ភ្នំពេញ៖ ដោយមានកិច្ចសហប្រតិបត្តិការយូរអង្វែង និងធ្លាប់បានផ្សារភ្ជាប់នូវទំនាក់ទំនង​ជាប្រពៃណីតាំងតែពីដើម​រៀង​មក ប្រទេសជប៉ុនបានត្រៀមលក្ខណៈគ្រប់គ្រាន់ក្នុងការបញ្ជូន អ្នកវិនិយោគ (វិស័យឯកជន) មកបណ្តាក់​ទុន​រក​ស៊ី នៅក្នុងប្រទេសកម្ពុជាឲ្យបានច្រើន ដើម្បីប្រែក្លាយទំនាក់ទំនងប្រពៃណីឲ្យទៅជាការពង្រីកយុទ្ធសាស្រ្តលើផ្នែក​សេដ្ឋកិច្ច ព្រោះថា​កន្លងមកជប៉ុនបានប្រតិបត្តិការលើផ្នែកជំនួយ និង ធ្វើជាដៃគូរដោយផ្ទាល់លើកិច្ចសហប្រតិ​បត្តិ​ការ​រវាងរដ្ឋា​ភិបាលនិងរដ្ឋាភិបាល តែវិស័យឯកជនហាក់នៅអល់អែក។

បន្ទាប់ពីយាង​និវត្តមកពីបំពេញទស្សនកិច្ចព្រះរាជាណាចក្រជប៉ុន នៅព្រលានយន្តហោះ​អន្តរជាតិភ្នំពេញ នាល្ងាច​ថ្ងៃអាទិត្យទី១៦ខែកុម្ភៈឆ្នាំ២០១៤នេះ សម្តេច ព្រះអនុជ នរោត្តម អរុណរស្មី ឧត្តមទីប្រឹក្សាផ្ទាល់ព្រះមហាក្សត្រ និង​ជា​ប្រធានគណបក្សហ៊្វុនស៊ិនប៉ិច បានមាន​សុវនីយ៍ប្រាប់ក្រុមអ្នកសារព័ត៌មានថា ជប៉ុនបានផ្តើមចាប់​អារម្មណ៍ខ្លាំង​ទៅ​​លើការ​វិនិយោគ ដោយបានសន្យាថានឹងជម្រុញវិស័យឯកជន ដោយបញ្ជូនធុរជនជប៉ុនឲ្យមកវិនិយោគឲ្យបាន ច្រើននៅក្នុងប្រទេសកម្ពុជា។ ហើយជប៉ុនក៏នឹងពង្រីកចំណងមេត្រីភាពដែលមានស្រាប់ ឲ្យ ក្លាយទៅជាយុទ្ធសាស្រ្ត​ក្នុងការអភិវឌ្ឍន៍សេដ្ឋកិច្ចនៅកម្ពុជា ឲ្យមានការរីកចម្រើនលើគ្រប់​វិស័យ។

ជាមួយគ្នានោះលោក កែវ ពុទ្ធរស្មី ឧត្តមទីប្រឹក្សាគណបក្សហ៊្វុនស៊ិនប៉ិច ក៏បានមានប្រសាសន៍ ថា ក្រៅពីចាប់​អារម្មណ៍​​​លើកការវិនិយោគ រាជរដ្ឋាភិបាលជប៉ុនក៏បានចាប់អារម្មណ៍យ៉ាងខ្លាំង ទៅលើការកែទម្រង់​ស៊ីជម្រៅ​លើ​ប្រព័ន្ធ​បោះឆ្នោតរបស់រាជរដ្ឋាភិបាលកម្ពុជាអាណត្តិទី៥នៃរដ្ឋសភានេះ ដោយជប៉ុនបានត្រៀមលក្ខណៈ​បញ្ជូនក្រុម​អ្នកបច្ចេកទេស​មកជួយលើការ​កែទម្រង់​នេះ​ឲ្យមានប្រសិទធភាព ។ មួយវិញទៀតប្រទេសជប៉ុនក៏ត្រៀម​ធ្វើការ​សម្រប​សម្រួល​រវាង​គណបក្សទាំងពីគឺគណបក្សប្រជាជន​កម្ពុជា និងគណបក្សសង្រ្គោះជាតិ ពិសេសជម្រុញ​ដល់​គណបក្សសង្រ្គោះជាតិឲ្យចូលរួមក្នុងរដ្ឋសភា ចាប់ដៃគ្នាធ្វើការដោះស្រាយបញ្ហាជាប់​គាំង​នយោបាយឲ្យបានឆាប់ ដើម្បីអនុវត្តយុទ្ធសាស្រ្តជម្រុញវិស័យឯកជនលើផ្នែកពាណិជ្ជកម្ម និងសេដ្ឋកិច្ចក្នុងពេលដ៏ឆាប់ៗខាងមុខនេះ។

លោក កែវ ពុទ្ធរស្មី បានបន្តទៀតថា ប្រទេសជប៉ុនក៏នឹងគ្រោងបើកឲ្យមានជើង​ហោះ​ហើរ​ដោយត្រង់ពីទីក្រុងតូក្យូ មកកាន់ខេត្តសៀមរាប អង្គរ ដើម្បីជម្រុញឲ្យ​វិស័យ​ទេសចរណ៍​រវាងប្រទេសទាំងពីរកាន់តែមាន​កំណើនប្រសើរ​ឡើងចាប់ពីពេលនេះតទៅ។លោកបានបញ្ជាក់ថា ក្រៅពីជំនួបពិភាក្សាការងារជាមួយមន្រ្តីជាន់ខ្ពស់​នៃរាជរដ្ឋា​​ភិបាល សម្តេច ព្រះអនុជ នរោត្តម អរុណរស្មី ក៏បានចូលបង្គំគាល់ និងធ្វើសវនាការជា​មួយព្រះអង្គ​ម្ចាស់ អាគីស៊ីណូ ព្រះរាជបុត្រាព្រះចៅអធិរាជជប៉ុន និងមហេសី ព្រមទាំងរាជវង្សានុវង្ស​ជាច្រើន​អង្គទៀត ដើម្បីបង្កើនទំនាក់ទំនង​ចំណង​មេត្រីភាពរវាងរាជវង្សនៃប្រទេសទាំងពីរ ពិសេស​ព្រះអង្គម្ចាស់អាគីស៊ីណូបានរំលឹកពីគុណ​សម្បត្តិដ៏ថ្លៃ​ថ្លា​របស់​ ព្រះបរមរតនកោដ្ឋ ដែលមាន​ចំពោះប្រជាជននិងប្រទេសជប៉ុន ៕

ដោយ៖ ស.ស្អាត