ភ្នំពេញ៖ នៅឆ្នាំ២០១៣ ផុតទៅនេះ កម្ពុជាទទួលបានបរិមាណផលត្រីសរុបលើសឆ្នាំមុនជាង១៥% ដោយសារទឹកទន្លេហក់ឡើងខ្ពស់ ហើយប្រជាកសិករនិយមចិញ្ចឹមត្រីច្រើននៅតាមស្រះធម្មជាតិ និងនៅក្នុងស្រែ។លោក ណៅ ធួក ប្រតិភូរាជរដ្ឋាភិបាលទទួលបន្ទុកជាប្រធានរដ្ឋបាលជលផលនៃក្រសួងកសិកម្មរុក្ខាប្រមាញ់និងនេសាទបានប្រាប់ឲ្យដឹងថា បរិមាណផលត្រីប្រចាំឆ្នាំ២០១៣នេះបានកើនឡើងជាងឆ្នាំ មុនរហូតដល់ជាង១០០ពាន់តោន។
លោកបន្តថា តាមការវាយតម្លៃចំនួននេះបានកើនឡើងក្នុងអត្រា១៥ ភាគរយ ក្នុងនោះត្រីទឹកសាបមានចំនួនជាង៥៨០ពាន់តោន ត្រីទឹកប្រៃមានចំនួន១០០ពាន់តោន និងត្រី ចិញ្ចឹមចំនួន៨០ពាន់តោន ប៉ុន្តែបើធៀបនឹងឆ្នាំ២០១២វិញ ត្រីទឹកសាបមានចំនួនតែ ៥០៩ពាន់តោន ត្រីទឹក ប្រៃ ចំនួន៩៥ពាន់តោន និងត្រីចិញ្ចឹមចំនួនជាង២ពាន់តោន។
លោក ណៅ ធួក បានបញ្ជាក់ថា ការកើនឡើងបរិមាណ ផលត្រីទឹកសាបដ៏ច្រើននេះ ដោយសារតែទឹកទន្លេឡើងធំធ្វើឲ្យត្រីអាចចរាណ៍ទៅមកបានយ៉ាងងាយស្រួលក្នុងការស្វែងរកចំណី ហើយក៏ជាលទ្ធផលនៃកិច្ចខិតខំប្រឹងប្រែងរបស់មន្ត្រីរដ្ឋាភិបាលក្នុងអនុវត្តច្បាប់ចុះបង្ក្រាបបទល្មើសនេសាទ និងលែងកូនត្រីពូជជាច្រើនលានក្បាលទៅក្នុងបឹង ទន្លេធម្មជាតិ និងក្នុងតំបន់អភិរក្ស ដែនជម្រកត្រីពូជក្នុងរដូវបិទឡូត៍នេសាទរួមទាំងការចូលរួមជួយការពារពីសហគមន៍នេសាទផងដែរ។ ម្យ៉ាងវិញទៀត ប្រជាកសិករកាន់តែមានចំនួនច្រើនងាកមកចិញ្ចឹមត្រីតាមលក្ខណៈគ្រួសារ និងលក្ខណៈធ្វើអាជីវកម្ម ដើម្បីចូលរួមបំពេញតម្រូវការហូបចុករបស់ប្រជាពលរដ្ឋ។
លោកបានអះអាងថា ចាប់ពីថ្ងៃទី8 ដល់ថ្ងៃទី15ខែមករាខាងមុខនេះ ប្រសិនបើអាកាសធាតុល្អ មេឃគ្មានភ្លៀងកក់ខែ និងទឹកទន្លេមគង្គស្រក់ទៅវិញ ត្រីអាចត្រូវច្រើនចន្លោះពី១ម៉ឺន៥ពាន់តោនទៅ២ម៉ឺនតោន។តាមរយៈនេះលោក ណៅ ធួក បានអំពាវនាវដល់ប្រជាពលរដ្ឋទាំងអស់នៅទូទាំងប្រទេសដែលមានបំណងធ្វើប្រផុកផ្អកត្រីឆ្អើសូមត្រៀមសំភារៈឲ្យបានគ្រប់គ្រាន់ដោយត្រីមិនខ្វះទេ ហើយមាន តម្លៃថោកទៀតផង ពោលចន្លោះពី5រយរៀលដល់១ពាន់រៀលប៉ុណ្ណោះ។
សូមបញ្ជាក់ថា បើតាមការព្យាករណ៍ពីរដ្ឋបាលជលផល ដោយសារឆ្នាំនេះទឹកទន្លេឡើងខ្ពស់នៅខែកុម្ភៈគឺចាប់ពី
ថ្ងៃទី១១ដល់ថ្ងៃទី១៥ ត្រីនឹងត្រូវម្តងទៀត ដូច្នេះប្រជាពលរដ្ឋដែលខកខានមិនបានធ្វើប្រហុក ផ្អក ឬត្រីឆ្អើ ក៏មានឱកាសធ្វើនៅថ្ងៃនោះដែរដើម្បីទុកជាស្បៀងបំរុងទុកសម្រាប់ផ្គត់ផ្គត់ដល់ការហូបចុកប្រចាំថ្ងៃបានមួយផ្នែកធំ៕ ដោយ៖ ភីនរ៉ា