ភ្នំពេញ៖ ក្រសួងសុខាភិបាល និងអង្គការសុខភាពពិភពលោក បានអំពាវនាវឲ្យប្រជាជនមានការប្រុងប្រយ័ត្នចំពោះជម្ងឺផ្លូវដង្ហើម និងជម្ងឺរលាកក្រពះពោះវៀន ក្នុងគ្រាដែលកម្ពុជាកំពុងផ្លាស់ប្តូរអាកាសធាតុឈានមកត្រជាក់នាពេល នេះ។បើយោងតាមសេចក្តីប្រកាសព័ត៌មានរបស់ក្រសួងសុខាភិបាលចុះថ្ងៃទី ៤ ធ្នូ មិ្សលមិញនេះបានលើកឡើងថា ខណៈដែលសីតុណ្ហភាពធ្លាក់ត្រជាក់ជួបប្រទះ ជាញឹកញាប់នៅចន្លោះពីខែធ្នូនោះគឺជម្ងឺផ្លូវដង្ហើមបណ្តាលមកពីវីរុស ដូចជាគ្រុនផ្តាយ រលាកបំពង់ក ដោយមេរោគស្រ្តិបតូកូក និង រលាកក្រពះពោះវៀន ដោយវីរុស..ជាដើម។
ជាមួយគ្នានោះ សេចក្តីប្រកាសព័ត៌មានដដែលបានបង្ហាញពីរបៀបការពារមិនឱ្យកើតមានជម្ងឺទាំង៣ និងរបៀបប្រើប្រាស់តាមអនាម័យ…របៀបការពារខ្លួនមិនអោយចម្លង ជម្ងឺទៅអ្នកដទៃបើសិនជាបានកើតជម្ងឺនោះមែន។ជាចុងក្រោយសេចក្តីប្រកាសព័ត៌មាន បានបញ្ជាក់ដែរថា ទារក និង មនុស្សចាស់ មានហានិភ័យខ្ពស់ទាក់ទងនឹងជម្ងឺដែលទាមទារអោយមានការយកចិត្តទុកដាក់ និងថែរក្សាផ្តល់សម្លៀកបំពាក់ឱ្យបានកក់ក្តៅ ជាពិសេសមនុស្សវ័យចំណាស់ ដែលមានកម្តៅរាងកាយតិច ងាយធ្វើអោយសីតុណ្ហភាព រាងកាយ ថយចុះជាងធម្មតា ដែលអាចបណ្តាលអោយស្លាប់បាន៕ ដោយ៖ ភីនរ៉ា