ភ្នំពេញ៖ គណៈកម្មាធិការជាតិរៀបចំការបោះឆ្នោតហៅកាត់ថា(គ.ជ.ប.)ទំនងជានឹងពន្យាពេលចុះឈ្មោះបោះឆ្នោតថ្មីឆ្នាំ២០១៣ដោយសារបញ្ហាគ្រោះទឹកជំនន់ដ៏ធ្ងន់ធ្ងរ មិនអាចចុះឈ្មោះបាននៅតាមបណ្តាលឃុំ\សង្កាត់ រាជធានី\ខេត្តមួយចំនួន។បើតាមការឲ្យដឹងពី លោក ទេព នីថាអគ្គលេខាធិការគ.ជ.ប.តាមទូរស័ព្ទនៅថ្ងៃទី១១ខែតុលាឆ្នាំ២០១៣នេះថាគ.ជ.ប.គ្រោងនឹងពន្យាពេលចុះឈ្មោះបោះឆ្នោតឆ្នាំ២០១៣ថ្មីនៅតាមបណ្តាខេត្តរាជធានីមួយចំនួន។លោកបន្តថាការពន្យាពេលនោះដោយសារនៅតាមបណ្តាឃុំ\សង្កាត់ រាជធានី\ខេត្ត មួយចំនួននោះត្រូវបានលិចលង់ដោយសារទឹកជំនន់យ៉ាងធ្ងន់ធ្ងរជាហេតុធ្វើឲ្យបងប្អូនប្រជាពលរដ្ឋមិនអាចអញ្ជើញទៅពិនិត្យបញ្ជីឈ្មោះ និងចុះឈ្មោះបោះឆ្នោតបាន។
លោកទេព នីថា បន្តទៀតថាគិតចាប់ពីថ្ងៃប្រកាសទទួលចុះឈ្មោះឆ្នោតនាថ្ងៃទី១តុលាមកត្រឹមថ្ងៃទី៨ខែតុលាដោយមិនគិតថ្ងៃបុណ្យភ្ជុំបិណ្ឌនោះទេ គណៈកម្មាធិការជាតិរៀបចំការបោះឆ្នោតបានចុះឈ្មោះអ្នកបោះឆ្នោតរយៈតែ៣ថ្ងៃប៉ុណ្ណោះ ហើយរយៈពេលនេះគ.ជ.ប.បានចុះឈ្មោះអ្នកបោះឆ្នោតថ្មីបានជាង៣១.០០០នាក់ លុបឈ្មោះជាង៩.០០០នាក់កែតម្រូវឈ្មោះនិងទិន្ទន័យផ្សេងៗដែលខុសក្នុងបញ្ជីបោះឆ្នោតឆ្នាំ២០១២ជិត៣០០០នាក់។លោកអគ្គលេខាធិការបញ្ជាក់ថានៅសប្តាហ៍ក្រោយនេះគ.ជ.ប.និងពិនិត្យសំណើរពីគណៈកម្មាការឃុំ\សង្គាត់ដែលប៉ះពាល់ដោយសារគ្រោះទឹកជំនន់នឹងត្រូវពន្យាពេលចុះឈ្មោះនៅតាមឃុំ\សង្កាត់រាជាធានី\ខេត្តមួយចំនួន។គ.ជ.ប.ពិនិត្យថាខេត្តណាខ្លះត្រូវពន្យាពេល និងខេត្តណាមិនត្រូវពន្យាពេលនោះ។
តាមគម្រោងគណៈកម្មាធិការជាតិរៀបចំការបោះឆ្នោត (គ.ជ.ប) មានគំរោងពន្យាពេលសម្រាប់ការពិនិត្យបញ្ជីឈ្មោះ និងចុះឈ្មោះបោះឆ្នោតនៅក្នុង៧ទៅ៨ខេត្តប៉ុណ្ណោះ ព្រោះថាខេត្តទាំងនោះ កំពុងទទួលរងផលប៉ះពាល់ដោយទឹកជំនន់ ។ គ.ជ.ប មានផែនការពន្យាពេលសម្រាប់ការពិនិត្យបញ្ជីឈ្មោះ និងចុះឈ្មោះបោះឆ្នោត នៅក្នុងឃុំ សង្កាត់ ចំនួន ១០០ ក្នុងចំណោមខេត្ត៧ទៅ៨នោះ មានខេត្តមួយចំនួនន ស្ថិតនៅតាមព្រំដែន ខ្មែរ-ថៃនិងខេត្តមួយចំនួនទៀតនៅតាមបណ្តោយដងទន្លេមេគង្គ។
