ភ្នំពេញ៖ អ្នកទោសចំនួន ៦២៥នាក់ ដែលកំពុងជាប់ក្នុងពន្ធនាគារ ទូទាំងប្រទេសកម្ពុជា ត្រូវបានគណៈកម្មការថ្នាក់ជាតិពិនិត្យ និងវាយតម្លៃបន្ធូបន្ថយទោស និងលើកលែងទោស។ កិច្ចប្រជុំ ដើម្បីពិនិត្យ និងវាយតម្លៃ សម្រាប់លើកលែងទោស និងបន្ធូរបន្ថយទោសដល់អ្នកទោស នៅអំឡុងថ្ងៃបុណ្យចូលឆ្នាំខ្មែរខាងមុខ ត្រូវបានធ្វើឡើង កាលពីថ្ងៃទី២០មីនា។
ក្នុងកិច្ចប្រជុំ ដែលរៀបចំនៅទីស្តីការក្រសួងយុត្តិធម៌ មានការចូលរួមពីសំណាក់លោក អង្គវង្សវឌ្ឍានា រដ្ឋមន្ត្រីក្រសួងយុត្តិធម៌ និងជាប្រធានគណៈកម្មាធិការថ្នាក់ជាតិពិនិត្យនិងវាយតម្លៃបញ្ជីឈ្មោះ ទណ្ឌិត ស្នើសុំបន្ធូរបន្ថយទោស និងលើកលែងទោស ព្រមជាមួយតំណាងមកពីក្រសួងមហាផ្ទៃ និងព្រមទាំងគណៈកម្មាធិការវាយតម្លៃជាច្រើន រូបទៀតចូលរួម។
លោក សុច សុផាន់ណារ៉ា ប្រធាននាយកដ្ឋានកិច្ច ការព្រហ្មទណ្ឌនៃក្រសួងយុត្តិធម៌បានបញ្ជាក់ថា ការលើកយកទណ្ឌិតចំនួន៦២៥នាក់ មកធ្វើការពិនិត្យនិង វាយតម្លៃសម្រាប់បន្ធូរបន្ថយទោសនិង លើកលែងទោសនេះមិនមានន័យថា ជាការបន្ធូបន្ថយឬលើកលែងទោសទាំងអស់នោះទេ គឺទុកឱ្យគណៈកម្មធិការពិនិត្យ និងវាយតម្លៃជាមុនសិនថាក្នុងចំណោមនេះមានប៉ុន្មាននាក់ ត្រូវលើកលែងទោសឬត្រូវបន្ធូរបន្ថយទោសបាននោះ។
.jpg)
លោកប្រធាននាយកដ្ឋានកិច្ចការព្រហ្មទណ្ឌនៃក្រសួងយុត្តិធម៌ បានអះអាងថា ការលើកលែងទោសនិងបន្ធូរបន្ថយទោសដល់ទណ្ឌិតទូទាំងប្រទេសកម្ពុជា តែងត្រូវបានធ្វើឡើងបីលើកក្នុងមួយឆ្នាំដែលក្នុងនោះមានបុណ្យចូលឆ្នាំថ្មីវិសាខបូជានិងបុណ្យអុំទូក។លោកបញ្ជាក់ថា សម្រាប់ទណ្ឌិតទាំងនេះមានទាំងប្រព្រឹត្តិបទល្មើសមជ្ឈិមដល់ឧក្រិដ្ឋ ប៉ុន្តែយ៉ាងណាអ្នកទោសដែលត្រូវបានគណៈកម្មាធិការលើកយកមកវាយតម្លៃនេះ ចាំបាច់ត្រូវអនុវត្តទោសយ៉ាងហោចណាស់២ភាគ៣ហើយ ពិសេសមានការអនុវត្តខ្លួនបានល្អនៅពេលជាប់ពន្ធនាគារថែមទៀត។ ទណ្ឌិតដែលមាននៅក្នុងបញ្ជីទាំង៦២៥នាក់ ដែលលើកយកមកធ្វើការពិចារណា នៅពេលនេះ មានទាំងជនជាតិខ្មែរនិងជនបរទេស៕ ដោយ ស.ស្អាត