ភ្នំពេញ ៖បើទោះជាគណបក្សរាជានិយមហ៊្វុនស៊ិនប៉ិច ស្ថិតក្នុងកាលៈទេសៈបែបណាក៏ដោយ ប្រទេសចិនជា​ មិត្តនៅតែបន្តគាំទ្រ និងពង្រឹងពង្រីកចំណងមិត្តភាព កិច្ចសហប្រតិបត្តិការ​ជា​មួយ​គ្នា​គ្រប់ពេលវេលា មិន ថា​គណបក្សរាជានិយមមួយនេះ មានអាសនៈ ឬ គ្មានអាសនៈនៅ​ក្នុងរដ្ឋ​សភានោះទេ ប្រទេសចិននៅតែ
ប្រ​​​កាន់ជំហរឥតងាករេ ព្រមទាំងផ្តល់ការលើកទឹក​ចិត្ត​ដល់​គណបក្សរាជានិយមហ៊្វុនស៊ិនប៉ិច និងគណបក្ស​ប្រជាជនកម្ពុជា ជាដៃគូរបន្តសហការគ្នា ដើម្បីប្រទេសជាតិមានការរីកចំរើនជឿនលឿនទៅថ្ងៃខាងមុខ។

នេះបើតាមប្រសាសន៍ក្នុងកិច្ចជំនួបដោយបិទទ្វារមួយ រវាងលោកLiu Yunshan សមាជិកគណៈ​អចិន្រ្តៃយ៍​ការិយាល័យនយោបាយ​មជ្ឈិមបក្សកុម្មុយនិស្តចិន និងជាសមាជិក​លេខាធិការដ្ឋាន​មជ្ឈិមបក្សជាមួយ​សម្តេចរាជបុត្រី ព្រះអនុជ នរោត្តម អរុណរស្មី ជាប្រធាន​គណបក្សរាជានិយមហ៊្វុនស៊ិនប៉ិច រសៀលថ្ងៃ
​ទី​១១ខែកញ្ញាឆ្នាំ២០៣ នាសណ្ឋាគារ​អាំងទែរ​កុងទីណង់តាល់។

លោកលីវយុនសានបានបង្ហាញជំហរថា ដោយផ្នែកលើកិច្ច​ទំនាក់​ទំនង​ការទូតជាយូឆ្នាំ និងមានប្រវត្តិសាស្រ្ត​ជាមហាមិត្តដ៏ជិតស្និតរបស់ប្រជាជនចិនទាំងមូល ប្រទេសចិននៅតែ​បន្តរក្សា​កិច្ចសហប្រតិបត្តិការ ជាមួយនឹង គណបក្សហ៊្វុនស៊ិនប៉ិចនេះគ្រប់កាលៈទេសៈ​មិនថា​មានអ្វីកើតឡើងនោះទេ។

លោក កែវ ពុទ្ធរស្មី ប្រធានឧត្តមក្រុមប្រឹក្សា គណបក្សហ៊្វុនស៊ិនប៉ិច បានមានប្រសាសន៍ ប្រាប់ក្រុមអ្នកសារ​ព័ត៌មាន បន្ទាប់ពីជំនួបទ្វេរភាគីនោះថា លោក Liu Yunshan បានបញ្ជាក់​ប្រាប់ សម្តេច ព្រះ អនុជ​    នរោត្តម អរុណរស្មី​ថា បើទោះជាពេលនេះគណបក្សហ៊្វុនស៊ិនប៉ិច អត់មានសំឡេងនៅក្នុងរដ្ឋសភាក្តី ប៉ុន្តែមិត្តភាព
រវាង​បក្សទាំងពីរជាង៣០ឆ្នាំមកនេះ គឺនៅតែ​បន្តជានិច្ចនិរន្ត។

