ភ្នំពេញ៖ អគ្គស្នងការដ្ឋាននគរបាលជាតិនៃព្រះរាជាណាចក្រកម្ពុជា និងអង្គការមូលនិធិបង្ការរបួសអាស៊ីបានចុះ អនុស្សរណៈនៃការយោគយល់គ្នាមួយបញ្ជាក់ពីការប្តេជ្ញាចិត្តក្នុងការធ្វើការរួមគ្នាដើម្បីកាត់បន្ថយការស្លាប់និងការរងរបួសដោយគ្រោះថ្នាក់ចរាចរណ៍នៅប្រទេសកម្ពុជាឱ្យធ្លាក់ចុះមកនៅកម្រិតទាបត្រឹមឆ្នាំ២០១៦ខាងមុខ។ការចុះអនុស្សរណៈខាងលើនេះធ្វើឡើងកាលពីល្ងាចថ្ងៃទី៣០ ខែធ្នូ នាអគ្គស្នងការដ្ឋាននគរបាល ជាតិ។ កិច្ចព្រមព្រៀងដែលមានរយៈបីឆ្នាំ នឹងពង្រីកគម្រោងសកម្មភាពការងារដែលរួមមានយុទ្ធនាការអប់រំផ្សព្វផ្សាយតាមដងផ្លូវការទាក់ទាញមតិគាំទ្រទៅលើបទបញ្ញត្តិស្តីពីការពាក់មួកសុវត្ថិភាពក្នុងចំណោមអ្នករួមដំណើរតាមទោចក្រយានយន្ត ហើយនិងបង្កើនការពង្រឹងការអនុវត្តច្បាប់ចរាចរណ៍។
អង្គការមូលនិធិបង្ការរបួសអាស៊ី នឹងបន្តផ្តល់សម្ភារៈមួយចំនួនដូចជា អាវកាក់ ចំណាំងពន្លឺ សាជីចរាចរណ៍ ម៉ាស៊ីនវាស់ ល្បឿន និងម៉ាស៊ីនវាស់ជាតិអាល់កុល ទៅដល់កងកម្លាំងនគរបាលជាតិ សំដៅគាំទ្រដល់កិច្ចខិតខំប្រឹងប្រែង ដើម្បីបង្កើនសុវត្ថិភាពចរាចរណ៍នៅលើដងផ្លូវ។លោក ហ្គ្រេជ ក្រាហ្វធ៍ ស្ថាបនិក និងជាប្រធានអង្គការមូលនិធិបង្ការរបួសអាស៊ី បានថ្លែងឱ្យដឹងថា យើងបានបំពេញការងារនៅកម្ពុជាប្រមាណជាង១០ឆ្នាំកន្លងមកហើយបើគិតមកដល់ពេល បច្ចុប្បន្ននេះ។ លោកបានបន្ថែមទៀតថា ប្រាកដណាស់ថា យើងអាចនឹងមិនសម្រេចបាននូវសមិទ្ធផលការងារទាំងឡាយឡើយ ប្រសិនបើគ្មានការគាំទ្រនិងការសហការដ៏ល្អពីស្ថាប័នរាជរដ្ឋាភិ បាលនានា។ដោយសារ ការខិតខំប្រឹងប្រែងរួមគ្នារបស់យើង ទើបយើងបានឃើញអត្រានៃការពាក់មួកសុវត្ថិភាពនៅតាមសាលារៀន គោលដៅបានកើនឡើងរហូតដល់៨៨ភាគរយ ហើយការយល់ដឹងអំពី ការពាក់មួកសុវត្ថិភាពក្នុងចំណោមអ្នករួមដំណើរតាមទោចក្រយានយន្តក៏មានការកើនឡើង។
