ខេត្តកណ្តាល ៖ បើតាមរបាយការណ៍របស់អគ្គស្នងការនគរបាលជាតិបានឲ្យដឹងថា កាលវេលាម៉ោង៧ព្រឹកថ្ងៃទី២៤ ខែកុម្ភៈ ឆ្នាំ២០១៤ នៅចំណុចទីតាំងចុងកោះប្រាក់ ក្នុងភូមិកោះប្រាក់ ឃុំភូមិធំ ស្រុកកៀនស្វាយ ខេត្តកណ្តាល មានករណីអគ្គិភ័យ ឆាបឆេះសាឡង់បូមខ្សាច់មួយគ្រឿងដែលកំពងធ្វើសកម្មភាពបូមរបស់ក្រុមហ៊ុនសុខហុង ទាំងព្រឹកជាហេតុធ្វើឲ្យកម្មករបូម ខ្សាច់លើសាឡង់ភ័យយ៉ាងខ្លាំង តែមួយសន្ទុះក្រោយមកបានរលត់ទៅវិញ ដោយសារកម្មករទាំងនេះបាននាំគ្នាជួយពន្លត់។
ក្នុងហេតុការណ៍នេះបានបណ្តាលឲ្យម៉ាស៊ីនបូមខ្សាច់២គ្រឿងដែលផ្ទុកនៅលើសាឡង់រងការខូចខាត ប្រេងម៉ាស៊ូតចំនួន៦ ប៊ីដុង ត្រូវភ្លើងឆេះឡើងខ្មៅខ្មួលខ្មាញ់ ប៉ុន្តែកម្មករនៅលើសាឡង់ទាំងអស់ពុំមានរងគ្រោះថ្នាក់នោះឡើយ។តាមប្រភពព័ត៌មានពីសមត្ថកិច្ចមូលដ្ឋានបានឲ្យដឹងថា ជារៀងរាល់ថ្ងៃសាឡង់បូមខ្សាច់តែងតែធ្វើសកម្មភាពបូមនៅចំណុចកើតហេតុខាងលើហើយទីតាំងនេះមានអជ្ញាប័ណ្ណធ្វើអាជីវកម្មស្របច្បាប់ចេញដោយរាជរដ្ឋាភិបាលសម្រាបបូមយកមកលុបចាក់បំពេញនៅតំបន់បឹកស្នោសង្កាត់និរោធ។
នៅព្រឹកកើតហេតុពេលសាឡង់កំពុងតែបូមដាក់ចូលសាឡង់មួយទៀត ស្រាប់ម៉ាស៊ីនបូមខ្សាច់បែកទុយយោប្រេងបណ្តាលឲ្យហៀរប្រេងទៅលើម៉ាស៊ីនដែលកំពុងតែមានកម្តៅ ហើយឆាបឆេះជាអណ្តាតភ្លើងឡើងតែម្តង។ ភ្លាមៗនោះកម្មករនៅលើសាឡង់បូមខ្សាច់ទាំងអស់បាននាំគ្នាពន្លត់ ទើបអាចគ្រប់គ្រងបាន តែម៉ាស៊ីបូមខ្សាច់២គ្រឿង និងប្រេងម៉ាស៊ូតមួយចំនួនត្រូវភ្លើងឆេះអស់ទាំងស្រុង តែមិនបណ្តាលឲ្យមានគ្រោះថ្នាក់ដល់កម្មករណាម្នាក់ឡើយ ៕ ដោយ៖ អភិរក្ស