ខេត្តឧត្តរមានជ័យ៖ ករណីគ្រោះថ្នាក់ចរាចរណ៍មួយគួរឲ្យរន្ធត់ ដែលបានកើតឡើង កាលពីវេលាម៉ោង ៣និង៣០នាទីរសៀល ថ្ងៃទី២៥ ខែកញ្ញា ឆ្នាំ២០១៣ នៅលើកំណាត់ផ្លូវជាតិលេខ៦៧ ទល់មុខផ្លូវទឹកជុំ ស្ថិតនៅភូមិទឹកជុំ ឃុំត្រពាំងប្រិយ៍ ស្រុកអន្លង់វែង ខេត្តឧត្ដរមានជ័យ ដែលបង្កឡើងដោយរថយន្តឡង់គ្រីស័រកាត់ទ្រុងមួយគ្រឿង បើកបុកសត្វគោ១ក្បាលងាប់ រួចជ្រុលចង្កូតទៅបុកព្រំប្រទល់ភូមិ បន្ទាប់មកក៍ទៅបុកតូបប្រជាពលរដ្ឋនៅលើចិញ្ចើមថ្នល់ចំនួន២ទៀត បណ្ដាលឲ្យអ្នកជិះនៅក្នុងរថយន្តចំនួន៤នាក់ រងរបួសធ្ងន់ផងដែរ។
បើតាមប្រភពព័ត៌មានពីសមត្ថកិច្ចបានឲ្យដឹងថា៖ អ្នកបើកបរឈ្មោះ នួន សំអាង ភេទ ប្រុស អាយុ២៩ឆ្នាំ រស់នៅភូមិជាំ ឃុំត្រពាំងប្រិយ៍ ស្រុកអន្លង់វែង (រងរបួសធ្ងន់) រីឯអ្នករួម ០៣ នាក់ទៀត ១-ឈ្មោះ មួង វត្តី ប្រុស អាយុ ៣២ ឆ្នាំ មុខរបរ ជានគរបាលអន្តោប្រវេសន៍ ( រងរបួសធ្ងន់ ) ២-ឈ្មោះ រុំ ភេទ ប្រុស អាយុ ១៩ ឆ្នាំ រស់នៅភូមិ/ឃុំជាមួយគ្នា មុខរបរ កម្មករ(រងរបួសធ្ងន់ ) ៣-ឈ្មោះ វ៉េត ភេទ ប្រុស អាយុ ២០ ឆ្នាំ រស់នៅភូមិ/ឃុំជាមួយគ្នា មុខរបរ កម្មករ(រងរបួសធ្ងន់ )។
បច្ចុប្បន្នក្រោយពីបានកើតហេតុការណ៍រួចមក ជនរងគ្រោះទាំង៤នាក់ខាងលើ ត្រូវបានកម្លាំងនគរបាលបញ្ជូនទៅព្យាបាលនៅមន្ទីរពេទ្យស្រុក និងធ្វើការដកហួតវត្ថុតាងរថយន្ត ដើម្បីរៀបចំសំណុំរឿងចាត់ការតាមនីតិវិធី៕ ដោយ៖ អភិរក្ស