ភ្នំពេញ៖ តាមព្រះសុន្ទកថាព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា បានអបអរសាទរពិធីបើកសម័យប្រជុំដំបូង នៃរដ្ឋសភា នីតិកាលទី៥នេះ ដោយមានវត្តមានតំណាងរាស្រ្តអញ្ជើញចូលរួម ដែលប្រជាពលរដ្ឋកម្ពុជាទូទាំងព្រះរាជាណាចក្រកម្ពុជា លោកបានបោះឆ្នោតជ្រើសតាំងកាលពីថ្ងៃទី ២៨ ខែកក្កដា ឆ្នាំ២០១៣កន្លងទៅនេះព្រះអង្គក៏បាននាំមកនូវព្រះរាជបណ្តាំផ្ញើសួរសុខទុក្ខ អំពីសម្តេចព្រះមហាក្សត្រី ព្រះវរាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុតមកជូនសម្តេចអគ្គមហាធម្មពោធិសាល សម្តេចអគ្គមហាពញាចក្រី សម្តេចអគ្គមហាសេនាបតីតេជោ ព្រមទាំងសមាជិកសមាជិកា នៃរដ្ឋសភា និងមន្ត្រីរាជការ បុគ្គលិកទាំងអស់នៃអគ្គលេខាធិការដ្ឋានរដ្ឋសភា។
.png)
ព្រះអង្គក៏សូមអបអរសាទរជាថ្មីម្តងទៀតចំពោះ សម្តេច ឯកឧត្តម លោកជំទាវ ដែលត្រូវបានប្រជារាស្ត្រជាអធិបតីទូទាំងព្រះរាជាណាចក្រកម្ពុជា លោកបានជ្រើសតាំងជាតំណាងនៅក្នុងស្ថាប័ននីតិប្បញ្ញត្តិ ដើម្បីបន្តនិរន្តរភាពនយោបាយ និងសង្គម ដើម្បីកសាង និងការពារប្រទេសជាតិឲ្យមានសេចក្តីសុខក្សេមក្សាន្ត និងមានការរីកចម្រើនថ្តុំថ្កើង រុងរឿងតទៅមុខទៀត។ព្រះសន្ទរកថាបន្តថា រយៈពេលកន្លងមកស្ថាប័នរដ្ឋយើងទាំងអស់ធានារ៉ាប់រងភារកិច្ចដ៏ធំធេង បានកសាងសមិទ្ធផលដ៏ច្រើនមហិមារួចមកហើយលើគ្រប់វិស័យ។ ស្នាដៃខាងលើនេះឆ្លុះបញ្ចាំងឲ្យឃើញតាមរយៈជីវភាពដ៏សុខសន្តិភាព ស្ថិរភាព មានការអភិវឌ្ឍន៍តាំងពីទីក្រុងរហួតដល់ជនបទ ជាហេតុនាំឲ្យកិត្យានុភាពរបស់កម្ពុជាយើងកាន់តែឡើងខ្ពស់ពីមួយថ្ងៃ ទៅមួយថ្ងៃនៅលើឆាកអន្តរជាតិ។
ព្រះអង្គមានបន្ទូលបញ្ជាក់ថា សម័យប្រជុំដំបូងនៃរដ្ឋសភានីតិកាលទី៥នាពេលនេះ ជាឱកាសថ្មីនៃប្រវត្តិសាស្ត្ររបស់ស្ថាប័ននីតិប្បញ្ញត្តិយើង ដែលជាតំណាងដ៏ឧត្តុង្គឧត្តមរបស់ប្រជារាស្ត្រទូទាំងប្រទេស និងប្រឹងប្រែងឲ្យអស់ពីកំលាំងកាយចិត្ត ប្រមូលផ្តុំការខិតខំ ដើម្បីបម្រើជាតិ ដោយតម្កល់ផលប្រយោជន៍ជាតិជាធំ ជាងផលប្រយោជន៍ដ៏ទៃ។ ច្បាប់ទាំងឡាយដែលរដ្ឋសភាបានអនុម័ត គឺជាផ្លូវសម្រាប់រាជរដ្ឋាភិបាលអនុវត្ត ដើម្បីកសាង ការពារជាតិ និងលើកតម្កើងប្រជាជាតិខ្មែរយើងរស់នៅក្នុងសេចក្តីសុខ សន្តិភាព ស្ថិរភាព ក្នុងបរិបទធានាសេរីភាព និងគោរពសិទ្ធិមនុស្សក្នុងបូរណភាពដែនដី នៃព្រះរាជាណាចក្រកម្ពុជាយើង។ ដើម្បីសម្រេចភារកិច្ចដ៏ឧត្តុង្គឧត្តមនេះ ប្រជាជាតិកម្ពុជាត្រូវមានឯកភាព និងមហាសាមគ្គីជាតិខ្ពស់បំផុត ដោយឈរលើមូលដ្ឋាននៃការអនុវត្តគោលការណ៍លទ្ធិប្រជាធិបតេយ្យ និងនីតិរដ្ឋ ដែលយើងបានអនុវត្តតាំងពីឆ្នាំ១៩៩៣មក ជាពិសេសត្រូវកសាងឲ្យមានយុត្តិធម៌សង្គម ឲ្យកាន់តែមានកម្រិតខ្ពស់ជាលំដាប់។ កំណែទម្រង់ស្តីពីអភិបាលកិច្ចល្អ ដែលក្នុងនោះមានកំណែទម្រង់ច្បាប់ និងប្រព័ន្ធយុត្តិធម៌នៅតែបន្តទៅទៀតឲ្យកាន់តែសកម្ម និងខ្លាំងក្លាថែមទៀត។ ម្យ៉ាងទៀតយើងក៏ត្រូវប្រឹងប្រែងឲ្យអស់ពីសមត្ថភាពក្នុងការធ្វើសមាហរណកម្មនៅក្នុងតំបន់ និងក្នុងពិភពលោក ដើម្បីទាញយកផលប្រយោជន៍ផ្សេងៗពីសក្តានុពលអន្តរជាតិ។ព្រះអង្គសង្ឃឹមថា រដ្ឋសភានីតិកាលទី៥ និងមានដំណើរការល្អ បំពេញភារកិច្ចរបស់ខ្លួនបានទទួលជោគជ័យដ៏ធំធេងសម្រាប់ជាឧត្តមប្រយោជន៍ជូនជាតិ មាតុភូមិ និងប្រជារាស្ត្រកម្ពុជាយើង៕
ដោយ៖ ស.ស្អាត