បន្ទាយមានជ័យ៖ ប្រជាពលរដ្ឋជាង៣០០គ្រួសារ នៅស្រុកអូរជ្រៅ ស្រុកស្វាយចេក ស្រុកថ្មពួក ត្រូវបានអាជ្ញាធរជន្លៀសចេញដោយសារទឹកជំនន់ជន់លិចភូមិឋានចាប់ពី ថ្ងៃទី២១ កញ្ញា ២០១៣ដោយនាំទៅកាន់ទីទួលសុវត្តិភាពព្រមទាំងផ្ដល់អំណោយអង្ករបន្ទាន់ដល់ពួកគាត់។ដោយសារឥទ្ធិពលខ្យល់ព្យុះក្នុងតំបន់និងទឹកធ្លាក់ពីប្រទេសថៃដោយ បាក់ទំនប់ធារាសាស្ត្រ ឈ្មោះ តងភីណង ក្នុងស្រុអារញ ខេត្តស្រះកែវ បានហូរចាក់មកលើខេត្តបន្ទាយមានជ័យប្រទេសកម្ពុជា ។ ជំនន់ទឹកភ្លៀងបានធ្លាក់ជាប់ៗគ្នាក្នុងរយៈពេលប៉ុន្មាននេះធ្វើជន់លិចលំនៅឋាន សាលារៀន វត្តអារ៉ាម ផ្លូវជាតិ ផ្លូវលំហេដ្ឋារចនាសម្ព័ន្ធភូមិ ឃុំ និងផលដាំណាំជាច្រើនហិកតា នៅឃុំអូរបីជាន់ស្រុកអូរជ្រៅ ស្រុកស្វាយចេក ស្រុកថ្មពួក ។
អភិបាលខេត្តបន្ទាយមានជ័យលោក ទ្រី ណារិន បានថ្លែងនៅថ្ងៃម្សិលម៉ិញនេះថា ប្រធានមន្ទីរ ស្ថាប័នពាក់ព័ន្ធ បានចុះពិនិត្យវាយតម្លៃ និងឆ្លើយតបនិងដោះស្រាបបន្ទាន់នូវករណីគ្រោះទឹកជំនន់ដោយទឹកភ្លៀងខាងលើនេះ។ លោកបន្តថា តាមការចុះពិនិត្យ ទឹកជំនន់លិចភូមិនានារបស់ឃុំអូរបីជាន់ជាប់ព្រំដែនរវាកម្ពុជា-ថៃ បានស្រកបន្តិចវិញហើយនៅថ្ងៃទី២៣ កញ្ញានេះ។ ប៉ុន្តែទឹកជំនន់នេះបានទៅជន់លិចភូមិ និងផ្លូវនៅឃុំដទៃ នៃឃុំខាងក្រោមៗ ដូចជាឃុំសូភី ឃុំកូបនាំឲ្យលិចទីធ្លាវត្ត សាលារៀន យោធា និងកងនគរបាលការពារព្រំដែន។ប្រជាពលរដ្ឋដែលរងគ្រោះដោយសារទឹកលិចជាង៣០០គ្រួសារ ត្រូវបានអាជ្ញាធរជន្លៀសមកកាន់ទួលសុវត្ថិភាពមានចំនួន៣កន្លែង គឺនៅក្នុងសាលាឃុំ ក្នុងមណ្ឌលសុខភាព និងក្នុងភូមិប្រាសាទ។
.jpg)
ចំណែកជំនន់ទឹកភ្លៀង បានហូរកាត់ពីលើផ្លូវជាតិលេខ២៥៨D គម្រោងផ្លូវជាតិលេខ៥៨ ផ្លូវក្រវាត់ព្រំដែនផ្លូវជាតិលេខ៥៩ពីបន្ទាយមានជ័យទៅខេត្តឧត្តរមានជ័យ ដែលកំពុងស្ថាបនា ធ្វើឲ្យអ្នកធ្វើដំណើរទៅមកជួបការលំបាកជាខ្លាំង។ រីឯនៅក្រុងប៉ោយប៉ែតវិញ ទឹកក្នុងអូរព្រំដែន កំពុងទ្បើងតែមិនទាន់ជនលិចលំនៅឋានប្រជាពលរដ្ឋដូចមុននៅឡើយទេ ប្រសិនបើភ្លៀងនៅតែបន្តធ្លាក់មកទៀតនោះ មិនយូរប៉ុន្មានទេទឹកនឹងលិចជាថ្មីម្តងទៀត។សូមបញ្ជាក់ថា អាជ្ញាធរខេត្ត និងស្ថាប័នពាក់ព័ន្ធក្នុងខេត្តកំពុងមមាញឹកតាមដានស្ថានភាពទឹកជំនន់ និងស្វែងរកទីទួលសុវត្ថិភាពសំរាប់ត្រៀមជម្លៀសប្រជាពលរដ្ឋដែលរងគ្រោះដោយទឹកជំនន់នេះ។ ម៉្យាងទៀតបាននាំយកនូវអំណោយសង្គ្រោះបន្ទាន់ទៅផ្តល់ជូនដល់ពលរដ្ឋដែលរងគ្រោះ ដែលក្នុង១គ្រួសារទទួលបានអង្ករ៣០គីឡូក្រាមនិងគ្រឿងឧបភោគដទៃទៀត៕
ដោយ៖ សស្អាត