ភ្នំពេញ៖ ក្រសួងសុខាភិបាលអំពាវនាវដល់គ្រប់មជ្ឈដ្ឋានទាំងវិស័យសាធារណៈ ឯកជន និងអង្គការសង្គមស៊ីវិលរួមគ្នាប្រឆំាងទប់ស្កាត់ការកកើតជម្ងឺមិនឆ្លងទៅដល់ប្រជាពលរដ្ឋ ខណៈដែលជម្ងឺនេះ កំពុងរីករាលដាលកាន់ខ្លំាងឡើងនៅក្នុងប្រទេសកម្ពុជា។ក្រសួងសុខាភិបាលបានចាប់ផ្តើមធ្វើផែនការពហុវិស័យថ្នាក់ជាតិក្នុងការការពារ និងប្រយុទ្ធជម្ងឺមិនឆ្លង ដែលជាជម្ងឺមួយប្រឈមនឹងគ្រោះថ្នាក់ខ្ពស់ដល់សុខភាពប្រជាពលរដ្ឋ។ សព្វថ្ងៃនេះជម្ងឺមិនឆ្លងមាន៤ប្រភេទធំៗ ក្នុងនោះមានជំងឺសរសៃឈាមបេះដូង ជម្ងឺមហារីក ជម្ងឺផ្លូវដង្ហើមរុំារ៉ៃ និងជម្ងឺទឹកនោមផ្អែម ដែលទំាងនេះជាបញ្ហាសុខភាពដ៏ធំ និងកំពុងរីកកាន់តែខ្លំាងឡើងៗនៅក្នុងប្រទេសកម្ពុជា។
ថ្លែងក្នុងសិក្ខាសាលាពិគ្រោះយោបល់នៅព្រឹកថ្ងៃទី១៧ខែកញ្ញានេះ លោកវេជ្ជ.ម៉ម ប៊ុនហេង រដ្ឋមន្រ្តីក្រសួងសុខាភិបាលបានលើកឡើថា កក្តាដែលនាំឲ្យកើតជម្ងឺមិនឆ្លងនេះ បណ្តាលមកពីការប្រើប្រាស់ថ្នាំជក់ ការប្រើប្រាស់គ្រឿងស្រវឹងប្រកបដោយគ្រោះថ្នាក់ របបអាហារដែលគ្មានផាសុខភាព ការបំពុលខ្យល់ក្នុងផ្ទះ និងកង្វះកាយវប្បកម្ម។លោករដ្ឋមន្រ្តីបន្ថែមថា ការប្រយុទ្ធប្រឆំាងជម្ងឺនេះ មិនអាចពឹងផ្អែកទាំងស្រុងទៅលើក្រសួងសុខាភិបាលតែឯងបានទេ សកម្មភាពនេះចាំបាច់ត្រូវមានការចូលរួមពីគ្រប់ ផ្នែកនៅក្នុងវិស័យដ៏ទៃទៀតរបស់រាជរដ្ឋាភិបាល វិស័យឯកជន និងវិស័យសង្គមស៊ីវិល។ ក្នុងនោះក្រសួងអប់រំយុវជននិងកីឡាត្រូវបង្កើនការអប់រំដល់សិស្សានុសិស្សពីវិធានការបង្កាកុំឲ្យកើត ជម្ងឺមិនឆ្លង។
ជាមួយគ្នានេះដែរក្រសួងព័ត៌មានត្រូវទប់ស្កាត់ការផ្សព្វផ្សាយពាណិជ្ជកម្មគ្រឿងស្រវឹងដោយជម្រុញនិងលើកទឹកចិត្ត ប្រាស់ចាក់ពីការពិត ចំណែកក្រសួងសេដ្ឋកិច្ចនិងហិរញ្ញវត្ថុ ក្រសួងឧស្សាហ៍កម្មរ៉ែនិងថាមពល និងក្រសួងពាណិជ្ជកម្ម ត្រូវគិតគូរពីបញ្ហាការនាំចូលផលិតផលថ្នាំជក់ខណៈដែលបារីមានតម្លៃទាបជាងគេបំផុតនៅក្នុងតំបន់។លោករដ្ឋមន្រ្តីបញ្ជាក់ថា ការឆ្លើយតបជាពហុវិស័យរបស់រាជរដ្ឋាភិបាលគឺជាការចំាបាច់ ដើម្បីធានាដោះ ស្រាយវិបត្តិជម្ងឺនេះប្រកបដោយប្រសិទ្ធិភាព ហើយជាដំណឹងល្អ៨០ភាគរយនៃជម្ងឺនេះអាចការពារបាន។លោកភីតធើវ៉ាន់ មើរ៉េនតំណាងជាន់ខ្ពស់នៃអង្គការសុខភាពពិភពលោកប្រចាំកម្ពុជាបានសារទរចំពោះការកំណត់យុទ្ធសាស្រ្តនេះដែលមានយន្តការសម្របសម្រួលច្បាស់លាស់ ក្នុងការដោះស្រាយជម្ងឺនេះ។
លោកបន្ថែមថា ប្រសិនបើពុំដោះស្រាយឲ្យបានទាន់ពេលវេលាទេជម្ងឺនេះនឹងគំរាមកំហែងដល់ការគំរាមកំហែងដល់ការសម្រេចបាននូវគោលដៅអភិវឌ្ឍសហស្សវត្សរបស់កម្ពុជា និងការចំណាយខ្ពស់ដល់ការថែទាំសុខភាពរបស់រាជរដ្ឋាភិបាល និងប្រជាពលរដ្ឋ។ ការចំណាយដ៏ខ្ពស់នេះបានធ្វើឲ្យអ្នកជម្ងឺបាត់បង់ប្រាក់ចំណូលរុញច្រានឲ្យប្រជាពលរដ្ឋធ្លាក់កាន់តែជ្រៅទៅក្នុងភាពក្រីក្រ និងកាត់បន្ថយការអភិវឌ្ឍសេដ្ឋកិច្ច។សូមបញ្ជាក់ថា តាមរបាយការណ៍នៅឆ្នាំ២០០៨ជម្ងឺនេះជាមូលហេតុនៃការស្លាប់រហូតដល់៤៦ភាគរយនៅក្នុងប្រទេសកម្ពុជា ហើយតួរលេខនេះត្រូវបានព្យាករណ៍នឹងកើនឡើងថែមទៀត។ ជម្ងឺមិនឆ្លងនេះបានកើតឡើងលើពលរដ្ឋដែលស្ថិតនៅក្នុងវ័យបន្តពូជជាងពាក់កណ្តាលនៃបុរស និងជាងមួយភាគបីនៃស្រ្តីដែលស្លាប់ដោយជម្ងឺនេះគឺមានអាយុក្រោម៦០ឆ្នាំ៕ ដោយ ៖ ស.ស្អាត
