ភ្នំពេញ៖ ក្រុមប្រឹក្សាជាតិកម្ពុជា ដើម្បីកុមារចាប់ផ្តើមរៀបចំផែនការយុទ្ធសាស្រ្តរបស់ខ្លួនជាលើក​ដំបូងដើម្បីធានា ឲ្យ​កុមារកាន់តែមានស្ថានភាពល្អប្រសើរឡើង ស្របតាមកិច្ចសន្យា​ជាមួយ​អង្គ​ការ​សហ​​​ប្រជា​ជាតិដែលបានមាន​ផែន​ការយុទ្ធសាស្រ្តនេះមានរយៈពេល១០ឆ្នាំ គឺចាប់ពីឆ្នាំ២០១៥ ដល់​២០២៥​ ដើម្បីពង្រឹងបន្ថែមនូវទិសដៅ​យុទ្ធសាស្រ្ត​លើវិស័យកុមារ ក៏ដូចជាពង្រឹង​នូវ​តួនា​ទី​ភារៈកិច្ច​របស់​​​អ្នកពាក់ពន្ធ័សំដៅឲ្យការអនុវត្ត​សិទ្ធិរបស់កុមារ​កាន់តែប្រសើរ​ជាងមុន។

លោកជំទាវ ខៀវ បូរី រដ្ឋលេខាធិការក្រសួងសង្គមកិច្ចអតីតយុទ្ធជននិងយុវនីតិសម្បទានិងជាប្រធានក្រុមប្រឹក្សា​ជាតិ​កម្ពុជាដើម្បីកុមារបានឲ្យដឹងនៅថ្ងៃទី៣១ខែធ្នូនេះថាការផ្តួចផ្តើមរៀបចំ​ផែន​ការ​ជាតិនេះឡើងដោយបច្ចុប្បន្ន​រាល់​
ស​កម្ម​ភាពពាក់ពន្ធ័និងកុមារមិនទាន់បានប្រមូលផ្តុំគ្នានៅឡើយដែល​​​ជាហេតុបង្កផលលំបាកជាច្រើនក្នុងការ​ឆ្លើយ​ចំ​ពោះ​​​​កុមារឲ្យមានប្រសិទ្ធភាពដូច្នេះផែនការនេះនឹងធានាបានការកាតបន្ថយបញ្ហាប្រឈមនានា​របស់កុមារ​ដែល​កំពុង​ជួបប្រទៈបានច្រើនជាងមុន។លោកជំទាវបន្តថាគម្រោងកំណត់ផែនការយុទ្ធសាស្រ្ត​ជាតិដើម្បីកុមារបាន​បង្កើត​ឡើងនៅពេល​ដែលកុមារកម្ពុជាជាច្រើនមិនទាន់ជៀសផុតពីបញ្ហាប្រឈមដោយការកេងប្រវញ្ច័ និងការ​ជួញដូ​រគ្រប់​រូប​ភាព ពិសេស ស្ថិតក្នុងទំរងពលកម្មធន់ធ្ងន់ជាដើម។​

តែទោះជាយ៉ាងនេះក្តី លោកជំទាវបានអះអាងថាបញ្ហាប្រឈមទាំងនេះត្រូវបានកាត់បន្ថយ​ជា​បណ្តើរ​​​​ៗ​ហើយពុំ​មាន​​​​​លក្ខណៈធ្ងន់ធ្ងរទៀតទេ ដោយសារតែកម្ពុជា បានអនុវត្តកាតព្វកិច្ចរបស់ខ្លួន​យ៉ាងពេញលេញ​ក្នុង​លើកកម្ពស់​ស្ថាន​ភាព​កុមារស្របតាមអនុសញ្ញាស្តីពីសិទ្ធិកុមារដែលបានផ្តល់សច្ចាបន័តាំងពីឆ្នាំ1992។តំណាង​អង្គការ​ភ្លែន​អន្តរ​ជាតិ​កម្ពុជាលោក Prashant verma បានចាត់ទុកថា នេះជាជំហាន មួយ​ដ៏សំខាន់រ​បស់រាជរដ្ឋាភិបាលកម្ពុជា​ក្នុងការ​ឆ្លើយ​​តប និងបំពេញយ៉ាងពេញលេញទៅលើសិទ្ធិ របស់​​កុមារនៅគ្រប់កម្មវិធីទាំងអស់។លោកបានទទួលស្គាល់ថាចាប់​តំាងពីប្រទេសកម្ពុជាទទួលយក​កាតព្វ​កិច្ចគាំពារកុមារមកទល់បច្ចុប្បន្ននេះសម្រេចនឹងរីក​ចំរើនគួរឲ្យកត់​សម្គាល់​ពាក់​ពន្ធ័នឹងការអនុ​វត្ត​សិទ្ធិកុមារនិងអភិវឌ្ឍកុមារ ប៉ុន្តែយ៉ាងនេះក្តីក៏នៅមានការងារជាច្រើនទៀតដែលត្រូវដោះស្រាយ​បន្ថែមបន្ថែម ក្នុងនោះដូចជាកម្មវិធីអប់រំ និងអភិវឌ្ឍកុមារតូច ការជួញដូរមនុស្សនិងការរំលោភបំពានលើ​កុមារ​ពល​កម្ម​កុមារ កុមារកំពា្រនិងងាយរងគ្រោះ និងសុខភាពកុមារជាដើម។

សូមបញ្ជាក់ថាតាមលទ្ធផលចន្លោះជំរឿនឆ្នាំ២០១៣​នេះកម្ពុជាមានកុមារ​អាយុចាប់ពី0​ឆ្នាំ​ដល់​១៤​​ឆ្នាំចំនួនជាង​៤​លាន​៨សែននាក់ ប៉ុន្តែបើយោងតាមរបាយការណ៍របស់អង្គការពលកម្មអន្តរជាតិ ILOបានបង្ហាញ​កាលពីពេល​ថ្មីៗនេះថាកម្ពុជាមានកុមារចំនួន១លាន៥សែននាក់កំពុងចូលរួមក្នុងសកម្មភាពសេដ្ឋកិច្ច​ ក្នុងនោះ៧៥​ម៉ឺននាក់ចូល​រួមក្នុងទំរងផ្សេងនៃពលកម្មកុមារដូចជា៖ កុមារធ្វើការងារនៅ ឡឥដ្ឋ, នេសាទសមុទ្រ, ស្រែអំបិល, នៅក្នុង​ចំការ​កៅស៊ូ, កុមារលីសែង និងកុមារក្នុងវិស័យទេសចរណ៍​។ការងារទាំងនោះបានធ្វើអោយកុមាររងគ្រោះ​លើរាងកាយ​នឹង​​មិនបានទៅសិក្សារៀនសូត្រជាដើម​៕ ដោយ ៖ ភីនរ៉ា