ភ្នំពេញ៖ ក្នុងជំនួបពិភាក្សារយៈពេល ៣ ម៉ោង ៣០ នាទី ព្រឹកថ្ងៃទី១៥ ខែមករា ឆ្នាំ២០១៤ នៅវិមានសន្តិភាព រវាងលោក ស៊ូយា ស៊ូប៊ែរឌី និងសម្តេចហ៊ុនសែន ព្រមទាំងថ្នាក់ដឹកនាំជាន់ខ្ពស់រដ្ឋាភិបាលកម្ពុជា គឺសម្តេចហ៊ុនសែន បានស្នើឲ្យលោកស៊ូប៊ែរឌី បញ្ចុះបញ្ចូលគណបក្សសង្គ្រោះជាតិ ឲ្យចូលរួមក្នុងរដ្ឋសភា ដើម្បីប្រជុំដោះស្រាយបញ្ហានយោបាយនៅកម្ពុជា នាពេលសព្វថ្ងៃ។ នេះបើតាមលោក ឱម យ៉ិនទៀង ទេសរដ្ឋមន្ត្រី ដែលបានប្រាប់ពីលទ្ធផលនៃជំនួបប្រជុំដល់ក្រុមអ្នកសារព័ត៌មាន។
លោក ឱម យ៉ិនទៀង បានលើកឡើងថា សម្តេចហ៊ុនសែន បានបញ្ជាក់ទៅកាន់លោកស៊ូប៊ែរឌី ថា រាជរដ្ឋាភិបាល គណបក្សប្រជាជនកម្ពុជានៅតែរក្សាទ្វារចរចាបើកចំហរនិងខិតខំថ្នាក់ថ្នមសភាពការណ៍ដើម្បីចរចាសម្រុះសម្រួលជាមួយគណបក្សសង្គ្រោះជាតិ។ប៉ុន្តែលោកបានព្រមានថាកុំឲ្យតែឈានទៅដល់ថ្នាក់ផ្តួលរំលំនោះរាជរដ្ឋាភិបាលមិនអាចអត់អោនឲ្យបានទេ។លោក ឱម យ៉ិនទៀង បានស្រង់ប្រសាសន៍របស់សម្តេចហ៊ុនសែន ដែលបានប្រាប់លោកស៊ូប៊ែរឌី ថា បញ្ហាទាំងអស់ ទាល់តែគណបក្សសង្គ្រោះជាតិ ចូលរដ្ឋសភា ព្រោះការកែទម្រង់ការបោះឆ្នោត និងការដោះស្រាយបញ្ហានយោបាយ នាពេលសព្វថ្ងៃ គឺត្រូវតែចូលសភា ទើបអាចកែទម្រង់ច្បាប់នានា ហើយត្រូវនិយាយគ្នាក្នុងរដ្ឋសភា។
លោក ឱម យ៉ិនទៀង បានគូសបញ្ជាក់ថា អ្វីដែលលោកស៊ូប៊ែរឌី លើកឡើងជម្រាបសម្តេចហ៊ុនសែន ថាមានអ្វីដែលត្រូវឲ្យលោកជួយបាននោះ? គឺសម្តេចហ៊ុនសែន បានបញ្ជាក់ដោយផ្តាំឲ្យលោកស៊ូប៊ែឌី ប្រាប់ឲ្យគណបក្សសង្គ្រោះជាតិ ចូលសភា ដើម្បីចរចា កែទម្រង់ការបោះឆ្នោតនិងអាចដោះស្រាយបញ្ហាបាន។លោក ឱម យ៉ិនទៀង ក៏បានបន្ថែមថា សម្តេចហ៊ុនសែន ក៏បានប្រាប់លោកស៊ូប៊ែឌី ថា សម្តេចក៏ចង់ឲ្យសភាដែលមានសមាសភាពគណបក្សប្រជាជនកម្ពុជា និងគណបក្សសង្គ្រោះជាតិ សំអាត និងត្រួតពិនិត្យ លើរដ្ឋាភិបាលរបស់សម្តេច ដើម្បីជួយមើល និងកោះហៅរដ្ឋមន្ត្រី ទៅឆ្លើយបំភ្លឺក្នុងរដ្ឋសភាជាដើម។ ដំណោះស្រាយភាពទ័លច្រក ក្នុងបញ្ហានយោបាយនៅកម្ពុជា គឺមានតែគណបក្សសង្គ្រោះជាតិចូលសភាប៉ុណ្ណោះ។អំពីលទ្ធផលនៃកិច្ចប្រជុំពិភាក្សាដោយ បិទទ្វារ រវាងសម្តេចហ៊ុនសែន និងលោកស៊ូប៊ែរឌី នៅព្រឹកមិញនេះគឺលោក ស៊ូប៊ែរឌី បានលើកឡើង៥ចំណុច រួមមាន៖ ទី១-មើលស្ថានការណ៍សិទ្ធិមនុស្ស នៅកម្ពុជាទី២-តាមដានអនុសាសន៍របស់លោក កន្លងមក ថាតើរដ្ឋាភិបាល ទទួលយកចំនុចណាខ្លះ ឬក៏មិនទទួលយកចំណុចណាខ្លះ ទី៣-ចង់ដឹងពីការកែទម្រង់ធំៗ របស់រដ្ឋាភិបាល ដូចជា ប្រព័ន្ធតុលាការ សភា ទី៤-ស្វែងយល់ពីជំហររបស់រដ្ឋាភិបាល ពាក់ព័ន្ធនឹងការបង្កើតស្ថាប័នថ្នាក់ជាតិ ដែលទទួលបន្ទុកសិទ្ធិមនុស្ស និងទី៥-ការបារម្ភខ្លះរបស់លោកលើបច្ចុប្បន្នភាពកម្ពុជា។ក្នុងកិច្ចប្រជុំសម្តេច ហ៊ុនសែន ក៏បានប្រាប់ពីលទ្ធផលនៃកំណែទម្រង់ជាច្រើនរបស់រាជរដ្ឋាភិបាលដូចជាកំណែទម្រង់តុលាការ ដែលនៅត្រីមាសទី១ ក្នុងឆ្នាំ២០១៤ មានពង្រាងច្បាប់ ៣ពាក់ព័ន្ធនឹងតុលាការនឹងអាចយកមកដាក់នៅគណៈរដ្ឋមន្ត្រី រួមមាន សេចក្តីព្រាងច្បាប់លក្ខន្តិកៈអង្គចៅក្រមការរៀបចំ និងការប្រព្រឹត្តទៅរបស់តុលាការ រួមទាំងវិសោធនកម្មលើច្បាប់ឧត្តមក្រុមប្រឹក្សាអង្គចៅក្រម ជាដើម។ក្នុងនោះ សម្តេចហ៊ុនសែន ក៏បានប្រាប់លោកស៊ូប៊ែរឌី អំពីគម្រោងបង្កើតតុលាការសាលាឧទ្ធរណ៍ច្រើនទៀត តាមខេត្ត តុលាការការងារ និងតុលាការពាណិជ្ជកម្ម ជាដើម។ រីឯកំណែទម្រង់លើការងារបោះឆ្នោតវិញគឺលោកឱមយ៉ិនទៀង បានអះអាងថា មិនត្រឹមតែកែទម្រង់លើគជបទេ តែជាការកែទម្រង់ទូលំទូលាយដូចជា ពេលវេលា របៀបចុះឈ្មោះ ជាដើម ដើម្បីកុំឲ្យមានរឿងរ៉ាវកើតឡើងរៀងរាល់ពេលបោះឆ្នោត ៥ ឆ្នាំម្តង តទៅទៀត។អំពីការចាប់ ឃុំខ្លួនបាតុករ ២៣ នាក់ រួមទាំងលោកវនពៅ ត្រូវបានលោក ឱម យ៉ិនទៀង អះអាងថា លោកស៊ូប៊ែឌី បានជម្រាបជូនសម្តេចហ៊ុនសែន អំពីលទ្ធភាពនៃការធានាអ្នកទាំងនោះ ឲ្យនៅក្រៅឃុំជាបណ្តោះអាសន្ន ដោយតម្កល់ប្រាក់នោះ គឺសម្តេចហ៊ុនសែន បានតបទៅវិញថាជារឿងរបស់រដ្ឋមន្ត្រីក្រសួងយុត្តិធម៌និងក្រសួងមហាផ្ទៃ។
អំពីការប្រើប្រាស់កងកម្លាំងប្រដាប់អាវុធ លើការបង្ក្រាបបាតុកម្ម កាលពីថ្ងៃទី២ និងថ្ងៃទី៣មករា កន្លងមកក៏ត្រូវបានលោក ស៊ូប៊ែឌី លើកឡើងផងដែរ ហើយបានស្នើឲ្យរដ្ឋាភិបាល ប្រើប្រាស់នៅពេលចាំបាច់ សមរម្យ និងសមាមាត្រ ហើយចាត់វិធានការឲ្យអស់លទ្ធភាព មុននឹងប្រើប្រាស់កម្លាំងប្រដាប់អាវុធទៅបង្ក្រាបបាតុកម្មជាដើម។
ចំណុចនេះ ត្រូវបានលោក ឱម យ៉ិនទៀង លើកឡើងថា សម្តេចហ៊ុនសែន បានប្រសាសន៍ថា កម្លាំងរបស់យើង នៅថ្ងៃទី២ ថ្ងៃទី៣ និងថ្ងៃទី៤ ខែមករា ឆ្នាំ២០១៤ កន្លងមក គឺជាការប្រើកម្លាំងដើម្បីទទួលខុសត្រូវលើបញ្ហាសណ្តាប់ធ្នាប់ ហើយយើងធ្វើដូចជាគោលការណ៍ ជាទ្រឹស្តី ដែលបានលើកដូច្នោះដែរ។ចុងក្រោយ លោក ឱម យ៉ិនទៀង បង្ហាញថា ជំនួបរវាងសម្តេចហ៊ុនសែន និងលោកស៊ូប៊ែរឌី រយៈពេល ៣ម៉ោងកន្លះ នៅព្រឹកមិញ ជាជំនួបមួយ ដែលនិយាយគ្នាត្រង់ៗ ហើយស្និទ្ធស្នាល ហើយមានផលប្រយោជន៍ច្រើន។
គួររំលឹកថា លោក ស៊ូប៊ែឌី មកបំពេញទស្សនកិច្ចនៅកម្ពុជា ចាប់ពីថ្ងៃទី១២ មករា ដល់ថ្ងៃទី១៧ ខែមករាឆ្នាំ២០១៤។ក្នុងដំណើរទស្សនកិច្ចលើកនេះ លោកស៊ូប៊ែរឌី បានជួបជាមួយសហគមន៍ជម្លោះដីធ្លី សហជីពកម្មករ អង្គការសិទ្ធិមនុស្ស មន្ត្រីជាន់ខ្ពស់រដ្ឋាភិបាល ជួបសម្តេចហ៊ុនសែន និងថ្នាក់ដឹកនាំគណបក្សនយោបាយប្រឆាំងជាដើម។ លោក ស៊ូប៊ែឌី នឹងធ្វើសន្និសីទកាសែត បញ្ចប់ដំណើរទស្សនកិច្ចរបស់លោក នៅម៉ោង ១ និង ៣០ នាទី រសៀលថ្ងៃទី១៦ ខែមករា ឆ្នាំ២០១៤ នៅការិយាល័យឧត្តមស្នងការអង្គការសហប្រជាជាតិ ប្រចាំកម្ពុជា ៕ ដោយ៖ សស្អាត