ភ្នំពេញ៖ សកម្មជនតំណាងស្រ្តីអ្នកភូមិបឹងកក់ចំនួន៥នាក់នៅព្រឹកថ្ងៃទី៦ មករា ២០១៤នេះ ត្រូវបានសមត្ថកិច្ចចាប់ ខ្លួន ខណៈដែលស្រ្តីទំាងនោះកំពុងប្រមូលផ្តុំគ្នាបំណងដង្ហែក្បួនតវ៉ាទៅដាក់ញាតិ្តនៅស្ថានទូតបារំាង ក្បែរមន្ទីរពេទ្យ កាល់ម៉ែត្រ ក្នុងសង្កាត់ ស្រះចក ខណ្ឌដូនពេញ ដើម្បីទាមទារឲ្យមានការដោះលែងសកម្មជនសិទ្ធិមនុស្សដែលត្រូវបានចាប់ខ្លួននាពេលកន្លងមក។
សកម្មជនដីធ្លីទាំង៥នាក់នោះ ដែលត្រូវបានសមត្ថកិច្ចចាប់ខ្លួននោះរួមមាន៖ទី១ អ្នកស្រី ទេព វន្នី ទី២ អ្នកស្រី យ៉ោម បុប្ផា ទី៣ អ្នកស្រី បូ ឆវី ទី៤ អ្នកស្រី ផាន់ ឈុនរ៉េត និងទី៥អ្នកស្រី សុង ស្រីលាភ។ ក្រោយឃាត់ខ្លួនសកម្មជនដីធ្លីទាំង៥នាក់ រួចបញ្ជូនទៅឃុំខ្លួននៅស្នងការដ្ឋាននគរបាលរាជធានីភ្នំពេញ ដោយបក្ខពួកផ្សេងទៀត បានរត់គេខ្លួនបាត់អស់។គួរបញ្ជាក់ថា នៅដើមឆ្នាំ២០១៤នេះ យ៉ាងហោចណាស់ កម្មករ៥នាក់ បានស្លាប់ រីឯសកម្មជនសិទ្ធិមនុស្ស និងសកម្មជនដីធ្លីជាង២០នាក់ត្រូវចាប់ឃុំខ្លួនដោយសារពួកគេតវ៉ា៕ ដោយ៖ ភីនរ៉ា