ភ្នំពេញ៖ ក្រសួងយុត្តិធម៌បាន បើកកិច្ចប្រជុំ មួយក្រោមវត្តមាន តំណាងរបស់អន្តរក្រសួង ដើម្បីត្រួតពិនិត្យសេចក្តីព្រាងច្បាប់ និងការប្រពឹត្តិទៅនៃឧត្តមក្រុមប្រឹក្សានៃអង្គចៅក្រមដែលស្ថិតក្នុងក្របខណ្ឌនៃការអនុវត្តគោលនយោបាយកំណែទម្រង់ច្បាប់ និងតុលាការរបស់រាជរដ្ឋាភិបាល។
នេះជាការខិតខំមួយនៃប្រព័ន្ធយុត្តិធម៌កម្ពុជា ដែលរដ្ឋមន្ត្រីក្រសួងយុត្តិធម៌ លោក អង្គ វង្សវឌ្ឍានា លើកឡើងក្នុងកិច្ចប្រជុំអន្តរក្រសួងនៅព្រឹកនេះថា ជាការពន្លឿនការធ្វើសេចក្តីព្រាងច្បាប់ឱ្យបានឆាប់ ដើម្បីអនុវត្តកាតព្វកិច្ចរបស់ព្រះរាជាណាចក្រកម្ពុជា ក្នុងការចូលរួមជាសមាជិកអង្គការពាណិជ្ជកម្មពិភពលោក និងដើម្បីឆ្លើយតបទៅនឹងស្មារតីនៃរដ្ឋធម្មនុញ្ញ និងដើម្បីពង្រឹងនីតិរដ្ឋឱ្យកាន់តែរឹងមាំថែមទៀត ស្របតាមគោលនយោបាយរបស់រាជរដ្ឋាភិបាលស្តីពីកំណែទម្រង់ច្បាប់ និងតុលាការ និងយោងតាមភាពចាំបាច់ ក្នុងនាមកម្ពុជាជាសមាជិកអាស៊ាន និងជាសមាជិកនៃអង្គការពាណិជ្ជកម្មពិភពលោកផងនោះ កម្ពុជាចាំបាច់ត្រូវតែមានប្រព័ន្ធច្បាប់មួយដែលមានរចនាសម្ព័ន្ធច្បាស់លាស់ ដើម្បីពង្រឹង និងលើកកម្ពស់ឯករាជ្យនៃអំណាចតុលាការ។
សេចក្តីប្រកាសព័ត៌មានរបស់ក្រសួងយុត្តិធម៌បញ្ជាក់ថា ក្រុមប្រឹក្សាការងារក្រសួងយុត្តិធម៌បានពិនិត្យ និងរៀបចំសេចក្តីព្រាងច្បាប់នេះឡើងវិញ តាំងពីខែតុលាឆ្នាំ២០១៣ ស្របតាមគោលនយោបាយរបស់រាជរដ្ឋាភិបាលអាណត្តិទី៥ នៃរដ្ឋសភាដែលបានដាក់សេចក្តីព្រាងច្បាប់នេះជាអាទិភាព ក្នុងការអនុវត្តយុទ្ធសាស្ត្រកំណែទម្រង់ស៊ីជម្រៅនៃប្រព័ន្ធយុត្តិធម៌។ច្បាប់នេះចែងយ៉ាងច្បាស់ថា សមាជិកជ្រើសតាំងនៃឧត្តមក្រុមប្រឹក្សានៃអង្គចៅក្រមត្រូវបានកំណត់រយៈពេល៥ឆ្នាំ ហើយនៅក្នុងអាណត្តិរបស់ខ្លួន ចៅក្រម និងព្រះរាជអាជ្ញាដែលជាសមាជិកជ្រើសតាំង ត្រូវដាក់ឱ្យផ្តាច់ពីមុខងារជាចៅក្រម និងព្រះរាជអាជ្ញានៅតាមសាលាជម្រះក្តី អយ្យការអមសាលាជម្រះក្តី។
ទន្ទឹមនឹងនេះ ដើម្បីធានាការអនុវត្តន៍មុខងាររបស់ខ្លួនឱ្យមានប្រសិទ្ធិភាពខ្ពស់ថែមទៀត ឧត្តមក្រុមប្រឹក្សានៃអង្គចៅក្រមដែលជាស្ថាប័នតំណាងឱ្យអំណាចមួយក្នុងចំណោមអំណាចទាំងបី ក្នុងរដ្ឋធម្មនុញ្ញ មានប្រសិទ្ធិភាព ទទួលបានប្រាក់បំណាច់មុខងារ និងរបបឧបត្ថម្ភនានា៕ ដោយ៖ រតនា