ភ្នំពេញ៖ ដោយសារការរីកចំរើនផ្នែកឧស្សាហកម្មធំរបស់ប្រទេស ឥតឈប់ឈរពីមួយឆ្នាំទៅមួយឆ្នាំ ហើយធនធានមនុស្សនៅកម្ពុជានៅមានកម្រិត បច្ចុប្បន្នប្រទេសកម្ពុជាកំពុងតែខ្វះអ្នកបចេ្ចកទេស (អ្នកជំនាញ) សម្រាប់បំរើការងារនៅក្នុងវិស័យ ឧស្សាហកម្មធំៗ ហើយការងារជំនាញ សំខាន់ៗ ត្រូវបានកាន់កាប់ដោយបុគ្គលិកជាជាតិបរទេស ។ លោក អ៊ិត សំហេង រដ្ឋមន្រ្តី ក្រសួងការងារ និងបណ្តុះបណ្តាលវិជ្ជាជីវៈ បានថ្លែងក្នុងពិធី ដាក់បង្ហាញ របាយការណ៍របស់ CAMFEBA ស្តីពី «មាគ៌ាឆ្ពោះទៅកាន់ភាពរុងរឿង» កាលពីព្រឹកថ្ងៃទី១២ខែមីនាឆ្នាំ២០១៤ថា ការងារសេដ្ឋកិច្ចរបស់យើងត្រូវបានបង្កើតចាំបាច់ត្រូវបំពេញ ដោយប្រជាជនកម្ពុជា ប៉ុន្តែក្រុមហ៊ុន អាចរកបានកម្មករ ក្នុងស្រុក មកកាន់កាប់បានតែនៅក្នុងឧស្សាហកម្មធុនស្រាលៗប៉ុណ្ណោះ ហើយតំណែងដែលត្រូវការជំនាញ កាន់តែខ្ពស់ ជារឿយៗ ត្រូវបានកាន់កាប់ដោយបុគ្គលិកបរទេស ។
.jpg)
.jpg)
លោករដ្ឋមន្រ្តីបានថ្លែងបន្តថា ការដោះស្រាយបញ្ហាកង្វះអ្នកជំនាញនេះពិតជាមានសារសំខាន់ នៅក្នុងប្រទេសកំពុងអភិវឌ្ឍន៍ដូចកម្ពុជាយើង បើគិតអំពីការធ្វើសមាហរណកម្មអាស៊ាននៅឆ្នាំ២០១៥ខាងមុខបន្ថែមទៀតនោះ យើងមានការព្រួយបារម្ភខ្លាំង អំពីលំហូរចូលដោយសេរី នៃកម្មករជំនាញ ទូទាំងតំបន់អាស៊ាន ដែលធ្វើឱ្យកម្មករ និយោជិត របស់យើង ពិបាកក្នុងការប្រកួតប្រជែង ។
លោក អ៊ិត សំហេង បន្ថែមថា ដើម្បីដោះស្រាយនូវបញ្ហានេះ រាជរដ្ឋាភិបាល ក៏ដូចជាក្រសួង ស្ថាប័ន ពាក់ព័ន្ធ ទាំងអស់ត្រូវធ្វើការបំពាក់បំប៉ន យុវជន និងកម្មករ និយោជិតយើង ឱ្យបានសកម្ម ជាពិសេសត្រូវមានប្រព័ន្ធអប់រំរឹងមាំ ដែលផ្សាភ្ជាប់ ទៅនឹងសេចក្តីត្រូវការចាំបាច់ក្នុងការផ្លាស់ប្តូរ ផ្នែកវិស័យឯកជន ក្នុងចំណោមប្រទេសដៃគូរអភិវឌ្ឍន៍ទាំងឡាយ ដើម្បីឲ្យធនធានមនុស្សនៅក្នុងប្រទេសកម្ពុជាស្ទុះឡើងមួយកម្រិតទៀត ៕
ដោយ៖ ស.ស្អាត