ភ្នំពេញ៖ក្រោយពីការតវ៉ាឥតឈប់ឈរពីកម្មកររយៈពេលប៉ុន្មានថ្ងៃមកនេះក្រសួងការងារនិងបណ្តុះបណ្តាលវីជ្ជាជីវៈសម្រេចតម្លើងប្រាក់ខែគោលដល់កម្មករកាត់ដេរនិងស្បែកជើង២០ដុល្លារក្នុងមួយខែបន្ថែមលើប្រាក់ខែបច្ចុប្បន្ន៨០ដុល្លារស្មើនឹង១០០ដុល្លារ។ចាប់ពីខែកុម្ភៈឆ្នាំ២០១៤ទៅប្រាក់ខែកម្មករកាត់ដេរនិងស្បែកជើងនឹងឡើងដល់១០០ដុល្លារបន្ថែមលើប្រាក់អត្ថប្រយោជន៍ផ្សេងៗដែលមានស្រាប់។
សេចក្តីជូនដំណឹងរបស់ក្រសួងការងារចេញផ្សាយកាលថ្ងៃម្សិលមិញសម្រេចថាប្រាក់ឈ្នួលអប្បបរមាសម្រាប់កម្មករនិយោជិតផ្នែកវាយនភ័ណ្ឌកាត់ដេរសម្លៀកបំពាក់និងផលិតស្បែកជើងនឹងឡើងដល់១០០ដុល្លារចាប់ផ្តើមអនុវត្តពីថ្ងៃទី០១ខែកុម្ភៈឆ្នាំ២០១៤ទៅ។ជាមួយគ្នានេះក្រសួងនឹងចេញសេចក្តីសម្រេចដាច់ដោយឡែកមួយទៀតជ្រើសរើសសមាសភាពក្រុមការងារដើម្បីសិក្សាអំពីការតម្លើងប្រាក់ឈ្នួលអប្បបរមាសម្រាប់កម្មករនិយោជិតក្នុងវិស័យវាយនភ័ណ្ឌ។
យ៉ាងណាក៏ដោយការសម្រេចរបស់ក្រសួងការងារ តម្លើងប្រាក់ខែដល់១០០ដុល្លារនៅពេលនេះមិនបានទទួលការ ស្វាគមន៍ពីក្រុមសហជីព របស់លោក អាត់ ធន់ និងលោក រ៉ុង ឈុន ឡើយ។លោក អាត់ ធន់ ប្រធានសម្ព័ន្ធសហជីព ប្រជាធិបតេយ្យកម្មករកាត់ដេរកម្ពុជា ស៊ីកាឌូ បានប្រាប់ទូរទស្សន៍ហង្ស មាសនៅថ្ងៃនេះថាចំនួន១០០ដុល្លារនេះតិច ណាស់លោកនឹងតវ៉ាបន្តទៀត។គួរបញ្ជាក់ថាការចរចាតម្លើងប្រាក់ខែនេះត្រូវបានចរចាបីបួនលើកមកហើយរវាង ក្រុមការងារត្រីភាគី គឺក្រសួងការងារតំណាងសហជីពនិងតំណាងថៅកែរោងចក្រកាត់ដេរប៉ុន្តែរាល់សេចក្តីសម្រេច មិនបានបញ្ឈប់បាតុមកម្មតវ៉ារបស់កម្មករឡើយ អញ្ចឹងហើយទើបល្ងាចម្សិលមិញក្រសួងការងារសម្រេចតំឡើងដល់១០០ដុល្លារតែម្តង៕ដោយ៖ រតនា