ភ្នំពេញ៖ ប្រទេសកម្ពុជាត្រូវបានអន្តរជាតិវាយតម្លៃថា ជាប្រទេសទី១ក្នុងតំបន់អាស៊ីប៉ាស៊ីហ្វិក ដែលសម្រេចបានវឌ្ឍនភាពយ៉ាងល្អប្រសើរ និងការកែលំអរសួចនករផ្នែកសង្គមកិច្ច ពិសេសគឺយុទ្ធសាស្រ្តកាត់បន្ថយភាពក្រីក្ររបស់ប្រជាពលរដ្ឋបានលើសពី១ភាគរយក្នុងមួយឆ្នាំ ហើយជាប្រទេសក្នុងចំណាត់ថ្នាក់ទី៥ ដែលសម្រេចបាននូវគោលដៅអភិវឌ្ឍន៍សហស្សវត្ស និងជាប្រទេសជាប់ចំណាត់ថ្នាក់ទី១៥ ដែលសម្រេចបានកំណើនសេដ្ឋកិច្ចខ្ពស់នៅលើពិភពលោក ក្នុងរយៈពេល១០ឆ្នាំចុងក្រោយ ។ នេះជាការលើកឡើងរបស់លោក យឹម ឆៃលី ឧបនាយករដ្ឋមន្រ្តី និងជាប្រធានក្រុមប្រឹក្សាស្តារអភិវឌ្ឍន៍វិស័យកសិកម្មនិងជនបទ ថ្លែងនៅក្នុងសន្និបាតបូកសរុបការងារប្រចាំឆ្នាំ២០១៣ និងទិសដៅការងារអនុវត្តបន្តក្នុងឆ្នាំ២០១៤របស់ក្រសួងអភិវឌ្ឍជនបទនៅព្រឹកថ្ងៃទី១២ ខែមីនា ឆ្នាំ២០១៤ នាសាលមហោស្របចតុមុខ។ លោកឧបនាយករដ្ឋមន្រ្តី យឹម ឆៃលី បានមានប្រសាសន៍ទៀតថា រាជរដ្ឋាភិបាលអាណត្តិទី៥នេះបានប្រសូត្រចេញពីឆន្ទៈប្រជាពលរដ្ឋ ដែលបានបោះឆ្នោតកាលពីថ្ងៃទី២៨កក្កដា២០១៣យ៉ាងពិតប្រាកដ និងបានកើតឡើងក្នុងដំណាក់កាលមួយដែលសេដ្ឋកិច្ចប្រទេសបានបង្ហាញនូវភាពរឹងមាំរបស់ខ្លួន ឆ្ពោះទៅសម្រេចគោលដៅ គោលនយោបាយកំណើនសេដ្ឋកិច្ច៧ភាគរយ និងឆ្ពោះទៅសម្រេចគោលដៅទាំងអស់ ក្នុងការអភិវឌ្ឍប្រទេស ។
.jpg)
លោកឧបនាយករដ្ឋមន្រ្តីបញ្ជាក់ថា ទោះបីជាកំណើនទាំងអស់នោះ មានភាពផុយស្រួយ និងមានហានិភ័យខ្ពស់ ដោយសារភាពប្រាដកប្រជានៃវិប័តសេដ្ឋកិច្ចពិភពលោក និង គ្រោះមហន្តរាយ ដែលបានកើតឡើងផ្ទួនៗគ្នាកាលពីឆ្នាំមុនៗយ៉ាងណាក្តី ក៏រាជរដ្ឋាភិបាលបានជម្នះនូវផលវិបាកដែលកើតចេញពីវិប័តកលយុគ្គសេដ្ឋកិច្ចពិភពលោកទាំងឡាយនោះ សម្រេចបាននូវយុទ្ធសាស្រ្តចតុកោណដំណាក់កាលទី១-២ និងសម្រេចនូវការធានា ឲ្យបាននូវចិរភាព ស្ថិរភាពនយោបាយ សន្តិសុខសណ្តាប់ធ្នាប់សង្គម សំដៅលើកស្ទួយនិតិរដ្ឋ ការពារសិទ្ធរបស់ប្រជាពលរដ្ឋ និងលទ្ធិប្រជាធិបតេយ្យសេរីពហុបក្ស។ សូមបញ្ជាក់ថា បើទោះជាវិបត្តិសេដ្ឋកិច្ចហិរញ្ញវត្ថុសកលលោកជះឥទ្ធិពលក្នុងឆ្នាំ២០០៩មកលើកម្ពុជាយាងណាក្តី ក៏កំណើនសេដ្ឋកិច្ចកម្ពុជានៅតែវិជ្ជមាន ក្នុងនោះនៅឆ្នាំ២០១០សេដ្ឋកិច្ចកម្ពុជាបានងើបឡើងដល់៦ភាគរយ ហើយឆ្នាំ២០១១និង២០១២មានកំណើនក្នុងរង្វង់៧ភាគរយ និងបានធ្វើឲ្យផលិតផលក្នុងស្រុកសរុបសម្រាប់ប្រជាជនម្នាក់ៗកើនឡើងពី ៧៦០ដុល្លារអាមេរិក ក្នុងឆ្នាំ២០០៨ដល់ជិត១០០០ដុល្លារក្នុងឆ្នាំ២០១២ ហើយរំពឹងថានឹងកើនឡើងដល់ជាង១០០០ដុល្លារអាមេរិកក្នុងឆ្នាំ២០១៣កន្លងមកនេះ៕
ដោយ៖ស.ស្អាត