ភ្នំពេញ៖ នៅក្នុងឆ្នាំ២០១៣នេះ ជំងឺផ្តាសាយបក្សីកើតឡើងនៅប្រទេសកម្ពុជាយើង គឺមានការកើនឡើងយ៉ាងខ្លាំង ហើយឈានដល់ជាប់ចំណាត់ថ្នាក់លេខ១នៅក្នុងពិភពលោកទៀតផង។ នេះបើតាមការប្រាប់ឱ្យដឹងពីលោកវេជ្ជបណ្ឌិត លី សូវ៉ាន់ អនុប្រធាននាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាល។លោកវេជ្ជបណ្ឌិតអនុប្រធាននាយកដ្ឋានប្រយុទ្ធនឹងជំងឺឆ្លងរូបនេះបានបញ្ជាក់ទៀតថា ឆ្នាំនេះដែរជំងឺផ្តាសាយបក្សីបានឆ្លងដល់ប្រជាពលរដ្ឋចំនួន២៦នាក់ ដែលជាចំនួនមួយខ្ពស់បើធៀបទៅនឹងឆ្នាំមុនៗ។
ក្នុងចំណោម២៦នាក់នោះ មាន១៣នាក់បានស្លាប់បាត់បង់ជីវិត។លោកបន្ថែមថា តួលេខខាងលើនេះ បើប្រៀបធៀបនឹងទៅនឹងបណ្តាប្រទេសនានានៅក្នុង ពិភពលោកនោះ គឺកម្ពុជាជាប់ចំណាត់ថ្នាក់លេខ១ ដែលមានឆ្លងជំងឺច្រើនជាងគេ។ដោយឡែក បើយោងទៅតាមរបាយការណ៍របស់ក្រសួងសុខាភិបាលផ្ទាល់បានឲ្យដឹងថា ជំងឺផ្តាសាយបក្សីបានកើតនៅកម្ពុជាជាលើកដំបូងនៅខែ កុម្ភៈ ឆ្នាំ ២០០៥ កន្លងមក ទៅលើស្ត្រីម្នាក់អាយុ២៥ឆ្នាំ រស់នៅខេត្តកំពត។
ហើយចាប់តាំងពីពេលនោះមក រហូតមកដល់ចុងឆ្នាំ២០១៣នេះដែរ គឺគេសង្កេតឃើញថា ប្រជាពលរដ្ឋកម្ពុជាជាច្រើនចំនួនប្រមាណជា៤៧នាក់បានឆ្លងជំងឺនេះ និងមានស្លាប់ចំនួន៣២នាក់ទៅហើយ។ពាក់ព័ន្ធនឹងករណីចុងក្រោយនៃអ្នកជំងឺដែលបានឆ្លងជំងឺនេះ ភាគច្រើនប្រជាពលរដ្ឋដែលរស់នៅខេត្តប៉ៃលិន ហើយជំងឺឆ្លងនេះតែងតែកើតមានចំពោះជាកុមារតូចៗ។ បើនិយាយទៅជាក់ស្តែងក្នុងចំណោម៤៧ករណីដែលឆ្លងជំងឺនេះមានកុមារចំនួន៣៥ករណី និងមានស្ត្រីចំនួន២៧ករណី៕ ដោយ ៖ ភីនរ៉ា