ភ្នំពេញ៖ មន្រ្ដីអង្គការសង្គមស៊ីវិល ធ្វើការពាក់ព័ន្ធ នឹងបញ្ហាគ្រោះថ្នាក់ចរាចរណ៍ បានជំរុញឲ្យរាជរដ្ឋាភិបាល ពង្រឹងច្បាប់បើកបរពេលស្រវឹង ដើម្បីធ្វើការកាត់បន្ថយគ្រោះថ្នាក់ចរាចរណ៍ដែលបង្កទ្បើង ដោយការប្រើប្រាស់គ្រឿងស្រវឹង ខណៈអត្រាគ្រោះថ្នាក់ចរាចរណ៍នៅតែកើនឡើង។ការជំរុញនេះធ្វើឡើងក្នុងសិក្ខាសាលាថ្នាក់ជាតិស្តីពី គោលនយោបាយនៃការបើកបរក្រោមឥទ្ធិពលគ្រឿងស្រវឹងជាការទទួលខុសត្រូវរបស់អ្នកណា? នៅព្រឹកថ្ងៃទី០៦ ខែវិច្ឆិកា ឆ្នាំ២០១៣នេះ។
លោកណែប ស៊ីនថៃ នាយកវិទ្យាស្ថានតស៊ូមតិ និងគោលនយោបាយ មានប្រសាសន៍ថា លោកព្រួយបារម្ភខណៈបច្ចុប្បន្នប្រទេសកម្ពុជានៅតែ ប្រឈមការកើនគ្រោះថ្នាក់ចរាចរណ៍ ដែលធ្វើឲ្យប៉ះពាល់សណ្តាប់ធ្នាប់សង្គម និងអាយុជីវិតមនុស្ស។លោក ណែប ស៊ីនថៃ បានលើកឡើង ថា ការអនុវត្តច្បាប់ប្រឆាំងនឹងការបើកបរក្នុងពេលស្រវឹង មិនទាន់ត្រូវបានពង្រឹងនៅទ្បើយ។យ៉ាងណាក៏ដោយ អគ្គនាយករងដឹកជញ្ជូនក្រសួងសាធារណការ និងជាអគ្គលេខាធិការគណៈកម្មាធិការជាតិសុវត្ថិភាពចរាចរណ៍ ផ្លូវគោកលោកពៅម៉ាលីទទួលស្គាល់ថា រាជរដ្ឋាភិបាល កំពុងតែបន្តអនុវត្តច្បាប់ដែលមានដើម្បី កាត់បន្ថយគ្រោះថ្នាក់ចរាចរណ៍ ដោយសារការប្រើគ្រឿងស្រវឹង។
លោកសំណូមពរឲ្យស្ថាប័នពាក់ព័ន្ធចូលរួមគ្នា កាត់បន្ថយបញ្ហានេះដូចជាតាម រយៈការអប់រំផ្សេងៗផងដែរ។របាយការណ៍វិទ្យាស្ថានតស៊ូមតិ និងគោលនយោបាយរកឃើញថា ទន្ទឹមការផ្សព្វផ្សាយគ្រឿងស្រវឹងមានលក្ខណៈគគ្រឹកគគ្រេងតាមប្រព័ន្ធផ្សព្វផ្សាយនានានិងតាមផ្ទំាងពាណិជ្ជ កម្មធំៗនៅតាមបណ្តោយផ្លូវសាធារណៈហេដ្ឋារចនាសម្ព័ន្ធក៏នៅមិនទាន់ល្អប្រសើរជាហេតុបណ្តាលឲ្យគ្រោះថ្នាក់ចរាចរណ៍នំាមុខនៃការស្លាប់នៅកម្ពុជាក្នុងចំណោម មនុស្សពេញវ័យអាយុ២០ឆ្នំាដល់២៩ឆ្នំា។ គិតត្រឹមឆ្នំា២០១២គ្រោះថ្នាក់ចរាចរណ៍មានចំនួន៤២៥០ករណីនំាឲ្យមនុស្សស្លាប់១,៩៦៦និងរបួសធ្ងន់ចំនួន៥,៣៤៩នាក់៕
ដោយ៖ រតនា