លោក ញឹក ប៊ុនឆៃ ឧបនាយករដ្ឋមន្ត្រី និងជាអគ្គលេខាធិការគណបក្សហ្វ៊ុនស៊ិនប៉ិចបានសម្ពោធកាត់ខ្សែបូដាក់ឲ្យប្រើប្រាស់នូវស្រះទឹកមួយកន្លែងមានទទឹង២២ម៉ែត្របណ្តោយ៣៣ម៉ែត្រ និងជ្រៅ៤,៥០០ម៉ែត្រចំណាយអស់ថវិកាប្រមាណជា២ពាន់ដុល្លារដែលជាថវិកាផ្តាល់របស់ លោក និងលោកភរិយាផ្ទាល់។ 
អមដំណើរក្នុងឱកាសនោះរួមមានៈ លោក ជា ជុន អនុប្រធានក្រុមការងារចុះពង្រឹងមូលដ្ឋានខេត្តបន្ទាយមានជ័យទទួលបន្ទុកស្រុកអូរជ្រៅ និងសហជីវិន សហជីវិនីជាប្រធាន អនុប្រធានគណៈកម្មការប្រតិបត្តិស្រុកឃុំ ព្រមទាំងសមាជិកអ្នកគាំទ្រ បងប្អូនប្រជាពលរដ្ឋចូលរួមប្រមាណជា៤០០ នាក់។
លោក ញឹក ប៊ុនឆៃ បានថ្លែងកោតសរសើរដល់បងប្អូនសមាជិក សមាជិកាអ្នកគាំទ្រ និងបងប្អូនប្រជាពលរដ្ឋដែលបានចូលរួមនាឱកាសនោះ ។ លោកឧបនាយករដ្ឋមន្រ្តីក៏បានជម្រាបដល់បងប្អូនទាំងនោះថា ហ៊្វុនស៊ិនប៉ិចក្រោមកិច្ចដឹកនាំរបស់សម្តេចរាជបុត្រី ព្រះអនុជ នរោត្តម អរុណរស្មី បុត្រីពៅសម្តេចឪ សម្តេចតា ព្រះនរោត្តម សីហនុ នៃជាតិខ្មែរយើងសព្វថ្ងៃទទួលបាននូវការគាំទ្រពីមួយថ្ងៃទៅមួយថ្ងៃពីប្រជាពលរដ្ឋនៅទូទាំងប្រទេស ជាពិសេសពីលោកយាយអ៊ុំស្រី អ្នកមីង និងក្មួយៗជាស្ត្រី។
លោកបន្តថា បងប្អូនពិតជាចង់បានអ្នកដឹកនាំប្រទេសជាស្ត្រីដូចប្រទេសមួយចំនួនលើសាកលលោក និងបណ្តារប្រទេសជិតខាងនៃយើង ព្រោះថាស្រ្តីដឹកនាំប្រទេសនឹងបង្ហាញពីភាពទន់ភ្លន់ ហ្មឺងម៉ាត់ និងអត់ធ្មត់ ។ លោកក៏បានអំពាវនាវសុំឲ្យបងប្អូនទាំងអស់អញ្ជើញទៅបោះឆ្នោតអោយបានគ្រប់ៗគ្នា សូមគូសឲ្យចំលេខរៀងទី២មានរូបសញ្ញាវិមានឯករាជ្យ នោះគឺជាគណបក្សហ្វ៊ុនស៊ិនប៉ិចដែលជាស្នាព្រហស្ថតែមួយគត់របស់សម្តេចឪ សម្តេចតានៃយើងទុកអោយកូនខ្មែរជំនាន់ក្រោយថែរក្សាអោយបានគង់វង្សយូរអង្វែងទៅអនាគត។
លោក ញឹក ប៊ុនឆៃ បានផ្តាំផ្ញើដល់បងប្អូនទាំងអស់សូមមេត្តាប្រើប្រាស់ស្រះទឹកមួយនេះទាំងអស់គ្នាហើយជួយថែរក្សាស្រះទឹកនេះអោយបានល្អ ដើម្បីជាប្រយោជន៍ប្រើប្រាស់សម្រាប់យើងគ្រប់គ្នា និងទុកបន្តដល់កូនចៅយើងជំនាន់ក្រោយៗទៀតប្រើប្រាស់។
ជាមួយគ្នានោះលោកក៏បានចែកជូននូវវត្ថុអនុស្សាវរីយ៍ដែលជាអំណោយរបស់ សម្តេច រាជបុត្រី ព្រះអនុជ នរោត្តម អរុណរស្មី ប្រធានគណបក្សហ្វ៊ុនស៊ិនប៉ិច ។ ការផ្តល់ជូនវត្ថុអនុស្សាវរីយ៍នេះបានធ្វើឡើងនៅមុនពេលយុទ្ធនាការរកសម្លេងឆ្នោតរបស់បក្សនយោបាយមកដល់ ៕
ដោយ៖ ស.ស្អាត