ភ្នំពេញ៖ ថ្លែងក្នុងពិធីបើកការដ្ឋានគម្រោងសាងសង់ស្ពានជ្រៃធំ-ឡុងប៊ិញ ក្នុងស្រុកកោះធំ ខេត្តកណ្តាល ជាប់ព្រំដែនកម្ពុជា-វៀតណាម កាលពីព្រឹកថ្ងៃទី១៤ ខែមករា ឆ្នាំ២០១៤ សម្តេចនាយករដ្ឋមន្ត្រី ហ៊ុន សែន បានប្រកាសថា ការទាមទារឡើងប្រាក់ខែកម្មកររោងចក្រកាត់ដេរ រហូតដល់ ១៦០ ដុល្លារ នៅពេលនេះ គឺមិនអាចទៅរួចទេ។
សម្តេចតេជោ ហ៊ុន សែន បន្តថា ការតម្លើងប្រាក់ខែកម្មករ ត្រូវធ្វើទៅតាមលទ្ធភាព ហើយកម្ពុជា បើធៀបនឹងឥណ្ឌា និងបង់ក្លាដេស គឺប្រាក់ខែកម្មករកម្ពុជា ឡើងខ្ពស់ជាង ដោយលោក ហ៊ុន សែន បានប្រៀបធៀបកម្មកររោងចក្រ នៅវៀតណាម មានប្រាក់ខែជាមធ្យមតែជាង ២ លានដុង ដែលស្មើប្រមាណ ១០០ ដុល្លារអាមេរិក ចំណែកប្រាក់ខែកម្មករកម្ពុជាយើងសព្វថ្ងៃ ទទួលបាន ១០០ ដុល្លារ គឺច្រើនជាងឥណ្ឌា និងបង់ក្លាដេស។
សម្តេច ហ៊ុន សែន បានបញ្ជាក់ថា យើងនឹងឡើងប្រាក់ខែកម្មកររោងចក្រ តទៅទៀត តែមិនមែនឡើងគំហុក តាមការទាមទារ ដល់ ១៦០ ដុល្លារនោះទេ។ ការឡើងប្រាក់ខែកម្មករដូច្នេះ មិនអាចទៅរួចទេ។ ការតម្លើងប្រាក់ខែកម្មករ គឺអាស្រ័យតាមលទ្ធភាព។
ទន្ទឹមនឹងនោះដែរ សម្តេចតេជោ ក៏បានលើកឡើងពីសម្រែករបស់ក្រុមបក្សប្រឆាំង ដែលទាមទារឲ្យសម្តេចចុះចេញពីតំណែង ក្នុងរយៈពេលប៉ុន្មានខែ ចុងក្រោយនេះ ។ ប៉ុន្តែជាថ្មីម្តងទៀត សម្តេចបានគូសបញ្ជាក់ថា សម្តេចមិនអាចចុះចេញពីតំណែងនាយករដ្ឋមន្ត្រី ដូចការទាមទាររបស់បក្សប្រឆាំងបានទេ ។ សម្តេចជានាយករដ្ឋមន្ត្រី ស្របច្បាប់ ។ សម្តេចឡើងតាមរដ្ឋធម្មនុញ្ញ ហើយបើចុះ ក៏ចុះតាមរដ្ឋធម្មនុញ្ញ ។ ដូច្នេះ ការទាមទារឲ្យសម្តេចចុះចេញពីតំណែងនោះ មិនអាចទៅរួចទេ ។
គួរបញ្ជាក់ថា ស្ពានជ្រៃធំដែលត្រូវសាងសង់នេះ មានប្រវែង៤២៨ម៉ែត្រ ចំណាយថវិកាសាងសង់ សរុប៣៨,៣៩លានដុល្លារក្នុងនោះ ថវិកាចំនួន២០,៥៩លានដុល្លារ បានមកពីកម្ចីសម្បទានពីសាធារណរដ្ឋសង្គមនិយមវៀតណាម ថវិកា ១៧,៨៣លានដុល្លាររបស់រដ្ឋាភិបាល នៃសាធារណរដ្ឋសង្គមនិយមវៀតណាម និងថវិកា ១,៨៣លានដុល្លារ ជាថវិកាបដិភាគរបស់រាជរដ្ឋាភិបាលកម្ពុជា ៕ ដោយ៖ ភីន រ៉ា