ភ្នំពេញ៖ កោះកុង មានតំបន់ទេសចរណ៍ជាច្រើន ដែលប្រជាពលរដ្ឋនៅក្នុងខេត្តនេះ និងមកពីខេត្តក្រុងផ្សេងៗទៀតនិយមទៅលេងកម្សាន្ត។ តំបន់ទេសចរណ៍ទាំងនោះមានដូចជា រមណីយដ្ឋានព្រៃកោងកាង បាងកាយ៉ាក ឃុំពាមក្រសោប ទឹកជ្រោះតាតៃ ទឹកជ្រោះតាប៉ន និងតំបន់ច្រកទ្វារអន្តរជាតិកម្ពុជាថៃ ចាំយាម។
.jpg)
បាងកាយ៉ាក ជាតំបន់ទេសចរណ៍ធម្មជាតិឆ្នេរសមុទ្រនៃព្រៃកោងកាង ដែលស្ថិតនៅក្នុងឃុំ ពាមក្រសោប ស្រុកមណ្ឌលសីមា ខេត្តកោះកុង និងមានផ្ទះសំណាក់លម្ហែកាយតាមរបៀបម៉ូតែល ដោយផ្ទះនីមួយៗនៅដាច់ពីគ្នា ខ្លះមានបន្ទប់មួយ ខ្លះមានពីរបន្ទប់ សង់ឡើងនៅលើផ្ទៃទឹក តាមចន្លោះដើមកោងកាង និងមានបំពាក់ដោយម៉ាស៊ីនត្រជាក់ ទូទឹកកកទៀតផង។ ប៉ុន្តែអ្វីដែលទាក់ទាញជាងនេះ នៅពេលរាត្រីចូលមកដល់ ពិសេសនៅរដូវប្រាំង ភ្ញៀវទេសចរទាំងឡាយដែលភាគច្រើនជាជនបរទេស ក្រៅពីទស្សនានៅពេលថ្ងៃរួចហើយនោះ នៅពេលរាត្រី គេបាននាំគ្នាជិះទូកកាត់ព្រៃកោងកាងមើលពន្លឺអំពិលអំពែកហាក់បី ដូចហ្វូងតារារយពាន់នៅលើមេឃ ដែលទិដ្ឋភាពបែបនេះកម្របានឃើញវាណាស់ ពោលគឺមាននៅតែបាងកាយ៉ាកមួយគត់ ។
រមណីយដ្ឋានព្រៃកោងកាងនៅ ជាប់គ្នានឹងផ្ទះសំណាក់លម្ហែបាងកាយ៉ាក នៅទីនោះគេបានធ្វើស្ពានថ្មើរជើង បេតុងតូចមួយប្រវែង១ ០០០ ម៉ែត្រ ដែលអាចឲ្យភ្ញៀវនាំយើងដើរទស្សនាតំបន់ទេសចរណ៍ធម្មជាតិបឹងកាយ៉ាក បានទាំងមូល។ តាមដងស្ពានយើងបានឮសំឡេងបក្សាបក្សីស្រែកខ្ញៀវខ្ញារ លាយឡំនឹងសំឡេងសត្វស្វាលោតចុះលោតឡើង និងទស្សនាកូនក្តាម ខ្យង វាររវើកក្រោមឫសកោងកាង និងកូនត្រីសមុទ្រហែលប្រដេញគ្នាលេង។ មានកន្លែងសម្រាកកម្សាន្តរាប់សិបត្រូវបានសាងសង់ប្របតាមស្ពានថ្ម ថ្មើរជើងទំហំមួយម៉ែត្រដែលអាចឲ្យភ្ញៀវទេសចរសម្រាកស្រូបយក ខ្យល់អាកាសបរិសុទ្ធ និង មើលសត្វព្រៃនានា។ នៅឯចុងស្ពានមានស្ពានយោលមួយដែលចម្លងភ្ញៀវទៅដល់ប៉មមួយទៀត មានកម្ពស់ដប់ប្រាំម៉ែត្រ សម្រាប់ទស្សនាសម្រស់ធម្មជាតិព្រៃកោងកាង និងស្ពានក្នុងព្រៃកោងកាង ព្រមទាំងដងអូរនានា ។
.jpg)
ទឹកជ្រោះតាប៉នដែលស្ថិតនៅតាមដងផ្លូវជាតិលេខ ៤៨ មានចម្ងាយជាង ៥គីឡូម៉ែត្រពីទីប្រជុំជនក្រុងខេមរភូមិន្ទ ទីនោះជាអតីតតំបន់ដាំកញ្ឆា មានឈ្មោះពិត តាម៉ាន ។ នៅក្រោយទសវត្សរ៍ឆ្នាំ១៩៨០ មានមន្ត្រីយោធាម្នាក់ឈ្មោះ ចុង ប៉ន ចាប់យកធ្វើជាកម្មសិទ្ធិ ហើយបានសាងសង់ផ្លូវជាតិលេខ ៤៨ ដែលធ្វើឆ្លងកាត់ត្រង់ចំណុចនោះ ក៏រៀបចំអភិវឌ្ឍធ្វើជាកន្លែងងូតទឹកកម្សាន្ត។ បច្ចុប្បន្នទីនោះក៏ទទួលបានការពេញនិយមខ្លាំងណាស់ដែរ ទាំងភ្ញៀវជាតិ និងអន្តរជាតិ។
