ភ្នំពេញៈ យោងតាមសេចក្តីប្រកាសរួមរវាងក្រសួងសុខាភិបាល និងអង្គការសុខភាពពិភពលោក ចុះថ្ងៃទី ១២ ខែកុម្ភៈ ឆ្នាំ ២០១៤ ឲ្យដឹងថា កុមារា​ត្រូវបានបញ្ជាក់ដោយវិទ្យាស្ថានប៉ាស្ទ័រកម្ពុជា កាលពីថ្ងៃទី ០៨ ខែកុម្ភៈ ឆ្នាំ ២០១៤ ថា មានជំងឺផ្តាសាយបក្សី H5N1 ។ កុមារានេះចាប់ផ្តើម មាន​គ្រុន​ក្តៅ ហូរសំបោរ និងឈឺបំពង់ក នៅថ្ងៃទី ៣១ ខែមករា ឆ្នាំ ២០១៤ ហើយឪពុកម្តាយ ស្វែងរកការព្យាបាលនៅ គ្លីនិកឯកជនក្នុងភូមិ ។

       ប្រភពព័ត៌មានបន្តថា កុមារាកម្ពុជា អាយុ ០៨ ឆ្នាំដែលមានទីលំនៅក្នុងភូមិក្បាលត្រាច ឃុំស្រែចា ស្រុកស្នួល ខេត្ត​ក្រចេះ ត្រូវបានបញ្ជាក់ថា បានស្លាប់បាត់បង់ជីវិតក្នុង ថ្ងៃទីតែមួយជាមួយប្អូន ស្រីអាយុ ២ ឆ្នាំរបស់ខ្លួន កាលពីថ្ងៃទី ០៧ ខែកុម្ភៈ ឆ្នាំ ២០១៤ ដោយសារឆ្លងជំងឺផ្តាសាយបក្សី H5N1។

       ដោយសារស្ថានភាពសុខភាពរបស់កុមារ មានសភាពកាន់តែធ្ងន់ធ្ងរ កុមារានេះ ត្រូវបានដាក់ឲ្យសំរាក នៅមន្ទីរពេទ្យ​បង្អែក​មេមត់នៅថ្ងៃទី ០៦ ខែកុម្ភៈ ឆ្នាំ ២០១៤ និងត្រូវបានបញ្ជូនទៅមន្ទីរពេទ្យខេត្តកំពង់ចាម នៅម៉ោង ១ ទៀបភ្លឺ បន្ទាប់ពីមានគ្រុនក្តៅ ឈឺ បំពង់ក ក្អក ឈឺពោះ ពិបាក​ដកដង្ហើម និងសន្លឹម និងត្រូវ ដាក់ឲ្យ សំរាកពេទ្យដោយ​ទទួល​បាន​ការ​ព្យាបាលដោយឱសថ Tamiflu នៅថ្ងៃទី ០៧ ខែកុម្ភៈ ។ ប៉ុន្តែ ទោះជាមាន​ការ​យកចិត្តទុកដាក់ពី​សំណាក់​ក្រុម​គ្រូ​ពេទ្យក្តី ក៏កុមារបានស្លាប់នៅថ្ងៃទី ០៧ ខែ កុម្ភៈ ឆ្នាំ ២០១៤ នៅវេលា ម៉ោង ៦ ល្ងាច ។

       គួរបញ្ជាក់ថា ការស្លាប់របស់កុមារានេះ ជាករណីទី ២ ក្នុងឆ្នាំនេះ និងជាករណីទី ៤៩ ដែលបានឆ្លង វីរុសជំងឺផ្តាសា​យ​បក្សី H5N1 ដែល ៣៧ ករណីក្នុងចំណោមករណីផ្តាសាយបក្សីទាំង ៤៩ ដែលកើតមានឡើងនៅ ព្រះរាជា ណា ចក្រ​កម្ពុ​ជា​ កើតលើកុមារអាយុក្រោម ១៤ ឆ្នាំ និង ២៧ ករណី​ក្នុងចំណោមករណីផ្តាសាយបក្សីទាំង ៤៩ ជានារី ហើយមានតែ ១៥ ករណីមានជីវិត ចាប់តាំងពីមានជំងឺនេះលើកដំបូងនៅកម្ពុជាក្នុងឆ្នាំ ២០០៥ នោះ៕

ដោយៈ ភីនរ៉ា