ភ្នំពេញ៖ រដ្ឋាភិបាលជប៉ុនផ្ទេរបទពិសោធន៍បន្ថែមលើជំនាញប្រឆំាងការជួញដូរមនុស្ស ដល់​មន្រ្តីនគរបាលកម្ពុជា ដើម្បីធានាឲ្យកាន់តែមានប្រសិទ្ធិភាពក្នុងការប្រយុទ្ធប្រឆំាង​លើបញ្ហា​នេះ​ ខណៈដែលពិភពលោក​កំពុងព្រួយបារម្ភ​ខ្លាំង​ពី​បញ្ហាជួញដូរមនុស្ស និងការ កេងប្រវ័ញ្ញ​ផ្លូវភេទ។    ថ្លែងក្នុងសិក្ខាសាលាកា​រវិភាគលើយុទ្ធសាស្រ្ត និង​ប្រតិ​បត្តិ​​ការសម្រាប់ប្រឆំាងការជួញ​ដូរ​មនុស្ស នៅព្រឹកថ្ងៃទី១៤ ខែវិច្ឆិកានេះ លោកស្រី កាណាអិ កាណាតា​អ្នកគ្រប់​គ្រង​ជំនួយ​​​ផ្នែក​ច្បាប់ និងយុត្ថាធិការនៃរដ្ឋាភិបាលជប៉ុនបានមានប្រសាសន៍ថា នេះជាវគ្គបណ្តុះ​បណ្តាល​ដ៏មានសារៈ​ប្រយោជន៍​ណាស់ដល់មន្រ្តីនគរបាលជំនាញរបស់កម្ពុជា ដោយមិនត្រឹមតែ​មាន​ប្រសិទ្ធិភាព ក្នុងការស៊ើបអង្កេត ការ​បង្រា្កប​បទល្មើសប៉ុណ្ណោះទេ​ គឺ ទទួលបានបច្ចេកទេស​បន្ថែមលើកការប្រមូលវត្ថុតាង ដើម្បីកសាង​សំណុំរឿង​ចាប់​បញ្ជូន​ជនល្មើសទៅ តុលាការ​ផងដែរ។

លោកស្រីបញ្ជាក់ថា បទពិសោធន៍ទាំងនេះ បានផ្តល់ដោយមន្រ្តីប៉ូលីលជំនាញជាច្រើន​មកពីប្រទេសជប៉ុន ដែល​ប្រកប​ទៅដោយភាពជោគជ័យលើវិស័យទាំងនេះ​ដើម្បីធ្វើយ៉ាងណា​ឲ្យកម្ពុជាកាន់តែមានយុទ្ធសាស្រ្តថ្មីៗ ក្នុងការ​ប្រយុទ្ធ​ប្រឆាំងអំពើជួញដូរមនុស្សនិងអាជីវកម្ម​ផ្លូវភេទ ពិសេសលើស្រ្តីនិងកុមារ ប្រកបទៅដោយប្រសិទ្ធិភាព។

លោកស្រីបន្ថែមថា ការផ្តល់បទពិសោធន៍នេះ ពុំមែនកម្ពុជា គ្មានសមត្ថភាពនោះទេ ប៉ុន្តែ​ជាការផ្តល់បទ​ពិសោធន៍​ថ្មីៗ​​​បន្ថែមទៀត បន្ទាប់ពីការបណ្តុះបណ្តាលជាច្រើនកន្លងមក ។ លោកស្រីក៏បានវាតម្លៃខ្ពស់ ចំពោះរដ្ឋាភិបាល​កម្ពុជា​ពិសេស ស្ថាបន័ពាក់ពន្ធ័​ដែលបានយក​ចិត្តទុកដាក់ប្រយុទ្ធប្រឆំាងបញ្ហានេះកាន់តែមានដំណើរការ​ល្អទៅមុខ​ជា​លំដាប់ និងគួរឲ្យកត់​សម្គាល់។លោកស្រីឧត្តមសេនីយ៍ឯក យក់ សុខា អគ្គស្នងការរងនគរបាលជាតិ នៃក្រសួង​មហាផ្ទៃ បានមានប្រសាសន៍ថា នគរបាលកម្ពុជាពិតជាទទួលបាននូវចំណេះដឹងបន្ថែមកាន់តែ​ប្រសើរ​ក្នុងការកាត់​បន្ថយ​បទ​ល្មើសជួញដូរមនុស្ស និងចាប់ជនល្មើសកសាងសំណុំរឿង បញ្ជូនទៅតុលាការឲ្យបាន​កាន់តែច្រើននៅ​ពេល​ខាងមុខ ដើម្បីកាត់បន្ថយបទល្មើសទាំងនោះ ។ តែបើទោះជាយ៉ាងនេះក្តី យើងនៅតែត្រូវការចំណេះដឹង និងបទ​ពិសោធន៍​​ថ្មីៗបន្ថែម​ទៀត​ពី បណ្តាប្រទេសជាដៃគូរ។លោកស្រីអគ្គស្នងការរងបន្តថា បច្ចុប្បន្ននេះ​សង្គម​កម្ពុជា កាន់តែវិវត្តន៍ឥតឈប់ឈរ ដូច្នេះបទល្មើសក៏បានកើតមានឡើងជាច្រើនរូបភាពផងដែរ ម្យ៉ាងទៀត​នគរ​បាល​កម្ពុជា ក៏នៅ​តែជួបបញ្ហាប្រឈមមួយចំនួន ដូចជាការយល់ដឹងរបស់មន្រ្តីអនុវត្តច្បាប់​នៅមានកម្រិត​លើជំនាញ​របស់​ខ្លួន និងកង្វះមន្រ្តីជំនាញផ្នែកការកសាងសំណង់រឿង​ដើម្បីបញ្ជូនជនល្មើស​ទៅតុលាការ ដែលទាមទារ​ឲ្យមានកិច្ច​សហការ​ជាមួយស្ថាប័នជំនាញអន្តរជាតិបន្តទៀត។

សូមបញ្ជាក់ថា មន្រ្តីនគរបាលដែលមកទទួលការបណ្តុះបណ្តាលក្នុងរយៈពេលមួយថ្ងៃនេះ គឺមកពីតាមបណ្តាលខេត្ត រាជធានីមួយចំនួន​ដែលសម្បូរទៅដោយបទល្មើស​ ក្នុងនោះ​រួមមាន ​៖ រាជធានីភ្នំពេញ ខេត្តកំពង់ឆ្នាំង ខេត្តកំពង់ធំ ខេត្ត​បន្ទាយមានជ័យ ខេត្តបាត់ដំបង សៀមរាប និងខេត្តព្រះសីហនុ ៕ដោយ៖ ស.ស្អាត