ភ្នំពេញ៖ យោងតាមរបាយការណ៍ថ្មីមួយ ស្តីពីការវាយតម្លៃ ផលប៉ះពាល់បរិស្ថាន របស់អង្គការការពារ ជីវិតសត្វព្រៃពិភពលោក ហៅកាត់ថា WWF បានបង្ហាញថា ការសម្រេច គ្រោងនឹងសាងសង់ ទំនប់វារីអគ្គិសនី ដនសាហុង ស្ថិតនៅភាគខាងត្បូងប្រទេសឡាវ គឺមានផលប៉ះពាល់ ខ្លាំងក្លាណាស់ ដល់ធនធានជលផល ទន្លេមេគង្គ និង មនុស្សរាប់លាននាក់ ដែលរស់នៅតាមតំបន់ ទន្លេមេគង្គក្រោម។
បើតាមលោក ឈិត សំអាត ប្រធានអង្គការ ការពារជីវិតសត្វព្រៃ ពិភពលោក បានឲ្យដឹងថា វាជារឿងសំខាន់ណាស់ លើសិក្សាការ វាយតម្លៃផលប៉ះពាល់ដល់សង្គម និងបរិស្ថាន នៃការសាងសង់ ទំនប់វារីអគ្គិសនី ដនសាហុងនេះ ជាពិសេសគឺប៉ះពាល់ដល់មនុស្ស ដែលប្រឈមនឹងហនិភ័យ។
របាយការណ៍ដដែលរបស់អង្គការ ការពារជីវិតសត្វព្រៃពិភពលោក បានបន្តថា កត្តាគំរាមកំហែង ផងដែរនោះគឺជីវិតសត្វផ្សោត ដែលរងការប៉ះពាល់ដល់ការបាត់បង់។
សូមបញ្ជាក់ថា សត្វផ្សោតនៅ ប្រទេសកម្ពុជា បច្ចុប្បន្នមាន ចំនួន៨៥ក្បាល ប៉ុណ្ណោះ។ដោយឡែកកាលពីពេលថ្មីនេះ មានសត្វផ្សោត ចំនួន២ក្បាលហើយដែលបានស្លាប់នៅក្នងឆ្នាំ២០១៤នេះ។ចំពោះចំនួន សត្វផ្សោត ដែលបានស្លាប់មានចំនួនប្រហែលជា១១០ ក្បាល បើគិតចាប់ពីឆ្នាំ២០០៣ មកដល់ពេលនេះ ។នេះបើតាមទន្និន័យក្រុមការងារអភិរក្សសត្វព្រៃពិភពលោកWWF។
ជាមួយគ្នានោះដែរ អង្គការកាពារសត្វព្រៃពិភពលោក WWF ក៏បានអំពាវនាវ ឲ្យរដ្ឋាភិបាលឡាវ និងដៃគូពាក់ព័ទ្ធ ផ្អាកការសាងសង់ទំនប់វារីអគ្គិសនី ដន សាហុង ដើម្បីផ្តល់ឪកាសម្រាប់ធ្វើសេចក្តី សម្រេចចិត្ត ដោយមានការព្រមព្រៀងគ្នា ហើយដោយឈរលើមូលដ្ឋានវិទ្យសាស្ត្រ និងការពិគ្រោះយោបល់និងប្រទេស ដែលរងផលប៉ះពាល់ពីការសាងសង់នេះ ដើម្បីជៀសវាង កុំឲ្យខាតបង់ប្រយោជន៍ទាំងសងខាង៕
ដោយ៖ ភីនរ៉ា