ភ្នំពេញ៖ ឯកអគ្គរាជទូតនៃប្រទេសកាណាដា ទទួលបន្ទុកក្នុងប្រទេសកម្ពុជា ដែលមាននិវេសនដ្ឋាន នៅប្រចាំ ប្រទេសថៃបានថ្លែង ជំរុញលើកទឹកចិត្ត ឲ្យគណបក្សប្រជាជនកម្ពុជា និងគណបក្សសង្រ្គោះជាតិ ដែលទទួលបានការគាំទ្រពីប្រជាជនតាមរយៈការបោះឆ្នោតកាលពីថ្ងៃទី២៨ខែកក្កដា ឆ្នាំ២០១៣កន្លងទៅនោះ ធ្វើយ៉ាងណា បន្តការចរចាពិភាក្សាគ្នាទៀត ដើម្បីស្វែងរកដំណោះស្រាយ នៃការជាប់គាំងនយោបាយនៅក្នុងប្រទេស ។
.jpg)
លោក ហ្វីលីព ខាលវើត ឯអគ្គរាជទូរកាណាដា បានថ្លែងបែបនេះនៅក្នុងឱកាសជួបសម្តែងការគួរសមជាមួយលោកឧបនាយករដ្ឋមន្រ្តី ស ខេង ជារដ្ឋមន្រ្តី ក្រសួងមហាផ្ទៃ នៅរសៀលថ្ងៃទី២៣ ខែមករា ឆ្នាំ២០១៤ នាទីស្តីការក្រសួង។លោក ហ្វីលីព ខាលវើត បានមានប្រសាសន៍ថា ខ្ញុំនៅតែមានជំនឿចិត្តថា កម្ពុជានឹងស្វែងរកនូវការស្រស់ស្រួលគ្នាជាពិសេសការពិភាក្សាគ្នា ដោយសន្តិវិធី ដើម្បីធ្វើយ៉ាងណាឲ្យ គណបក្សសង្រ្គោះជាតិ ចូលរួមនៅក្នុងដំណើរការរបស់រដ្ឋសភា ហើយការចូលរួមនេះ នឹងផ្តល់ ផលប្រយោជន៍ ដល់ប្រជាជនកម្ពុជា ពិសេសរួមគ្នាអភិវឌ្ឍន៍ជាតិ។
ជាមួយគ្នានោះ ប្រទេសកាណាដា នឹងបន្តផ្តល់ជំនួយដល់កម្ពុជាតទៅទៀត ក្នុងពេលខាងមុខ ដើម្បីចូលរួមចំណែកជួយកម្ពុជាក្នុងការកសាង សមត្ថភាព នគរបាល នៅក្នុងការប្រយុទ្ធប្រឆាំងទៅនឹងការងារឧក្រិដ្ឋកម្មឆ្លងដែន ដូចជា ការជួញដូរមនុស្ស និងអំពើភារវកម្មជាដើម។
មានប្រសាសន៍ឆ្លើយតប ក្នុងឱកាសនោះ លោកឧបនាយករដ្ឋមន្រ្តី ស ខេង បានថ្លែងអំណរគុណ ចំពោះការគាំទ្រ និងជម្រុញឲ្យមានការជួបចរចារគ្នារវាងគណបក្សជាប់ឆ្នោតទាំងពីរដើម្បីផលប្រយោជន៍ជាតិ ព្រមទាំងបានបន្តកិច្ចសហប្រតិបត្តិការ និងផ្តល់ជំនួយសំរាប់កសាងសមត្ថភាពមន្រ្តីនគរបាល លើការប្រយុទ្ធប្រឆាំងការជួញដូរមនុស្សនិង អំពើភារវកម្ម ក្នុងប្រទេស តំបន់ និងពិភពលោក។
ក្នុងនោះដែរលោកឧបនាយករដ្ឋមន្រ្តី ក៏បានជម្រាបជូនពីស្ថានភាពនយោបាយក្រោយពេលបោះឆ្នោត ក៏ដូចជាសកម្មភាពនានាជាច្រើនដែលកម្លាំងនគរបាលជាតិ បានអនុវត្តន៍តាមបទ បញ្ជារបស់រាជរដ្ឋាភិបាល ក្នុងការទប់ស្កាត់នូវរាល់បទល្មើសទាំងឡាយដែលបានកើតមាន ដើម្បីធានាដល់សន្តិសុខ និងសណ្តាប់ធ្នាប់សង្គម ។
ម៉្យាងទៀតកម្លាំងនគរបាលកម្ពុជា ក៏បានចូល ចំណែកសហការជាមួយកម្លាំងប៉ូលីសនៃបណ្តាប្រទេសក្នុងតំបន់ និងពិភពលោក ដើម្បីរក្សាសន្តិសុខនិងចូលរួមទប់ស្កាត់ ការប្រឆាំងនឹងអំពើភារវកម្មនានានៅលើសកលលោកផងដែរ៕ដោយ ៖សស្អាត