ព្រះវិហារ ៖ អាជ្ញាធរខេត្តព្រះវិហារ បានប្រកាសអាសន្ននូវកម្ពស់ទឹកស្ទឹងសែន ដែលរហូតមកដល់ព្រឹកថ្ងៃទី
១២ ខែសីហា ឆ្នាំ២០១៣នេះ បានឡើងដល់១១.១៧ម៉ែត្រ ហើយអាជ្ញាធរខេត្តត្រៀមជម្លៀសប្រជាពលរដ្ឋ
ដែលអាចរងផលប៉ះពាល់ដោយសារទឹកជំនន់នេះ ទៅកាន់ទីទួលដែលមានសុវត្ថិភាព នៅ។
ដោយពិនិត្យឃើញនូវស្ថានភាពដ៏គួរឲ្យព្រួយបារម្មណ៍នេះ ទើបនៅព្រឹកថ្ងៃដដែលនោះលោក អ៊ុំ ម៉ារ៉ា អភិបាល
ខេត្ត រួមទាំងមន្ត្រីពាក់ព័ន្ធនិងកងកម្លាំងប្រដាប់អាវុធមួយចំនួនបានចុះទៅពិនិត្យមើលដោយផ្ទាល់នូវស្ថានភាព
ទឹកស្ទឹងសែន ដែលស្ថិតនៅចំណុចមាន់រងាវ ក្នុងសង្កាត់ប៉ាល់ហាលក្រុងព្រះវិហារដែលមានប្រជាពលរដ្ឋជិត
៤០គ្រួសាររស់នៅតំបន់នោះ និងកំពុងប្រឈមនឹងផលប៉ះពាល់នេះ។
ចំពោះមុខប្រជាពលរដ្ឋអ្នករងផលប៉ះពាល់ដោយសារទឹកជំនន់នេះ អភិបាល ខេត្តព្រះវិហារ លោកអ៊ុំ ម៉ារ៉ា
បានលើកឡើងឲ្យដឹងថា នៅព្រឹកនេះកម្ពស់ទឹកស្ទឹងសែនមានរហូតដល់ទៅ ១១.១៧ម៉ែត្រ ជាកម្រិតទឹក
មួយដែលអាជ្ញាធរមានការព្រួយបារម្មណ៍ នឹងត្រូវប្រកាសអាសន្ន ហើយគណៈបញ្ជាការឯកភាពទូទាំងខេត្ត
បានត្រៀមលក្ខណៈសម្រាប់ជួយដល់ប្រជាពលរដ្ឋដើម្បីជម្លៀសទៅកាន់ទីទួលដែលមានសុវត្ថិភាព ទាំង
មនុស្ស និងសត្វពាហណៈ។
លោកអភិបាលខេត្ត ក៏បានពន្យល់ណែនាំនិងអំពាវនាវឲ្យបងប្អូនប្រជាពលរដ្ឋទាំងអស់ ត្រូវមានការប្រុង
ប្រយ័ត្នខ្ពស់ ជាពិសេសក្មេងតូចៗ ដែលអាចនឹងងាយជួបគ្រោះថ្នាក់ណាមួយ ដោយយថា ហេតុដោយគ្រោះ
មហន្តរាយទឹកជំនន់នេះ។
ម៉្យាងវិញទៀតលោកអភិបាលក៏បានក្រើនរំលឹកឲ្យប្រជាពលរដ្ឋទាំងអស់ថែរក្សាអនាម័យ ក្នុងការរស់នៅហូប
ចុក ពិសេសត្រូវពិនិត្យជុំវិញផ្ទះសម្បែងការពារក្រែងមានសត្វអសិរពឹស ហើយអាជ្ញាធរខេត្ត និងមន្ទីរសុខា
ភិបាលបានត្រៀមកម្លាំងនិងថ្នាំសង្កូវគ្រប់គ្រាន់សម្រាប់ចែកជូនដល់ប្រជាពលរដ្ឋទាំងអស់ជៀសវាងមានជំងឺ
ដង្កាត់និងហេតុការណ៍ផ្សេងៗដែលកើតឡើង។
ជាមួយគ្នានោះដែរ ចំពោះបញ្ហាសន្តិសុខនយោបាយ លោក អ៊ុំ ម៉ារ៉ា ស្នើឲ្យប្រជាពលរដ្ឋទាំងអស់បន្តនូវភាព
ស្ងៀមស្ងាត់ ហើយកុំជឿតាមការញុះញង់ ដែលធ្វើឲ្យមានចលាចល និងអស្ថេរភាពក្នុងសង្គម ត្រូវរង់ចាំការ
ប្រកាសលទ្ធផលជាបណ្តោះអាសន្ន និងផ្លូវការ នៃការ បោះឆ្នោតរបស់គណៈកម្មាធិការជាតិរៀបចំការបោះ
ឆ្នោត (គ.ជ.ប) បើទោះបីយើងគ្រប់គ្នាបានដឹងហើយថា គណបក្សប្រជាជនកម្ពុជាបានឈ្នះការបោះឆ្នោតក្នុង
សំឡេងភាគច្រើនដាច់ខាត ក្នុងការរៀបចំរាជរដ្ឋាភិបាល សម្រាប់អាណត្តិទី៥ ដែលមានសម្តេចតេជោ ហ៊ុន
សែន ជានាយករដ្ឋមន្រ្តីបន្តការដឹកនាំកសាងនិងអភិវឌ្ឍន៍ប្រទេសជាតិ កាន់តែមានការរីកចម្រើនជឿនលឿន
នៅថ្ងៃខាងមុខហើយក៏ដោយ៕
ដោយ៖ ស.ស្អាត