សម្ដេចតេជោ ហ៊ុន សែន បានប្រកាសដាក់បទបញ្ជាថ្មីចៅហ្វាយខេត្ត រាជធានី ពិនិត្យមើលលើករណីយកភាស៊ីតាមផ្សារនៅទូទាំងប្រទេសឡើងវិញ ក្រោយមានការរិះគន់ និងជេរប្រមាថយ៉ាងសម្បើមណាស់ពីប្រជារាស្រ្ត ដោយផ្តើមដំបូងមុនគេ ពីរាជ ធានីភ្នំពេញ ដើម្បីឱ្យស្របតាមកំណែទម្រង់ស៊ីជម្រៅរបស់រាជរដ្ឋាភិបាលអាណត្តិទី៥។ថ្លែងនៅក្នុងឱកាសអញ្ជើញជាអធិបតីភាពដ៏ខ្ពង់ខ្ពស់ ពិធីប្រគល់សញ្ញាបត្រជ័យលាភី ដល់សិស្សមន្រ្តីជាន់ខ្ពស់ ជំនាន់កំណែទម្រង់រដ្ឋ សិស្សមន្រ្តីក្រមការជំនាន់ ភក្តី ភាព និងវិញ្ញាបនបត្រដល់កម្មសិក្សាការី មន្រ្តីជាន់ខ្ពស់-មន្រ្តីមធ្យមឆ្នាំ ២០១៣ ព្រមទំាងបើកវគ្គ បណ្តុះបណ្តាល និងវិក្រឹតការឆ្នាំ២០១៤ របស់សាលាភូមិន្ទរដ្ឋបាល ស្ថិតនៅវិទ្យាស្ថានជាតិអប់រំ កាលពីព្រឹកថ្ងៃទី ១៧ កុម្ភៈ នេះ។
សម្តេចហ៊ុនសែន បានបញ្ជាក់ថា អភិបាលរាជធានី និងអភិបាលខេត្តទាំងអស់ ត្រូវពិនិត្យមើលលើអ្នកដេញភាស៊ីផ្សារ ហើយធ្វើទូទាំងប្រទេស ដោយចាប់ផ្តើមដំបូង នៅរាជធានីភ្នំពេញ។ អ្នកយកភាស៊ីផ្សារ យកលុយពីអ្នកលក់ ហើយទាត់កញ្ជ្រែងគេ ជាដើម។ ដល់ពេលគេបន្ទោស គេមកបន្ទោសលើហ៊ុនសែន។ ដូច្នេះ ត្រូវមើល កុំឲ្យអ្នកដេញភាស៊ី ទៅធ្វើផ្តេសផ្តាស់ ហើយឲ្យឥរិយាបថអ្នកយកភាស៊ី ល្អបន្តិចមើល។
សម្តេចតេជោ ក៏បានផ្តាំផ្ញើដែរថា ការដែលធ្វើជាមន្ត្រីត្រូវធ្វើជាអ្នកបំរើប្រជាជន គឺមិនធ្វើចៅហ្វាយរបស់ប្រជាជននោះទេ។ ពាក្យចាស់លោកពោលថា ងើយស្កក ឱនដាក់គ្រាប់ ហើយមិនត្រូវធ្វើជាមន្ត្រីធ្វើជាមន្ត្រីជើង១០នោះទេ ត្រូវធ្វើជាមន្ត្រីជើងពីរ និងត្រូវចេះរួមសុខ រួមទុក្ខជាមួយគ្នា កុំដូចអ្នកខ្លះចេះតែរួមសុខ ពេលមានទុក្ខរត់ចោលគ្នា។ សម្តេចបន្ថែមថា ការធ្វើការជាមួយគ្នាត្រូវប្រកាន់ចរិត សាមគ្គីផង និងតស៊ូផង មានន័យថា ចំណុចណា មិនត្រូវ ត្រូវហ៊ានតស៊ូមតិ ហើយអ្នកដែលគេផ្តល់មតិជូននោះក៏ត្រូវហ៊ានទទួលយកផង។ ដូច្នេះ ដើម្បីអនាគតដ៏ល្អ ទាំងអស់គ្នាត្រូវរួមគ្នាធ្វើអំពើល្អ និងទប់ស្កាត់នូវរាល់ ចំណុចទាំងឡាយណាដែលអសកម្មនៅក្នុងការងារ។
យោងតាមសៀវភៅបន្ទុករបស់ក្រសួងសេដ្ឋកិច្ច និងហិរញ្ញវត្ថុប្រការ១៣ចំណុច១៤ និង១៥ ពាក់ ព័ន្ធតម្លៃផ្ញើកង់ម៉ូ គឺក្រសួងបានអនុញ្ញាតឱ្យអ្នកនិយោគភាស៊ីផ្ញើកង់យកតម្លៃតែ២០០រៀលថ្លៃផ្ញើម៉ូតូតែ៣០០រៀលប៉ុណ្ណោះ ។ តែបច្ចុប្បន្នតម្លៃផ្ញើកង់ គ្រប់ផ្សារទាំងអស់យកដល់ទៅ៥០០រៀល ចំណែកតម្លៃផ្ញើម៉ូតូ១.០០០រៀលទៅ ១.៥០០រៀលដោយអ្នកវិនិយោគមិនព្រមអនុវត្ដតាមសៀវភៅបន្ទុកទេ ។
គួរបញ្ជាក់ថា រយៈពេលកន្លងមក សាលាបានបណ្តុះបណ្តាលសិស្ស មន្ត្រីជាន់ខ្ពស់បាន៧ជំនាន់ មាន២៨៥នាក់ ,សិស្សមន្ត្រីមធ្យម៣ជំនាក់ មាន១៧៤នាក់ ,សិស្សក្រមការ៥ជំនាក់ មាន២៨៤នាក់, សរុប ៧៤៣នាក់។ បច្ចុប្បន្ន សាលាកំពុងបន្តបណ្តុះបណ្តាលសិស្សមន្ត្រីជាន់ខ្ពស់ជំនាក់ទី៧ចំនួន៦០នាក់ទៅតាមលទ្ធផលនៃការប្រឡងប្រជែង និងទៅតាមសេចក្តីសម្រេចរបស់ក្រសួងមុខងារ សាធារណៈ។ ចំពោះសិស្សមន្ត្រីជាន់ខ្ពស់ដែលទទួលសញ្ញាបត្រនៅថ្ងៃនេះ មានចំនួន៦០នាក់ សិស្សក្រមការ៦១នាក់,កម្មសិក្សាការីវគ្គវិក្រិត្យការ សុក្រិត្យការ មន្ត្រីជាន់ខ្ពស់ និងមធ្យម ចំនួន១៨១នាក់៕
ដោយៈភីនរ៉ា