ភ្នំពេញ៖ ដើម្បីដោះពន្លត់ស្ថានភាពមន្ទិលសៅហ្មងនៅក្រោយការបោះឆ្នោត តំណាងអង្គការខុនរ៉ាដអាដិនណៅអែរប្រចាំនៅប្រទេសកម្ពុជានិងជាម្ចាស់ជំនួយក្នុងការបណ្តុះបណ្តាលលើផ្នែកសារព័ត៌មាន បានស្នើឲ្យមានការកែទម្រង់ទៅលើប្រព័ន្ធសារព័ត៌មាននៅកម្ពុជាទាំងលើទិដ្ឋភាពច្បាប់និងការផ្សព្វផ្សាយឲ្យកាន់តែតម្លាភាពក្នុងចំណោមគណបក្សនយោបាយ។ការស្នើនេះត្រូវបានលោកដេនីសស្ក្រេតំណាងមូលនិធិខុនរ៉ាដអាដិនណៅអែរលើកឡើងនៅក្នុងវេទិកាអ្នកនិពន្ធសារព័ត៌មានក្រោមប្រធានបទ សម្លឹងមើលប្រទេសកម្ពុជានៅក្នុងរយៈពេលប្រាំឆ្នាំខាងមុខក្រោមការដឹកនាំនៃរដ្ឋាភិបាលថ្មីនៅព្រឹកថ្ងៃទី៣០ខែកញ្ញាឆ្នាំ២០១៣នេះនៅសណ្ឋាគារសាន់វេ។
.jpg)
លោកដេនីសស្ក្រេតំណាងមូលនិធិខុនរ៉ាដអាដិនណៅអែរបានលើកឡើងបន្តទៀតថាលោកបានកត់សម្គាល់ឃើញសេរីភាពនៅក្នុងការបញ្ចេញមតិតាមសារព័ត៌មានសង្គមនៅមានកម្រិត មានន័យថាមិនទាន់មានតម្លាភាព ស្មើភាពគ្នារវាងបក្សនយោបាយ។ប៉ុន្តែមានកិច្ចការជាច្រើនដែលសារព័តឿមានត្រូវធ្វើចាប់ពីពេលនេះតទៅមុខពិសេសក្នុងរយៈពេល៥ឆ្នាំ នៃអាណត្តិរាជរដ្ឋាភិបាលថ្មី ដែលមានការអះអាងថានឹងមានកំណែទម្រង់ស៊ីជម្រៅក្រោមការដឹកនាំរបស់ សម្តេចតេជោ ហ៊ុន សែននាយករដ្ឋមន្រ្តី។លោកតំណាងខុនរ៉ាដ អាដិនណៅអ៊ែ បានស្នើឲ្យមានការផ្សព្វផ្សាយព័ត៌មានកាន់តែស្មើភាពរវាងគណបក្សនយោបាយនៅក្នុងប្រទេសកម្ពុជាដែលមានអាសនៈនៅក្នុងរដ្ឋសភាអំពីភាពចាំបាច់នៅក្នុងការឲ្យមានសារព័ត៌មានសាធារណៈដើម្បីបម្រើសង្គមកម្ពុជា។
.jpg)
លោក ប៉ែន សមិទ្ធិ ប្រធានក្លឹបអ្នកកាសែតកម្ពុជា(ក.អ.ក)បានលើកឡើងថា ដោយមានការគាំទ្រពីមូលនិធិខុនរ៉ាដអាដិនណៅអ៊ែរក្លឹបបានរៀបចំវេទិកាពិភាក្សានេះឡើងក្នុងគោលបំណងអោយអ្នកសារព័ត៌មានទទួលបាននូវទស្សនៈវិស័យមួយចំនួនទាក់ទងនឹងការដឹកនាំរបស់រាជរដ្ឋាភិបាលថ្មីនារយៈពេល៥ឆ្នាំខាងមុខសំខាន់កំណែទម្រង់ស៊ីជម្រៅសំដៅឲ្យមានយុត្តិធម៌នៅក្នុងសង្គមកម្ពុជា។ជាមួយគ្នានេះក៏មានការពិភាក្សាទៅលើបរិបថដែលមានសារៈសំខាន់ៗជាច្រើនរបស់វាគ្មិនមានភាពជោគជ័យលើវិស័យសារព័ត៌មាននេះ ដូចជា លោកពុយគាអ្នកឆ្លើយឆ្លងសារព័ត៌មានក្យូដូ, លោកប៉ែនបូណានិពន្ធនាយកវិទ្យុបារាំងអន្តរជាតិភាសាខ្មែរនិងលោកកៃគឹមសុងនិពន្ធនាយកកាសែតភ្នំពេញបុស្តិ៍ភាសាខ្មែរព្រមទាំងអ្នកសម្របសម្រួលមានបទពិសោធន៍ច្រើនឆ្នាំគឺលោកប៉ែនសមិទ្ធិប្រធានក្លឹបអ្នកកាសែតកម្ពុជា។សូមបញ្ជាក់ថា មូលនិធិខុនរ៉ាដអាដិនណៅអ៊ែររបស់ប្រទេសអាល្លឺម៉ង់ប្រចាំកម្ពុជានៅតែបន្តការងាររបស់ខ្លួនលើផ្នែកសារព័ត៌មាននៅកម្ពុជា និងជម្រុញឲ្យមានការបង្កើនចំនួននៃការបណ្តុះបណ្តាល ដល់សិស្សនិស្សិតលើផ្នែកសារព័ត៌មាននេះឲ្យមានកាន់តែច្រើនថែមទៀត ដើម្បីឲ្យមានការការកែទម្រង់ទៅលើប្រព័ន្ធសារព័ត៌មាននៅកម្ពុជាទាំងលើទិដ្ឋភាពច្បាប់និងការផ្សព្វផ្សាយលើភាពស្មើគ្នាក្នុងសង្គមកម្ពុជា៕ដោយ៖ ស.ស្អាត