ភ្នំពេញ: សិក្ខាសាលារយៈពេល ៣ថ្ងៃ ចាប់ពីថ្ងៃទី១៧ ដល់ថ្ងៃទី១៩ ខែកុម្ភៈ ឆ្នាំ២០១៣ ត្រូវបានធ្វើឡើង ដើម្បីបង្កើនសមត្ថភាព ចំណេះដឹងបន្ថែមទៀតសម្រាប់មន្ត្រីគណបក្សហ្វ៊ុនស៊ិនប៉ិច និងគណបក្សជាតិនិយម ដែលទើបប្តូរឈ្មោះមកពីគណបក្សនរោត្តម រណឫទ្ធិ ស្តីពីថាមពល បរិស្ថាន និងការប្រែប្រួលអាកាសធាតុ។ គណបក្សសម្ព័ន្ធភាពទាំងពីរ នឹងប្រើប្រាស់ប្រធានបទនៃការប្រែប្រួលអាកាសធាតុ ដើម្បីឃោសនារកសំឡេងឆ្នោតសម្រាប់ការបោះឆ្នោតជាតិ នៅខែកក្កដា។
សិក្ខាសាលានោះ ត្រូវបានរៀបចំឡើងនៅទីស្នាក់ការ មូលនិធិ ខុនរ៉ាដ អាដិនណៅអ៊ែរ ប្រចាំកម្ពុជា ស្ថិតនៅផ្ទះលេខ៤ ផ្លូវ៤៦២ ខណ្ឌចំការមន រាជធានីភ្នំពេញ។
សេចក្តីប្រកាស លើកឡើងថា សិក្ខាសាលារយៈពេល ៣ថ្ងៃនេះ ដែលបិទបញ្ចប់នៅថ្ងៃទី១៩កុម្ភៈនេះ ផ្តោតទៅលើប្រធានបទ ស្តីពីបរិស្ថាន ថាមពល និងការប្រែប្រួលអាកាសធាតុក្នុងពិភពលោក ដែលត្រូវយកចិត្តទុកដាក់ជាសកល។
គ្រូឧទ្ទេសនាមនៅក្នុងឱកាសនោះ រួមមានៈ លោកសាស្ត្រាចារ្យបណ្ឌិត Christian C.Juckenack សាស្ត្រាចារ្យជំនាញថាមពលគ្រប់គ្រងធនធាន និងបរិស្ថាន នៃសកលវិទ្យាល័យអនុវត្តវិទ្យាសាស្ត្រ Erfurt ប្រទេសអាល្លឺម៉ង់ និងគ្រូឧទ្ទេសនាមមួយចំនួនទៀត ដែលមកពីក្រសួង ស្ថាប័ន ជំនាញ មន្ត្រីតំណាងបម្រែបម្រួលអកាសធាតុ សាស្ត្រចារ្យមកពីសាកលវិទ្យាល័យនីតិសាស្ត្រសេដ្ឋកិច្ច និងសាកលវិទ្យាល័យបញ្ញាសាស្ត្រ ព្រមទាំងអ្នកគ្រប់គ្រងកម្មវិធីឧបករណ៍ដុតកម្ដៅសាកលលោក នៃអង្គការ Geres Cambodia និងប្រធានក្រុមការងារគម្រោងថាមពលពន្លឺព្រះអាទិត្យសហគមន៍ចំបក់ ខេត្តកំពង់ស្ពឺ។
