ភ្នំពេញ៖ ស្រូវវស្សាប្រមាណមួយពាន់ហិកតានៅខេត្តចំនួន២គឺខេត្តក្រចេះ និងខេត្តព្រៃវែងដែលប្រឈមនឹងការខ្វះទឹកត្រូវបានមន្ទីរធនធានទឹករបស់ខេត្តទាំងពីរជួយអន្តរាគមន៍បូមទឹកដាក់ជាបន្តបន្ទាប់។ ចំណែកនៅខេត្តផ្សេងៗទៀតក៏ត្រូវបានក្រសួងធនធានទឹកឲ្យត្រៀមលក្ខណៈដើម្បីចុះជួយអន្តរាគមន៍ដូចគ្នានេះដែរ។
អ្នកនាំពាក្យនិងជានាយកខុទ្ទកាល័យ ក្រសួងធនធានទឹកនិងឧតុនិយម លោក ចាន់ យុត្ថានិយាយនៅថ្ងៃទី២២ ខែវិច្ឆិកា ឆ្នាំ២០១៣ថា ស្រូវវស្សាប្រមាណជាងមួយពាន់ហិកតា នៅក្នុងខេត្តក្រចេះ និងខេត្តព្រៃវែង ដែលកំពុងព្រឈមការខ្វះទឹក ត្រូវបានជួយអន្តរាគមន៍បូមទឹកដាក់បានទាន់ពេលវេលាមិនបណ្តោយឲ្យមានដំណាំស្រូវណាត្រូវបានខូចខាតនោះទេ។
លោកបន្តថា ស្រូវវស្សាដែលជួបបញ្ហាខ្វះទឹកទាំងមួយពាន់ហិកតានេះ មាននៅឃុំហានជ័យ ស្រុកឆ្លូង ខេត្តក្រចេះចំនួន៥០០ហិកតា នៅស្រុកពោធិរៀងនិងស្រុកព្រះស្តេចខេត្តព្រៃវែងចំនួន៥០០ហិកតា។ ការអន្តរាគមន៍នេះក្រុមការងារបានបូមទឹកដាក់ប្រឡាយមេ ដើម្បីឲ្យប្រជាកសិករបូមដោយម៉ាស៊ីនតូចៗបន្តចូលស្រែរៀងៗខ្លួន។ក្នុងការចុះអន្តរាគមន៍បូមទឹកដាក់ប្រឡាយមេនៅឃុំហានជ័យ លោក ហេង រត្ន័ម៉ូនីដា ប្រធានមន្ទីរធនធានទឹកខេត្តក្រចេះបានពន្យល់នឹងណែនាំដល់ប្រជាកសិករ នៅក្នុតំបន់ខ្វទឹកទាងនេះឲ្យចេះប្រើប្រាស់ទឹក និងសន្សំសំចៃទឹកដើម្បីធានាបាននូវនិរន្តរភាពនៃការផ្គត់ផ្គង់ទឹក រហូតស្រូវទទួលបានផល។
លោក ចាន់ យុត្ថា បានបញ្ជាក់ថា ក្រៅពីខេត្តក្រចេះនិងខេត្តព្រៃវែង មិនទាន់មានខេត្តណាមានដំណាំស្រូវព្រឈមការនឹងខ្វះទឹកនៅឡើយទេ ដោយសារទឹកភ្លៀងរដូវវស្សាបានអូសបន្លាយរហូតដល់សប្តាហ៍ទីបីនៃ ខែវិច្ឆិកា។ ទោះជាយ៉ាងណា ក្រសួងបានជម្រុញដល់គ្រប់មន្ទីរធនធានទឹកឲ្យបានត្រៀមម៉ាស៊ីនបូមទឹកនិងប្រេង ឲ្យបានគ្រប់គ្រាន់សម្រាប់ជួយអន្តរាគមន៍បូមទឹកជូនប្រជាកសិករដែលជួបប្រទះការខ្វះទឹក នៅក្នុងស្រែនាចុងរដូវវស្សាឆ្នាំនេះ៕ ដោយ៖ សស្អាត