កំពង់ឆ្នាំង ៖ កាំភ្លើងគ្រប់ប្រភេទជាច្រើនដើម ត្រូវបានប្រជាពលរដ្ឋ ដែលទៅបោចវល្លិ បានប្រទះឃើញនៅក្នុងល្អាងភ្នំដោះក្រមុំ ក្នុងភូមិសាស្ត្រ ឃុំជៀប ស្រុកទឹកផុស កាលពីព្រឹកថ្ងៃទី១៤ខែវិឆ្ឆិកា ឆ្នាំ២០១៣ ម្សិលមិញ ដែលគេលាក់ទុកក្រោយសម័យសង្រ្គាម ហើយបានរាយការណ៍ជូនសមត្ថកិច្ចនគរបាលស្រុកទឹកផុស សហការណ៏ជាមួយមន្ត្រីនគរបាលអាវុធជាតិផ្ទុះ នៃស្នងការដ្ឋាននគរបាលខេត្តកំពង់ឆ្នាំង ទៅរុករកឃើញបន្ថែម និងប្រម៉ែប្រមូលយកមករក្សាទុក កាំភ្លើងទាំងនោះខូចខ្ទេចស្ទើតែទាំងស្រុង។
នៅព្រឹកថ្ងៃទី ១៥ ខែវិច្ឆិកានេះនៅអធិការដ្ឋាននគរបាលស្រុកទឹកផុស លោកវរៈសេនីយ៏ត្រី ខែម វិបុល អធិការនគរបាលស្រុកបានឲ្យដឹងថា កាលពីថ្ងៃពីថ្ងៃទី១០ខែវិច្ឆិកា មានប្រជាពលរដ្ឋជាអ្នកបោចវល្លិ រកផ្តៅ បានប្រទះឃើញអាវុធជាច្រើនដើមនៅចំណុចខាងលើ ។ ក្រោយមកលោកបានរាយការណ៏ ជូនលោកស្នងការនគរបាលខេត្ត និងលោកអភិបាលខេត្ត ។ ហើយនៅព្រឹកថ្ងៃទី១៣ ខែវិច្ឆិកា លោកក៏បានទទួលបញ្ជាដឹកនាំកម្លាំងនគរបាលស្រុក នគរបាលប៉ុស្តិ៍មូលដ្ឋាន សហការជាមួយកម្លាំងនគរបាលអាវុធជាតិផ្ទុះខេត្ត ដោយមានប្រជាពលរដ្ឋជាអ្នកនាំផ្លូវជិត២០នាក់ បានចេញដំណើរឡើងភ្នំជាច្រើន ដើម្បីទៅពិនិត្យនិងរុករកបន្ថែមទៀត។
ក្រោយពេលធ្វើដំណើរអស់រយៈ១យប់ ២ថ្ងៃ នៅវេលាម៉ោ១២ថ្ងៃត្រង់ ថ្ងៃទី១៤ វិច្ឆិកា ក៏បានរុករកឃើញអាវុធជាច្រើនប្រភេទ ប្រមាណ១៣០ ដើម នៅស្រទាប់ខាងលើ នៃល្អាងភ្នំដោះក្រមុំ ហើយនៅមានអាវុធ និងគ្រាប់ជាច្រើនប្រភេទទៀត នៅស្រទាប់ខាងក្រោម ដែលកម្លាំងនគរបាលយើងមិនហ៊ាន រើកកាយ ព្រោះខ្លាចមានគ្រោះថ្នាក់ ។ ចំពោះអាវុធទាំងនេះមានម៉ាក ការ៉ាប៊ីន . AK. CKC . M79 .B40 .B41 . និង RPD . ។
លោកអធិការបានឲ្យដឹងទៀតថា តាមប្រភពព័ត៌មានពីប្រជាពលរដ្ឋ និងជាអតីតទាហានខ្មែរក្រហមបានឲ្យដឹងថា អាវុធទាំងនោះ គឺជារបស់កងពលលេខ១៨ ទ័ពខ្មែរក្រហម មានមេទ័ពឈ្មោះ ធី ឪ ជាអ្នកលាក់ទុកនៅក្រោយសម័យសង្គ្រាម ក្នុងអំឡុងឆ្នាំ១៩៨១-១៩៨២ ។
សមត្ថកិច្ចបានបញ្ជាក់ថា កាំភ្លើងនិងគ្រាប់ដែលរកឃើញនោះ បានខូចគុណភាព ស្ទើរតែទាំងស្រុងទៅហើយ ។ ប៉ុន្តែតាមផែនការរបស់អាជ្ញាធរខេត្ត នៅពេលខាងមុខនេះ អជ្ញាធរ នឹងឲ្យសមត្ថកិច្ចខេត្តសហការណ៏គ្នាទៅប្រមូលយកអាវុធ និងគ្រាប់ទាំងអស់នោះ យកមករក្សាទុក ដើម្បីធានាកាពារ សន្តិសុខ សុវត្ថិភាព ជូនប្រជាពលរដ្ឋ៕
ដោយ៖ ស.ស្អាត