មិនតែប៉ុណ្ណោះយើងក៏អាចប្រមូលផ្តុំបាននូវការគាំទ្រទៅលើកិច្ចខិតខំទាក់ទាញមតិគាំទ្រលើការអនុម័តនូវបទបញ្ញត្តិស្តីពីការពាក់មួកសុវត្ថិភាព សម្រាប់អ្នករួមដំណើរតាមទោចក្រយានយន្តដោយរួមទាំងកុមារផងនៅក្នុងសេចក្តីព្រាងច្បាប់ស្តីពីចរាចរណ៍ផ្លូវគោក(ថ្មី)។លោកបញ្ជាក់ថា ការផ្លាស់ប្តូរទាំងនេះ នឹងជួយកាត់បន្ថយចំនួនអ្នកស្លាប់និងអ្នករងរបួសដោយ គ្រោះថ្នាក់ចរាចរណ៍លើដងផ្លូវនៅកម្ពុជាហើយនឹងផ្តល់សិទ្ធិអំណាចដល់ប្រជាពលរដ្ឋកម្ពុជាជំនាន់ក្រោយឱ្យមានការលូតលាស់ធំធាត់ ជាមួយនឹងចំណេះដឹងអំពីសុវត្ថិភាពចរាចរណ៍ និងការយល់ដឹងជាមូលដ្ឋានអំពីសារៈសំខាន់នៃការពាក់មួកសុវត្ថិភាពគ្រប់វេលាធ្វើដំណើរ។លោកឧត្តមសេនីយ៍ឯក ចាន់ គឹមសេងប្រធាននាយកដ្ឋានកណ្តាលសណ្តាប់ធ្នាប់សាធារណៈនៃអគ្គស្នងការដ្ឋាននគរបាលជាតិបានមានប្រសាសន៍ថានៅប្រទេសកម្ពុជាគ្រោះថ្នាក់ចរាចរណ៍ កាលពីឆ្នាំ២០១៣ ប្រមាណ៩៦ភាគរយគឺបង្កឡើងដោយអ្នកបើកបរមិនបានគោរពតាមច្បាប់។
លោកបានបន្តទៀតថា មូលហេតុចំបងដែលបណ្តាលឱ្យមានគ្រោះថ្នាក់ចរាចរណ៍គឺបញ្ហាល្បឿនដែលធ្វើឱ្យមានអ្នកស្លាប់រហូតដល់៤៦ភាគរយ ហើយមូលហេតុបន្ទាប់គឺការបើកបរក្រោមឥទ្ធិពលនៃគ្រឿអនកងស្រវឹងដែលមាន១៣ភាគរយ។សម្ភារៈសម្រាប់អនុវត្តច្បាប់ដែលនឹងប្រគល់ជូនដល់កងកម្លាំងនគរបាលដូចមានចែង ក្នុងអនុស្សណៈនៃការយោគយល់គ្នា នេះនឹងជួយដល់យើងក្នុងការចាត់វិធានការណ៍កាន់តែមានប្រសិទ្ធភាពលើការបើកបរហួសល្បឿនកំណត់ និងការបើកបរក្រោមឥទ្ធិពលនៃគ្រឿងស្រវឹងហើយដែលនឹងជួយយើងឱ្យឈានទៅកាត់បន្ថយការស្លាប់ និងការរងរបួសដោយគ្រោះថ្នាក់ចរាចរណ៍បាន។ គោលដៅ រួមគ្នាមួយទៀត គឺការបង្កើនលទ្ធភាពនៃការធ្វើឱ្យមានមួកសុវត្ថិភាព ដែលមានគុណភាពខ្ពស់និង មានតម្លៃសមរម្យនៅលើទីផ្សារក្នុងព្រះរាជាណាចក្រកម្ពុជា និងបង្កើនការយល់ដឹងពីសារៈសំខាន់នៃការពាក់ មួកសុវត្ថិភាពក្នុងចំណោមអ្នករួមដំណើរតាមទោចក្រយានយន្តគិតទាំងកុមារ។សូមបញ្ជាក់ថា កម្ពុជាគឺជា ប្រទេសមួយ ក្នុងចំណោមបណ្តា ប្រទេសប្រមាណ ជាង១០០ផ្សេងទៀត ដែលបានប្តេជ្ញាចិត្ត ចំពោះផែនការ សកម្មភាពសុវត្ថិភាព ចរាចរណ៍ផ្លូវគោក (ឆ្នាំ២០១១-២០២០) របស់អង្គការសហប្រជាជាតិ ហើយផែនការ នេះមានគោលដៅ ជួយសង្រ្គោះជីវិតមនុស្សឱ្យបាន៥លាននាក់ត្រឹមឆ្នាំ២០២០ តាមរយៈការចាត់ជាវិធានការណ៍ដ៏សកម្មដើម្បីបង្កើនសុវត្ថិភាពចរាចរណ៍៕ ដោយ ៖ ភីនរ៉ា