អគ្គលេខាធិការគ.ជ.ប.រូបនេះបន្ថែមថា គ.ជ.បកំពុងតែជម្រុញឲ្យគណៈកម្មការខេត្ត រៀបចំការបោះឆ្នោត ស្រង់បញ្ជីពីផលប៉ះពាល់ដោយទឹកជនន់ និងស្រង់ឈ្មោះប្រជាពលរដ្ឋ ដែលមានឈ្មោះហើយ និងប្រជាពលរដ្ឋដែលមិនទាន់មានឈ្មោះនៅតាមបណ្តាខេត្តដែល មានបញ្ហាគ្រោះធម្មជាតិឆ្នាំនេះ។យោងតាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ បានឲ្យដឹងថាមាន២០រាជធានី\ខេត្ត បានទទួលរងផលប៉ះពាល់ពីទឹកជំនន់ លើកលែងតែខេត្តកំពត កែប កំពង់សោម និងខេត្តកំពង់ស្ពឺ។
ទោះជាយ៉ាងណាក៏ដោយអគ្គលេធិការដ្ឋានគ.ជ.ប. បានប្រកាសពត័មាននៅថ្ងៃទី៨ខែតុលាឆ្នាំ២០១៣កន្លងទៅនេះបានបង្ហាញពីលទ្ធផលបណ្តោះអាសន្ននៃការពិនិត្យបញ្ជីឈ្មោះ និងចុះឈ្មោះបោះឆ្នោតឲ្យដឹងថាទោះបីជាឆ្នាំនេះមានឧបសគ្គទឹកជំនន់នៅតាមបណ្តាលខេត្តមួយចំនួនចំពេលគ.ជ.ប.កំពុងដំណើរការពិនិត្យបញ្ជីឈ្មោះនិងចុះឈ្មោះបោះឆ្នោតឆ្នាំ២០១៣ក្តី ក៏ប្រជាពលរដ្ឋបានចាប់អារម្មណ៍អំពីដំណើរការចុះឈ្មោះ និងពិនិត្យបញ្ជីឈ្មោះបោះឆ្នោត ដោយអ្នកខ្លះបានមកពិនិត្យ និងចុះឈ្មោះតាំងពីថ្ងៃបើកមកម៉្លេះ។
បើគិតតែក្នុងរយៈពេលតែ២ថ្ងៃគឺចាប់ពីថ្ងៃទី០១និងថ្ងៃទី០២ខែតុលា លេខាធិកដ្ឋានរាជធានី\ខេត្តរៀបចំការបោះឆ្នោត នៅឃុំ\សង្កាត់ចំនួន១.៣៨៥ ក្នុងចំណោមឃុំ \សង្កាត់ ទាំងអស់១.៦៣៣ មានប្រជាពលរដ្ឋបានមកចុះឈ្មោះបោះឆ្នោតចំនួន៧.៨៣២នាក់ កែ តម្រូវឈ្មោះចំនួន៧៩១នាក់ និងសុំលុបឈ្មោះចេញពីបញ្ជីបោះឆ្នោត ចំនូន២.២៣៩នាក់។
សូមបញ្ជាក់ថាការពិនិត្យបញ្ជីឈ្មោះ និងចុះឈ្មោះបោះឆ្នោតឆ្នាំ២០១៣ចាប់ពីថ្ងៃទី ១ ដល់ថ្ងៃទី២០ ខែតុលា ឆ្នាំ២០១៣ ។ គ.ជ.ប.ក៏បានអំពាវនាវដល់ប្រជាពលរដ្ឋទំាងអស់ មេត្តារួសរាល់ទៅពិនិត្យបញ្ជីឈ្មោះបោះឆ្នោតនិងចុះឈ្មោះបោះឆ្នោតឲ្យបានគ្រប់ៗគ្នា៕ ដោយ៖ សស្អាត