ភ្នំពេញ៖មេដឹកនាំគណបក្សសង្គ្រោះជាតិគ្រោងនឹងប្តឹងគណៈកម្មាធិការជាតិរៀបចំការបោះឆ្នោតទៅតុលាការនូវភាពមិនប្រក្រតីទាំងឡាយ ដែលបានកើតឡើងនៅក្នុងការបោះឆ្នោតជ្រើសតាំងតំណាងរាស្រ្ត និតិកាលទី៥នេះ។នេះបើតាមការលើកឡើងរបស់អនុប្រធានគណបក្សនៅថ្ងៃទី២៦ខែសីហាឆ្នាំ២០១៣ ក្នុងសន្និសីទកាសែតមួយនាទីស្នាក់ការកណ្តាលស្ថិតក្នុងសង្កាត់ចាក់អង្រែខណ្ឌមានជ័យ រាជធានី ភ្នំពេញ។
លោក កឹម សុខា អនុប្រធានគណបក្សសង្រ្គោះជាតិព្រមានថានឹងប្តឹងទៅតុលាការក្នុងករណីគណៈកម្មាធិការជាតិរៀបចំការបោះឆ្នោត (គ.ជ.ប.) ពុំមានភាពប្រក្រតីក្នុងការរកដំណោះស្រាយ។ ដោយគណបក្សរបស់លោកបានរកឃើញភាពមិនប្រក្រតីធ្ងន់ធ្ងរនៅពេលត្រួតពិនិត្យផ្ទៀងផ្ទាត់កញ្ចប់សុវត្ថិភាព“ក”កាលពីពេលថ្មីៗកន្លងទៅនេះ។
លោក កឹម សុខា បានចាត់ទុកសំដីរបស់លោកថាជាការផ្ញើសារទៅគ.ជ.ប. ជាពិសេសមេដឹកនាំគ.ជ.ប.ទាំងនោះ ដោយលោកលើកឡើងថាយើងអត់ឈប់ទេហើយយើងនឹងប្តឹងអស់លោកតទៅទៀតតាមផ្លូវតុលាការជាការរំលោភលើសិទ្ធិរបស់ប្រជាពលរដ្ឋក្នុងការបាត់ឈ្មោះនិងអ្វីៗផ្សេងៗទៀតយើងប្តឹងតុលាការជាតិហើយក៏យើងពិនិត្យតាមផ្លូវច្បាប់អន្តរជាតិនិងរកមេធាវីបន្តទៀតដែរ។
ពាក់ព័ន្ធនឹងករណីលើកឡើងរបស់មេដឹកនាំបក្សប្រឆាំងខាងលើនេះ លោកទេពនីថាអគ្គលេខាធិការគណៈកម្មាធិការជាតិរៀបចំការបោះឆ្នោត(គ.ជ.ប)បានឲ្យដឹងថានេះគឺជាសិទ្ធិរបស់គាត់ប៉ុន្តែគ.ជ.ប. ធ្វើអ្វីៗទៅតាមច្បាប់បោះឆ្នោតតែប៉ុណ្ណោះមិនបានធ្វើអ្វីខុសពីច្បាប់កំណត់ឡើយ។ លោកបន្តថានេះជារឿងធម្មតាទេព្រោះថាប្រទេសរបស់យើងមានលទ្ធិប្រជាធិបតេយ្យ។ករណីគណបក្សណាយល់ឃើញថាស្ថាប័នឬ អ្នកណាធ្វើអ្វីមិនត្រឹមត្រូវគាត់មានសិទ្ធិគ្រប់គ្រាន់អាចប្តឹងបាន ចំណែកគ.ជ.ប.ដូចជាមិនមានបញ្ហាអ្វីនោះទេ។
លោក ទេព នីថា បញ្ជាក់ថា នៅក្នុងនីតិវិធីច្បាប់បើថាមន្រ្តីគ.ជ.ប. ធ្វើខុសឲ្យប្តឹងទៅថ្នាក់លើរបស់គ.ជ.ប. ហើយបើប្តឹងគ.ជ.ប. ឲ្យប្តឹងទៅរដ្ឋសភាប៉ុន្តែនេះគាត់ប្តឹងទៅតុលាការក៏តាមតែគាត់គិតទៅចុះ។
សូមរំលឹកថាក្រោយការបោះឆ្នោតថ្នាក់ជាតិបានប្រព្រឹត្តទៅកាលពីថ្ងៃទី២៨ខែកក្កដាឆ្នាំ២០១៣រួចមកនោះគណបក្សសង្រ្គោះជាតិបានប្តឹងទៅគ.ជ.ប.មាន១៥ករណីលើភាពមិនប្រក្រតីក្នុងថ្ងៃបោះឆ្នោត ជាមួយគ្នានោះគ.ជ.ប.ក៏បានធ្វើការដោះស្រាយជាបន្តបន្ទាប់ ប៉ុន្តែការដោះស្រាយនោះត្រូវបានបក្សប្រឆាំងអះអាងថាគ.ជ.ប.ដោះស្រាយដោយគ្មានតម្លាភាព និងមិនយុត្តិធម៌៕
ដោយ ៖ សស្អាត