សេចក្តីប្រកាសលើកឡើងថា មូលនិធិ ខុនរ៉ាដ អាដិនណៅអ៊ែរ ប្រចាំកម្ពុជា លើកយកប្រធានបទទាំង ៣ ខាងលើ មកបណ្តុះបណ្តាលដល់មន្ត្រីគណបក្សនយោបាយមានអាសនៈនៅក្នុងរដ្ឋសភា នាពេលនេះ ដោយសារថា បញ្ហាបរិស្ថាន ថាមពល និងការប្រែប្រួលអាកាសធាតុ ត្រូវបានប្រទេសអភិវឌ្ឍន៍ជឿនលឿនលើពិភពលោក កំពុងតែគិតគូររកដំណោះស្រាយកាត់បន្ថយរាល់ការប្រើប្រាស់ ថាមពលនុយក្លេអ៊ែរ ការចម្រាញ់យកប្រេង ឧស្ម័ន ការបញ្ចេញចោលនូវកាកសំណល់រឹង ឬរាវពីរោងចក្រ សហគ្រាស ការរុករករ៉ែក្នុងដី ការសាងសង់ទំនប់វារីអគ្គិសនី ការកាប់បំផ្លាញព្រៃឈើ ផែនដីឡើងកម្ដៅ គ្រោះទឹកជំនន់ គ្រោះរាំងស្ងួត ការប្រើប្រាស់រថយន្ត ម៉ូតូ ម៉ាស៊ីនត្រជាក់ ការបញ្ចេញចំហាយឧស្ម័ននៃអគារខ្ពស់។ល។
ក្រៅពីការកាត់បន្ថយ ការប្រើប្រាស់ថាមពលខាងលើនេះ បច្ចុប្បន្ន អ្នកវិទ្យាសាស្ត្រ បែរមកផលិតថាមពលដើរដោយពន្លឺព្រះអាទិត្យ ឬខ្យល់ និងឧបករណ៍ដុតកម្ដៅ ដើម្បីផលិតថាមពលអគ្គិសនីជំនួសវិញ។
លោកសាស្ត្រាចារ្យបណ្ឌិត Christian C.Juckenack លើកយកនូវប្រវត្តិ និងលក្ខណសម្បត្តិគន្លឹះ នៃអត្តសញ្ញាណគណបក្សទាំង៥ នៅក្នុងប្រទេសអាល្លឺម៉ង់ មានដូចជា គណបក្សប្រជាធិបតេយ្យគ្រឹស្តសាសនា និយមកណ្តាល ប្រជាធិបតេយ្យសង្គម សេរីនិយម និងគណបក្សទស្សនៈ នយោបាយបៃតង។ គណបក្សទាំង៥នេះ មានគោលនយោបាយស្តីពីបរិស្ថាន និងថាមពល ក្នុងការឃោសនារកសំឡេងគាំទ្រពីអ្នកបោះឆ្នោត នៅក្នុងប្រទេសអាល្លឺម៉ង់។ ចំណែកគណបក្សបៃតងឥណ្ឌា នៃប្រទេសឥណ្ឌា ក៏បានលើកក្នុងកម្មវិធីនយោបាយរបស់ខ្លួន ជំទាស់ចំពោះការប្រើប្រាស់សារធាតុគីមី និងជីវសាស្ត្រ ចំពោះការប្រើប្រាស់លើធនធានធម្មជាតិផងដែរ។
សិក្ខាសាលា បានលើកយកនូវប្រធានបទស្តីពីបរិស្ថាន ថាមពល និងការប្រែប្រួលអាកាសធាតុ មកបង្រៀនដល់មន្ត្រី នៃគណបក្សរាជានិយមហ្វ៊ុនស៊ិនប៉ិច និងគណបក្សជាតិនិយម ក្នុងពេលនេះ ដើម្បីផ្តល់ជាគំនិតលើកជាយោបល់ ក្នុងការបង្កើតនូវគោលនយោបាយសម្រាប់ឃោសនារកសំឡេងគាំទ្រពី ប្រជាពលរដ្ឋ នៅថ្ងៃអនាគត។
សូមបញ្ជាក់ថា បញ្ហាបរិស្ថាន និងថាមពល គឺប្រជាពលរដ្ឋកម្ពុជា មានការយល់ដឹងតិចតួចនៅឡើយ៕ S
អត្ថបទនេះដកស្រង់ចេញពី CEN.COM.KH