ភ្នំពេញ៖ នៅក្នុងរដូវដកស្ទូងនេះជាដំណាក់កាលសំខាន់មួយ ក្នុងការធ្វើស្រែវស្សារបស់ប្រជាកសិករ។ មកទល់ពេលនេះ ប្រជាកសិករប្រមាណ ៩០% បានស្ទូងរូចរាល់ហើយ និងប្រមាណ១០%ទៀតនៅមិនទាន់បានស្ទូងនៅឡើយ ដោយសារភាពរាំងស្ងួតបានអូសបន្លាយ នៅតាមខេត្តមួយចំនួនដូចជាខេត្តតាកែវ និងខេត្តកំពតជាដើម។
ដើម្បីជួយដល់ប្រជាកសិករក្នុងការធ្វើស្រូវឱ្យបានផលច្រើនលើសពីធម្មតាសេដាក បានផ្តល់នូវគំនិតបន្ថែមមួយចំនួនទៀតទាក់ទង របៀបស្ទូងស្រូវឱ្យបានផលច្រើនជូនកសិករដូចមានរបៀបតទៅនេះ ៖ ទី១.ចំពោះកសិករដែលមិនទាន់ស្ទូងហើយ គួរជ្រើសរើសដកយកតែសំណាបដែលថ្លោសៗល្អទៅស្ទូង ដោយស្ទូងតែ១គុម្ព ១ដើម ហើយត្រូវលៃចន្លោះគុម្ពឱ្យគៀកជាងការស្ទូងនៅដើមរដូវ (គឺចន្លោះប្រហែល ១.៥តឹក) ដោយសារស្រូវមានពេលតិចសំរាប់លូតលាស់។២.ចំពោះដីស្រែដែលស្ទូងរួច ហើយមានទឹកដក់ច្រើននៅក្នុងស្រែ កសិករគួរតែបង្ហូរទឹកចេញខ្លះ ដើម្បីឱ្យស្រូវលូតលាស់និងបែកគុម្ពបានច្រើន។ ប៉ុន្តែ នៅពេលស្រូវបែកគុម្ពនិងចេញផ្កា (នៅចុងរដូវ) កសិករគួររក្សាទឹកទុកនៅក្នុងស្រែវិញ។ ៣. ចំពោះដីស្រែស្ទូងហើយ តែមិនសូវមានទឹកដក់ កសិករគួរប្រមែប្រមូលសារធាតុសរីរាង្គដូចជាស្លឹកនិងមែករុក្ខជាតិ (រួមមានទន្ទ្រានខែត្រ ស្នោរ សណ្តែក ល្ហុងខ្វង អង្កាញ់ អង្គារដី ស្តៅ ។ល។) និងអង្កាមជាដើម បាចចូលក្នុងស្រែ។ ការធ្វើរបៀបនេះវាជួយឱ្យដីមានជីជាតិ និងជួយគ្របដីធ្វើឱ្យដីមានសំណើម និងធ្វើឱ្យស្រូវលូតលាស់បានល្អ។
បណ្ឌិត យ៉ង សាំងកុមារ ប្រធានអង្គការសេដាកមានប្រសាសន៍ថា កសិករគួរព្យាយាមអនុវត្តការស្ទូងឱ្យបានល្អ ដោយរើសតែសំណាបថ្លោសមកស្ទូងហើយស្ទូងតែ១គុម្ព១ដើម បានហើយទោះបីជាសំណាបរាងចាស់បន្តិចក៏ ដោយ។
លោកបណ្ឌិតបញ្ជាក់បន្ថែមថា ពាក្យចាស់ពោលថា ធ្វើស្រែនឹងទឹក តែបើទឹកច្រើនពេកក៏មិនល្អដែរ សំរាប់ស្រូវ ពីព្រោះទឹកច្រើនធ្វើឱ្យស្រូវមិនសូវបែកគុម្ព ឫសលូតលាស់មិនសូវល្អ ហើយធ្វើឱ្យដើមលូតវែង ងាយដូលពេលស្រូវចេញផ្កា ឬ ត្រូវខ្យល់បកបោកមកចំនម្តងៗ៕
ដោយ៖ សស្អាត