ភ្នំពេញ៖ មន្ត្រីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុបាន អះអាងថា កម្ពុជានឹងមានប្រព័ន្ធថវិកាថ្មីនៅឆ្នាំ២០១២០ ដើម្បីធ្វើឱ្យប្រព័ន្ធគ្រប់គ្រងថវិកាមានភាពសុក្រិតភាព និងស្របតាមស្តង់ដារអន្តរជាតិ។ លោក វង្សី វិស្សុត រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានថ្លែងបែបនេះក្នុងសិក្ខាសាលាស្តីពីកំណែទម្រង់ថវិកាឆ្នាំ២០១៥ នៅព្រឹកថ្ងៃអង្គារនេះ។លោកអះអាងថា ការគ្រប់គ្រងថវិការបស់យើងនឹងរៀបចំប្រព័ន្ធថ្មីទាំងស្រុងនៅឆ្នាំ២០១២០ ដោយសារប្រព័ន្ធចាស់ដែលយើង កំពុងប្រើបច្ចុប្បន្ននេះ មិនអាចធ្វើឱ្យរបៀបធ្វើការ និងផ្នត់គំនិតមានការអភិវឌ្ឍន៍ទៅមុខបានទេ ដូច្នេះមន្ត្រីម្នាក់ៗត្រូវកសាងសមត្ថភាពការយល់ដឹងការអនុវត្តថវិកាបន្ថែមទៀត ។
លោក បានលើកឡើងថា ដើម្បីឱ្យយើងអាចធ្វើប្រព័ន្ធនេះបាន យើងត្រូវកែប្រព័ន្ធក្របខណ្ឌគតិយុត្តិ ក្របខណ្ឌបច្ចេកទេស ធនធានមនុស្ស និងកំណែទម្រង់ប្រព័ន្ធថវិកាជាបណ្តើរៗ ទើបធានាបានការអភិវឌ្ឍន៍មួយមានប្រសិទ្ធិភាព។លោក បានបន្ថែមថា ប្រទេសកម្ពុជាយើងមានគម្លាតអ្នកមាន និងអ្នកក្រច្រើនណាស់ ឥឡូវនេះ យើងមិនអាចពឹងតែការវិនិយោគក្នុងស្រុកដើម្បីជំរុញកំណើនសេដ្ឋកិច្ចបានទេ យើងត្រូវពឹងការវិនិយោគមកពីក្រៅប្រទេសផងដែរ ខណៈយើងកំពុងមានឱកាសច្រើន និងមានបញ្ហាប្រឈមក៏ច្រើន ប៉ុន្តែយើងត្រូវក្តាប់យកឱកាសឱ្យបាន។ លោក វង្សី វិស្សុត បានអំពាវឱ្យមន្ត្រីតាមក្រសួងស្ថាប័នហិរញ្ញវត្ថុទាំងអស់ត្រូវចូលរួមធ្វើកំណែទម្រង់ប្រកបដោយឆន្ទៈ ព្រោះការធ្វើកំណែទម្រង់នៅពេលនេះ មិនអាចដើរបានទៀតទេ ត្រូវតែរត់ទាំងអស់គ្នា។ គួរបញ្ជាក់ថា រាជរដ្ឋាភិបាលថ្មីអាណត្តិទី៥នេះ បានធ្វើការកែទម្រង់គ្រប់ស្ថាប័នទាំងអស់ ក្នុងនោះក្រសួងសេដ្ឋកិច្ច ក៏ជាគោលដៅមួយ ក្នុងការធ្វើកំណែទម្រង់ប្រព័ន្ធ ហិរញ្ញវត្ថុ ដើរឱ្យទាន់សភាពការណ៍និងស្របតាមនិយាមអន្តរជាតិ ក្នុងការគ្រប់គ្រងថវិកា មានតម្លាភាព និងប្រសិទ្ធភាព៕
ដោយ៖ រតនា