៅកែបានឡើងថ្លៃ១៥ដុល្លារ ក្នុងនោះក្រុមកម្មករក៏បានទាមទារ ប្រាក់រង្វាន់ទៀងទាត់១៥ ដុល្លារ បាយថ្ងៃត្រង់១៥ដុល្លារ ជាពិសេសសូមស្នើកុំឲ្យប្រធានផ្នែក ជេរប្រមាថមាក់ងាយមកលើ ក្រុមកម្មករ។លោកបន្ថែមថាអ្វីដែលធ្វើឲ្យក្រុមកមម្មករ មានការភ្ញាក់ផ្អើលនោះ គឺរដ្ឋបាលនៅក្នុង រោងចក្រនេះ បានយកលុយពីកម្មករប្រុស១៥០ដុល្លារនៅ ពេលដែលចូលធ្វើការ៕
កម្មការិនីម្នាក់ឈ្មោះពិសី អាយុ១៩ឆ្នាំ បាននិយាយប្រាប់ថា ក្រុមកម្មករបានផ្ទុះកូដកម្មនេះតាំងពីល្ងាចថ្ងៃ សុក្រទី១៤ ខែមីនា ឆ្នាំ២០១៣មកម្ល៉េះ ប៉ុន្តែរហូតមកទល់ពេលនេះ ថៅកែមិនព្រមផ្តល់ដំណោះស្រាយឲ្យពួកកម្មករ ទៀត។ កញ្ញាបន្តថា ពួកយើងមិនទាមទារនូវលក្ខខណ្ឌ័អ្វីហួសហេតុឡើយ ប៉ុន្តែយើងគ្រាន់តែចង់ឲ្យថៅកែគោរពសិទ្ធ ការងាររបស់កម្មករទាំងអស់ ហើយយើងគ្រាន់តែធ្វើការទាមទារឲ្យមានលក្ខខណ្ឌដូចរោងចក្រដទៃទៀតប៉ុណ្ណោះ។ ដោយ៖ អភិរក្ស