ភ្នំពេញ៖ មនុស្ស៥នាក់ រងរបួសធ្ងន់ស្រាល ដោយសារម៉ូតូ២គ្រឿងបានជិះបញ្ជ្រសទិស ខ្វះការប្រុងប្រយ័ត្ន កាលពី​វេលាម៉ោង៨និង៣០នាទី យប់ថ្ងៃទី១៩ ខែមករា ឆ្នាំ២០១៣ ស្ថិតនៅតាម បណ្តោយផ្លូវជាតិ លេខ៤ ក្នុង ភូមិអូរឌឹម សង្កាត់ចោមចៅ ខណ្ឌពោធិ៍សែនជ័យ ។

មន្រ្តីនគរបាលបានឲ្យដឹងថា ម៉ូតូបង្កម៉ាក សេ១២៥ ពណ៌ខ្មៅស៊េរី ឆ្នាំ២០១៣ ពាក់ស្លាកលេខ ភ្នំពេញ 1CA-8950 អ្នក​​បើកបរមានឈ្មោះ ចិត្ត រតនា ភេទប្រុស អាយុ៣១ឆ្នាំ មានមុខរបរ ជាកម្មកររោងចក្រ រងរបួសបែកលើផ្ទៃមុខ និងអ្នករួមដំណើរមាន ឈ្មោះ ប៉េងលី ភេទប្រុស អាយុ៣១ឆ្នាំ មានមុខរបរ ជាកម្មកររោងចក្រ អ្នក ទាំងពីរ ស្នាក់​នៅ​ក្នុង ភូមិអូរឌឹម សង្កាត់ចោមចៅ ខណ្ឌពោធិ៍សែនជ័យ មានស្រុកកំណើត នៅភូមិកំពង់ល្វា ឃុំស៊ីធកណ្តាល ស្រុក​ខ្សាច់កណ្តាល ខេត្កកណ្តាល រីឯម៉ូតូរងគ្រោះម៉ាក ស្មាស់ពណ៌ខ្មៅ ពាក់ស្លាកលេខ កណ្តាល 1M-7167 អ្នកបើក​បរ​មានឈ្មោះ អែល ថា ភេទប្រុស អាយុ២៨ឆ្នាំ មានមុខរបរជាកម្មករ អ្នករួមដំណើរទី១ ឈ្មោះ អឹម វណ្ណៈ ភេទប្រុស អាយុ២៨ឆ្នាំ ជាកម្មករ និងទី២ឈ្មោះ បារាំង ភេទប្រុស អាយុ២៧ឆ្នាំ អ្នកទាំងបី រស់នៅ ភូមិព្រៃរំដួល សង្កាត់សោ្ន ខណ្ឌពោធិ៍សែនជ័យ រងរបួសស្រាល។

នគរបាលបានបន្តថា មុនពេលកើតហេតុគេឃើញ ម៉ូតូជនរងគ្រោះ ជិះគ្នា៣នាក់ក្នុងទិសដៅពីកើតទៅលិចលុះដល់​ចំណុចកើតហេតុ ស្រាប់តែមានម៉ូតូ មួយគ្រឿង ជិះគ្នា២នាក់ បើកពីលិចទៅកើតក្នុងល្បឿនលឿន ក៏ជ្រុលចង្កូត​បុក​គ្នា យ៉ាងពេញទំហឹងបណ្តាលឲ្យ អ្នកជិះម៉ូតូទាំងអស់ខ្ទាត ចេញពីម៉ូតូដេកសន្លប់នៅថ្នល់។ភ្លាមៗនោះនគរបាល មូលដ្ឋានបានចុះទៅដល់ រួចក៏បានហៅរថយន្តសង្គ្រោះរបស់អង្គភាព៧១១នៃកងពលតូចលេខ៧០ដឹកយក​ទៅ​កាន់​​​​មន្ទីរព្រះកុសុមៈហៅមន្ទីរពេទ្យលោកសង្ឃ ដើម្បីជួយ សង្គ្រោះ អាយុជីវិតបន្ទាន់។បច្ចុប្បន្ន ម៉ូតូទាំងពីរគ្រឿង ត្រូវនគរបាល យកទៅរក្សាទុកនៅអធិការដ្ឋាននគរបាល ខណ្ឌពោធិ៍សែនជ័យ ដើម្បីរង់ចាំដោះស្រាយគ្នាជាក្រោយ​ទៅតាមនីតិវិធីច្បាប់៕ ដោយ៖ ភីន​រ៉ា