រាជធានីភ្នំពេញ៖ អាជ្ញាធររាជធានីបានដាក់កម្លាំងរឹតបណ្តឹងសន្តិសុខ នៅតាមបណ្តោយផ្លូវជាតិសំខាន់ៗមួយចំនួន ក្នុងរាជធានីភ្នំពេញ ខណៈ ដែលគណបក្សប្រឆាំងបានប្រកាសចាប់ផ្តើមធ្វើមហាបាតុកម្មអហិង្សាដ៏ធំ មួយ នៅទីលានប្រជាធិបតេយ្យ កាលពីព្រឹកថ្ងៃទី១៥ ខែកញ្ញា ឆ្នាំ២០១៣នេះ។ ព្រះសង្ឈនិងមនុស្សមិនតិចជាង៥ម៉ឺននាក់ទេ ដែលជាក្រុមអ្នកគាំទ្រគណបក្សសង្រ្គោះជាតិ (CNRP) ដែលបានមកពីកន្លែងផ្សេងគ្នា នៅ ទីក្រុងភ្នំពេញបានមកឈរ និងអង្គុយស្រែកទាមទាររកយុត្តិធម៌ នៅម្តុំបរិវេណសួនសេរីភាព ចាប់តាំងពីម៉ោង៧ព្រឹក រហូតដល់វេនល្ងាច ថ្ងៃទី១៥ ខែកញ្ញា ដើម្បីធ្វើការទាមទារឲ្យមានការបង្កើតគណកម្មាធិការចំរុះមួយ សម្រាប់ស៊ើបអង្កេតអំពីលទ្ធផលបោះឆ្នោតឡើងវិញ ខណៈដែលថ្នាក់ដឹកនាំបក្សសង្គ្រោះជាតិ ដែលមាន លោកសម រង្ស៊ី និង លោក គឹម សុខា បានចាត់ទុកការបោះឆ្នោតជ្រើសរើសតំណាងរាស្រ្ត អណត្តិទី៥ នាពេលកន្លងមកនេះ បានប្រព្រឹត្តទៅដោយមិនមានភាពរលូនគ្មានយុត្តិធម៌ និងគ្មានតម្លាភាព។
មនុស្សម្នាក់ក្នុងចំណោមមនុស្សរាប់ពាន់នាក់ ដែលកំពុងឈរយ៉ាង ប្រជ្រៀតនៅខាងមុខសួនប្រជាធិបតេយ្យ លោកតែម សុខា អាយុ៣១ឆ្នាំ បានឲ្យដឹងថា លោកគឺជាមនុស្សម្នាក់ដែលកំពុងចូលរួមនៅក្នុងមហាបាតុកម្មអហឹង្សាដ៏ធំមួយ ដែលជាការដឹកនាំរបស់គណបក្សសង្រ្គោះជាតិ ដែលមានលោកសម រង្ស៊ី និង លោក កឹម សុខាជាដើម។ លោកបញ្ជាក់ថា៖ «យើងចង់កែប្រែអ្វីដែលជាទំលាប់ចាស់ពីមុនមក ដែលបានបង្កើតឡើងដោយរដ្ឋាភិបាលចាស់កន្លងមកនេះដែរ ព្រោះយើង យល់ថា វាមិនត្រូវនិងឆន្ទៈដែលប្រជាជនចង់បានឡើយ»។ លោកបន្តថា មហាបាតុកម្មនេះ វាមិនមែនបង្កឲ្យមានភាពចលាចលកើតឡើងនៅក្នុងប្រទេសទេ ប៉ុន្តែរដ្ឋាភិបាលគួរតែគោរពនូវការសម្រេចចិត្តរបស់រាស្រ្តជាធំ។
ស្ថានភាពនៅទីក្រុងភ្នំពេញនាពេលបច្ចុប្បន្ននេះ នៅតែរក្សាបាននូវភាពស្ងប់ស្ងាត់ ក្រោយពេលដែលកងកម្លាំងរក្សាសន្តិសុខជាច្រើនរយនាក់ បានដាក់ប៉ារាស់បិទផ្លូវជាតិសំខាន់ៗមួយចំនួននៅទីក្រុងភ្នំពេញ ដែលជាហេតុបង្កឲ្យមានការភ័យខ្លាច និងកកស្ទះចរាចរណ៍ផងដែរ។
អ្នកស្រី យ៉ា ដា អាយុ៣៨ឆ្នាំ ជាប្រជាពលរដ្ឋរស់នៅសង្កាត់បឹងកេងកង៣ បានឲ្យដឹងថា មានការបិទផ្លូវជាតិជាច្រើនកន្លែងផងដែរ ដូចជានៅម្តុំវិមានឯករាជ្យ និងម្តុំផ្លូវប៊ូឌីញ តាមផ្លូវមាត់ទន្លេ និងផ្លូវសំខាន់ៗមួយចំនួនទៀតផងដែរ។ អ្នកស្រីបន្តថា កាលពីវេលាម៉ោងប្រមាណ១២និង២០នាទីថ្ងៃត្រង់ ក្រុមបាតុករជាច្រើននាក់ បាននាំគ្នាធ្វើសកម្មភាពទំលុះបារ៉ាស់ ដែលយាមកាមដោយកម្លាំងនគរបាលចំរុះ ដែលបានដាក់នៅខាងមុខវត្តឧណ្ណាឡោម ដើម្បីនាំគ្នាដើរហែរក្បួនឆ្ពោះមកកាន់ព្រះបរមរាជវំាង។ លោកស្រីបញ្ជាក់ថា៖ « ខណៈនោះ មានការប៉ះទង្គិចមួយបានកើតឡើង រវាងក្រុមបាតុករ និងកម្លាំងរក្សាសន្តិសុខ បណ្តាលឲ្យមានអ្នករបួសផងដែរ»។
គួរបញ្ជាក់ថា កាលពីពេលថ្មីៗនេះ គណបក្សសង្គ្រោះជាតិ (CNRP) បានប្រកាសថា ខ្លួននឹងបន្តធ្វើមហាបាតុកម្មអហឹង្សា នៅខាងមុខទីលានប្រជាធិបតេយ្យក្នុងរយៈពេល៣ថ្ងៃជាប់ៗគ្នា ប៉ុន្តែគេនៅមិនទាន់អាចដឹងថា តើគណបក្សមួយនេះ អាចនិងសម្រេចទៅតាមផែនការរបស់ខ្លួន ដែលបានគ្រោងទុក រឺយ៉ាងណានៅឡើយទេ។ ដោយ៖ អភិរក្ស