រមណីយដ្ឋានធម្មជាតិ តាតៃ ស្ថិតនៅភាគខាងកើតទីប្រជុំជនខេត្តក្រុងកោះកុង និងភាគខាងត្បូងភ្នំក្រវាញ ហើយទីនោះក៏ជាចំណុចកណ្ដាលទីក្រុងបាងកក និងភ្នំពេញផងដែរ។ រមណីយដ្ឋាននេះស្ថិតនៅលើស្ទឹងបែកជាបួន អមជាមួយនឹងសម្រស់ធម្មជាតិស្រស់ឆើតឆាយ នៃដងទន្លេកាច់កុងពត់ពេន ធ្វើឲ្យភ្ញៀវទេសចរគយគន់មិនចេះធុញទ្រាន់ ដូចជាអ័ព្ទប៉ប្រះទឹកនៅពេលព្រឹក បញ្ចេញរស្មីសុរិយាក្រហមទុំដុតបញ្ឆេះរាត្រីអន្ធការឲ្យមានពន្លឺ និងជាកន្លែងស្ងប់សុខសម្រាប់អ្នកចង់បន្ធូរអារម្មណ៍តានតឹងពី ការងារ។ ជាមួយសម្រស់ធម្មជាតិដ៏ទាក់ទាញ រមណីយដ្ឋានទេសចរណ៍ធម្មជាតិតាតៃ ក៏ត្រូវបានភ្ញៀវទេសចរភាគច្រើនប្រសិទ្ធនាមថា ជារមណីយដ្ឋានឋានសួគ៌ដ៏ប្រពៃនៃទេសចរនិយមការផ្សងព្រេង។
ភូមិពាមក្រសោប ស្ថិតនៅក្នុងសង្កាត់កោះកាពិ ស្រុកកោះកុង ខេត្តកោះកុង នាទិសទក្សិណនៃក្រុងខេមរភូមិន្ទ មានចម្ងាយប្រហែល១០គីឡូម៉ែត្រ។ ទីនោះមិនមានទេសភាពអ្វីប្លែក ក្រៅពីគេហដ្ឋានរបស់ប្រជានេសាទ សង់ជាពីរជួរអមមាត់ព្រែក ជាមួយនឹងឧបករណ៍នេសាទដែលនៅអមផ្ទះនោះឡើយ ។ ទីធ្លាភ្ជាប់ពីផ្ទះមួយទៅផ្ទះមួយសុទ្ធតែស្ពានទាំងអស់។នៅ ក្រោមផ្ទះពុំប្រាកដជាទឹក ឬ គោកទេ ព្រោះធម្មតាទឹកសមុទ្រតែងតែមានជោរនាច បើពេលទឹកជោរមានទឹក កម្ពស់ពី០,៥០ ម៉ែត្រ ទៅ១ ម៉ែត្រ បើពេលទឹកនាចវិញគឺដីគោក ឬ មានទឹករហែលៗតាមកន្លែងជ្រៅ រាក់។ នៅមុខផ្ទះ មានដៃសមុទ្រ និង តួព្រែក នៅក្រោយផ្ទះមានព្រៃដែលដុះសុទ្ធតែដើមកោងកាង។ ប៉ុន្តែទោះជាទិដ្ឋភាពនៅទីនោះសាមញ្ញយ៉ាងនេះក៏ដោយ ភ្ញៀវក៏មិនដែលរំលងដែរ ។
ដោយឡែកនៅច្រកអន្តរជាតិកម្ពុជា-ថៃ ច្រកចាំយាម ពីមួយថ្ងៃទៅមួយថ្ងៃមានភ្ញៀវជាតិ និងអន្តរជាតិឆ្លងកាត់កាន់តែច្រើនឡើងៗ។ នៅទីនោះក៏មានរមណីយដ្ឋានមួយ ដ៏ទាក់ទាញដែរ គឺរមណីយដ្ឋានចាំយាម មានចម្ងាយ១០គីឡូម៉ែត្រ ពីទីរួមខេត្តកោះកុងជាប់ព្រំដែនកម្ពុជាថៃ ជាប្រភេទរមណីយដ្ឋាន ធម្មជាតិ និងកែច្នៃបង្កើតឡើងនៅឆ្នាំ១៩៩៧។ នៅទីនោះមានទេសភាពស្រស់ស្អាត និងមានសួនសត្វផងដែរដែលទេសចរអាចកម្សាន្តសប្បាយរីករាយ៕ ដោយ៖ មករា