កណ្តាល៖ យុវជនម្នាក់ក្នុងចំណោមបក្ខពួក២នាក់ បានត្រូវសមត្ថកិច្ចនគរបាលក្រុង តាខ្មៅ ចាប់ខ្លួនពីបទហិង្សាដោយចេតនា រួចបញ្ជូនទៅកាន់អធិការដ្ឋាននគរបាលក្រុងតាខ្មៅដើម្បីចាត់ការតាមច្បាប់ បន្ទាប់ពីជនសង្ស័យខាងលើនេះបានបើកម៉ូតូឌុបបក្ខពួកឲ្យធ្វើសកម្មភាពវាយទៅលើយុវសិស្សវិទ្យាល័យតាខ្មៅម្នាក់ដោយខ្សែក្រវ៉ាត់ បណ្តាលឲ្យរងរបួសបែកក្បាលយ៉ាងដំណំ។
ហេតុការណ៍ខាងលើបានកើតឡើងកាលពីវេលាម៉ោង១១ និង១០នាទី ថ្ងៃទី០៦ ខែមីនា ឆ្នាំ២០១៤ ចំណុចរង្វង់មូលលោកតាម៉ៅ ស្ថិតក្នុងភូមិតាខ្មៅ សង្កាត់/ក្រុងតាខ្មៅ ។មន្ត្រីនគរបាលក្រុងតាខ្មៅបានឲ្យដឹងថា ជនសង្ស័យឈ្មោះ ម៉ាណា មូសា ភេទប្រុស អាយុ១៧ឆ្នាំ ជនជាតិខ្មែរឥស្លាម មានទីលំនៅភូមិព្រែកតាពៅ សង្កាត់ដើមមៀន ក្រុងតាខ្មៅ ជាអ្នកបើកម៉ូតូឌុបជនដៃដល់ឈ្មោះ អាត តុលា ភេទប្រុស អាយុ១៩ឆ្នាំ (គេចខ្លួន) មានទីលំនៅភូមិស្វាយរលំ ឃុំស្វាយរលំ ស្រុកស្អាង ធ្វើសកម្មភាពវាយជនរងគ្រោះឈ្មោះ សូ សំណាង ភេទប្រុស អាយុ១៨ឆ្នាំ ជាសិស្សវិទ្យាល័យតាខ្មៅ មានទីលំនៅភូមិឬស្សីស្រុក ឃុំឈើទាល ស្រុកកៀនស្វាយ បណ្តាលឲ្យរងរបួសបែកក្បាល ខណៈដែលជនរងគ្រោះជិះម៉ូតូចេញពីសាលារៀនវិញ ។
លោក ស៊ឹម ប៊ុតបណ្ឌិត អធិការនគរបាលក្រុងតាខ្មៅបានបញ្ជាក់ថា នៅព្រឹកថ្ងៃទី០៧ ខែមីនា សមត្ថកិច្ចនគរបាលជំនាញ នៃអធិការដ្ឋាននគរបាលក្រុងតាខ្មៅបានបញ្ជូនខ្លួនជនសង្ស័យទៅកាន់ការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តកណ្តាល ដើម្បីចាត់ការបន្តតាមនីតិវិធីច្បាប់ ៕ដោយៈភីនរ៉ា