ភ្នំពេញ៖ រដ្ឋាភិបាលជប៉ុនតាមរយៈស្ថានទូតរបស់ខ្លួនប្រចាំកម្ពុជាបានផ្តល់ជំនួយជិត២សែនដុល្លារអាមេរិកសម្រាប់​​សាងសង់អគារព្យាបាលជម្ងឺទូទៅក្នុងមន្ទីរពេទ្យបង្អែកជើ​ងព្រៃ ខេត្តកំពង់ចាម និងគម្រោងសាង​សង់​មណ្ឌ​ល​​សុខ​ភាព​ឃុនរាម ស្រុកបន្ទាយស្រីខេត្តសៀមរាប។កិច្ចសន្យាផ្តល់ជំនួយ​នេះត្រូវបានចុះហត្ថលេខាកាល​ពី​​រសៀល​​ថ្ងៃ​ទី២៥​ខែវិច្ឆិកា ដោយ លោក គូម៉ាម៉ារ៉ូ យូជិ ឯកអគ្គរាជទូតជវិសាមញ្ញ និងពេញសមត្ថភាពជប៉ុនប្រ​ចាំកម្ពុជា​និង​តំណាង​ស្ថាប័នទទួលជំនួយទាំងពីរ។​

លោក គូម៉ាម៉ារ៉ូ យូជិ បានមានប្រសាសន៍ថា គម្រោងសុខាភិបាលទាំងពីរនេះ នឹងផ្តល់សេវាសុខភាព​ដល់ប្រជាជន​ជាង​២សែននាក់ប្រកបដោយគុណភាព។លោកបានអធិប្បាយបន្ថែមថា គម្រោងទាំងពីរ ត្រូវបានធ្វើឡើង​ស្របតាម​គោល​ការណ៍​ជាមូលដ្ឋាននៃជំនួយរបស់ជប៉ុនសម្រាប់កម្ពុជា និងស្របតាមទស្សនៈនៃការផ្តល់ជំនួយ​ដើម្បីលើក​ស្ទួយ​​សន្តិសុខមនុស្សជាតិសម្រាប់ប្រជាជនងាយរងគ្រោះផងដែរ។

វិស័យសុខាភិបាលគឺជាវិស័យអាទិភាពមួយក្នុងចំណោមវិស័យជាច្រើនទៀតនៃជំនួយរបស់ជប៉ុនសម្រាប់កម្ពុជា ដែល​រដ្ឋាភិបាលជប៉ុនបាននឹងកំពុងអនុវត្តន៍គម្រោងជាច្រើនរួមមានការអភិវឌ្ឍន៍ហេដ្ឋារចនាសម្ព័ន្ធរូបវន្ត និងកិច្ច​សហប្រតិបត្តិការបច្ចេក​ទេស​សជាដើម។លោក ហឿង ថុល ប្រធានការិយាល័យសុខាភិបាល​ស្រុកប្រតិបត្តិជើង​ព្រៃ​បានមានប្រសាសន៍ថា រដ្ឋាភិបាល​និង​ប្រជាជនជប៉ុនតែងយកចិត្តទុកដាក់ក្នុងការ​អភិវឌ្ឍន៍វិស័យសុខាភិបាល​អោយឈានឡើងខ្ពស់សំដៅទៅកាត់បន្ថយអត្រាឈឺ អត្រាស្លាប់របស់ម្តាយនិងទារក អោយនៅកម្រិតទាប។

ចំណែកអ្នកទទួលជំនួយជប៉ុនយកទៅសាងសង់មណ្ឌលសុខភាពឃុនរាម ស្រុកប​ន្ទាយស្រីខេត្តសៀមរាប លោក ស៊ូ ព្រីយ៉ាតូ ប្រធានអង្គការភ្លែនអន្តរជាតិ-កម្ពុជាបានមានប្រសាសន៍ថា គម្រោងនឹងរួមចំណែក​ពង្រឹងសិទ្ធិ​នៃការរស់​រាន​មានជីវិតរបស់កុមារ។

លោកថា ប្រទេសកម្ពុជាបច្ចុប្បន្ននេះមានអត្រាមរណៈកុមារ កម្រិតខ្ពស់ក្នុងចំណោម​បណ្តា​​ប្រទេស កំពុងអភិវឌ្ឍន៍ ដទៃទៀត។យោងតាមផែនការយុទ្ធសាស្ត្រសុខាភិបាល​របស់ប្រទេសកម្ពុជា​ឆ្នាំ​២០០៨​ដល់ឆ្នាំ២០​១​៥ ខេត្ត​សៀម​រាប​​ត្រូវសាងសង់មណ្ឌលសុខភាពចំនួន១០៩ក្នុង១០០ឃុំ​​ ហើ​យមកដ​ល់​បច្ចុប្បន្ន​នេះមាន​មណ្ឌល​សុខភាព​តែចំនួន​៦៩ប៉ុណ្ណោះ។គួរបញ្ជាក់ថា ចាប់តាំងពីឆ្នាំ១៩៩១មក រដ្ឋាភិបាល​ជប៉ុនបានផ្តល់​ថវិកាជាង​៥០.៣លានដុល្លារអាមេរិក​ដល់អាជ្ញាធរមូលដ្ឋាន និងអង្គការក្រៅរដ្ឋាភិបាលដើម្បី​អនុវត្តន៍គម្រោងចំនួន​៥០៣​គម្រោង​​នៅទូទាំងប្រទេស៕ ដោយ៖ រតនា