លោកប្រធានឧត្តមក្រុមប្រឹក្សាបន្តថា លោកបានរំលឹកនូវចំណងមិត្តភាព ជាពិសេសនូវគុណ​សម្បត្តិ​សំខាន់ៗ​របស់ព្រះមហាវរក្សត្រ ព្រះបរមរតនកោដ្ឋ ដែលព្រះអង្គបានស្ថាបនា​នូវ​មិត្ត​ភាពដ៏យូរលង់ជាមួយនឹងប្រទេស​ចិន។ ដូច្នេះលោករំលឹកថា ព្រះបរមរតនកោដ្ឋ គឺជាអ្នកប្រវត្តិ​សាស្រ្តក្នុងការធ្វើឲ្យ​មានមិត្តភាពនៃ​ប្រទេសយើង​ទាំងពីរ ជាព្រះបិតានៃការផ្សះផ្សារជាតិ​នៃ​កម្ពុជា ព្រះអង្គបានធ្វើឲ្យកម្ពុជា មានសន្តិភាព និងស្ថិរភាពរហូតមក​ទល់​សព្វ​ថ្ងៃនេះ។

នៅក្នុង​កិច្ច​ជំនួប​ទ្វេ​ភាគី​នោះដែរ លោក Liu Yunshan បាន​ផ្តល់​ការ​លើក​ទឹក​ចិត្ត និង​​កោត​​សរសើរ​ចំពោះ​កិច្ច​សហ​ប្រតិ​បត្តិ​ការ រវាង​គណបក្សប្រជាជន​កម្ពុជា និង​​គណបក្ស​ហ៊្វុនស៊ិនប៉ិច នាពេលកន្លងមកដែលបាន​ដឹក​នាំប្រទេសមានការអភិវឌ្ឍន៍រីកចំរើនជឿនលឿន មានសុខ​សន្តិភាពពេញលេញ និងមានការគោរព​សិទ្ធិ​
មនុស្ស​​ថែមទៀតផង​។ ដូច្នេះហើយ​ប្រទេស​ចិន នៅ​តែ​ចង់​ឃើញ​កិច្ច​សហប្រតិបត្តិ​ការ​​រវាង​គណបក្ស​ទាំង​​ពីរ​បន្ត​នៅ​រក្សា​ដ​ដែល​។

សូម​បញ្ជាក់​ថា​ គណៈប្រតិ​ភូ​ជាន់​ខ្ពស់នៃ​សាធារណរដ្ឋប្រជាមានិត​ចិនដែល​ដឹក​នាំដោយលោក Liu Yunshan បានមកដល់ព្រះរាជាណាចក្រកម្ពុជា នាពេលរសៀលថ្ងៃទី១១ កញ្ញា ហើយ​ក្នុង​រយៈពេលដំណើរទស្សនកិច្ច​ជាផ្លូវរបស់លោកចំនួនពីរថ្ងៃគឺថ្ងៃទី១១ដល់ថ្ងៃទី១២នេះ លោក​បានដឹកនាំគណៈប្រតិភូជាន់ខ្ពស់ ចូលក្រាប​បង្គំគាល់ ព្រះមហាក្សត្រ ព្រះបាទ នរោត្តម សីហមុនី នៅព្រះបរមរាជវាំង បានជួបពិភាក្សាការងារ​ជាមួយ​សម្តេចតេជោ ហ៊ុន សែន នាយ​ករដ្ឋមន្រ្តី នៃ​ព្រះរាជាណាចក្រ​កម្ពុជា និង​សម្តេច ហេង សំរិន ប្រធាន​រដ្ឋ​ស​ភា​និង​ជា​ប្រធាន​កិត្តិយស​គណបក្ស​ប្រជាជន​កម្ពុជា​ផង​ដែរ​។

ជាមួយគ្នានេះគោលបំណងដ៏សំខាន់នៃដំណើរទស្សនកិច្ចនៅកម្ពុជានេះ គឺជាការបញ្ជាក់ជាថ្មី​អំពី​ទំនាក់ទំនង​ការទូត និងកិច្ចសហប្រតិបត្តិការដ៏យូអង្វែងជាមួយគណបក្សប្រជាជនកម្ពុជា ​និងគណ​បក្សហ៊្វុនស៊ិនប៉ិច ព្រម​ទាំងជំរុញដល់ស្ថានភាពនយោបាយរបស់កម្ពុជា​ឲ្យមានការ​ចរចាគ្នាដោយសន្តិវិធី ប្រយោជន៍ដើម្បីសន្តិភាព​សេចក្តីសុខរបស់ប្រជាពលរដ្ឋកម្ពុជា៕ ដោយ ៖ ស.ស្អាត