ភ្នំពេញ ៖ លោក ប្រាក់ មិនជា អគ្គលេខាធិការគណៈវិស្វករកម្ពុជា បានជួបពិភាក្សាការងារជាមួយអភិបាលរាជធានីភ្នំពេញ ដើម្បីសុំមតិដឹកនាំក្នុងការរៀបចំគណៈវិស្វកររាជធានីមួយអោយបានល្អប្រសើរឡើង។ ជំនួបនេះធ្វើនៅសាលារាជធានីភ្នំពេញ កាលពីព្រឹកថ្ងៃទី១៦ខែមករា ឆ្នាំ២០១៤នេះលោក ប្រាក់ មិន បានជំរាបជូនលោកប៉ា សុជាតិវង្ស អភិបាលនៃគណអភិបាលរាជធានីភ្នំពេញឲ្យដឹងថា គណៈវិស្វករកម្ពុជា ជាអាជ្ញាធរវិស្វកម្មជាតិដែលបានបង្កើតឡើងដោយរាជរដ្ឋាភិបាលមាន ភារកិច្ចគ្រប់គ្រងនិងធ្វើអោយប្រសើរឡើងនូវធនធានបញ្ញាវ័ន្ត វិស្វកម្មជាតិអោយមានការអភិវឌ្ឍន៍សមត្ថភាព ចំណេះដឹងតាមបែបវិទ្យាសាស្ត្រទំនើប និងបទពិសោធន៍ថ្មីបន្ថែមទៀត ព្រមទាំងបង្កលក្ខណៈសមាហរណកម្មល្អចូលក្នុងតំបន់ និងនាំមកនូវផលប្រយោជន៍ជូនវិស្វករជាតិ បង្កើន និងលើកកម្ពស់ផលប្រយោជន៍សាធារណៈពីចរន្តពាណិជ្ជកម្ម សេវាកម្មវិស្វកម្មឆ្លងដែន ដែលជាផ្នែកមួយដ៏សំខាន់ នៃសេដ្ឋកិច្ចសម័យថ្មី។
.jpg)
ជាមួយគ្នានោះលោក ប៉ា សុជាតិវង្ស អភិបាលនៃគណៈអភិបាលរាជធានីភ្នំពេញបានលើកឡើងថា ការចងក្រងប្រមូលផ្តុំបញ្ញាស្មារតីរបស់វិស្វករកម្ពុជាឲ្យក្លាយជា អង្គភាពជំនាញ១គឺជារឿងចាំបាច់ក្នុងដំណាក់កាលដែលប្រទេសជាតិកំពុង មានការអភិវឌ្ឍន៏ និងត្រូវការធនធានមនុស្ស។ លោកបន្តថា យើងពិតជាមានការសោកស្តាយដែលប្រជាពលរដ្ឋយើងនៅមិនទាន់ផ្តល់ជំនឿ ទុកចិត្តមកលើវិស្វករខ្មែរគ្រប់ជំនាញដែលមានបច្ចុប្បន្ន តែបែរជាឲ្យតំលៃលើវិស្វករបរទេសដែលធ្វើឲ្យជាតិយើងខាតច្រើន។
លោកអភិបាលបន្តថា គណៈវិស្វករកម្ពុជាគួរកុំខំពង្រីកក្បាលឲ្យធំជាងខ្លួនដូចក្បាល ដំរី កន្ទុយកណ្តុរនោះ។ សំខាន់គឺត្រូវធ្វើឲ្យចេញលទ្ធផលជាក់ស្តែង និងធ្វើឲ្យប្រជាពលរដ្ឋមានជំនឿទុកចិត្តមកលើវិស្វករខ្មែរយើង នោះជារឿងសំខាន់។លោកអភិបាលបានសំដែងការស្វាគមន៏ដល់ការរួម សហការរបស់គណៈវិស្វករកម្ពុជាក្នុងការរួមចំណែកអភិវឌ្ឍន៏រាជធានី ភ្នំពេញ។ ក្នុងពេលនោះដែរលោកអភិបាលក៏បានស្វាគមន៏ចំពោះតួនាទីរបស់វិស្វករ កម្ពុជាក្នុងការពង្រឹងធនធាន មនុស្សលើវិស័យនេះ។សូមបញ្ជាក់ថា បច្ចុប្បន្ននេះ គណៈវិស្វករកម្ពុជាមានសមាជិកចំនួន១៦០០ នាក់ និងមានសម្តេចអគ្គមហាសេនាបតីតេជោហ៊ុនសែន ជាប្រធានកិត្តិយស លោកឧបនាយករដ្ឋមន្ត្រីសុខ អាន ជាប្រធានក្រុមប្រឹក្សា៕
ដោយ៖ ស.ស្អាត