បាត់ដំបងៈឪពុកចុងចិត្តអប្រិយលួងលោមកូនស្រីដើមអាយុ៨ឆ្នាំរំលោភមិនទាន់បានសម្រេច លុះដល់អាយុ ១០ ឆ្នាំ ចាប់ផ្តើមរំលោភនាងបានសម្រេចរហូតដល់ឆ្នាំ២០១៣នេះ ពេលនាងទ្រាំលែងបានទើបប្តឹងសមត្ថកិច្ចឲ្យចាប់ខ្លួនថ្ងៃទី ២៨ ខែមិថុនា ឆ្នាំ២០១៣ នាំយកមកសួរនាំ រួចកសាងសំណុំរឿងបញ្ជូនមកស្នងការខេត្ត ដើម្បី បញ្ជូនបន្ត ទៅតុលាការខេត្ត ព្រឹកថ្ងៃទី២៩ខែមិថុនា ឆ្នាំ២០១៣ ដើម្បីចាត់ការតាមច្បាប់ ។
តាមរបាយការណ៍ អធិការនគរបាល ស្រុកបាណន់ បានឲ្យដឹងថាជនសង្ស័យដែលសមត្ថកិច្ច ចាប់ខ្លួនមាន ឈ្មោះ ស៊ត ស ភេទប្រុស អាយុ ៥៣ ឆ្នាំ(ជាឪពុកចុង)មុខរបរ ធ្វើស្រែ មានទីលំនៅ ភូមិកំពង់គល់ ឃុំចែងមានជ័យស្រុកបាណន់ ។ ចំណែកនារីរងគ្រោះ មានអាយុ ១៨ ឆ្នាំ រស់នៅផ្ទះជាមួយគ្នាខាងលើ ។
ចម្លើយរបស់ជនរងគ្រោះ នៅក្នុងរបាយការណ៍សមត្ថកិច្ចបានឲ្យដឹងថាកាលពីនាងនៅមានអាយុ ៨ឆ្នាំ ពេលដែលម្តាយមិននៅផ្ទះ ឪពុកចុងតែងតែមកស្ទាបអង្អែលឱបថើប តែមិនទាន់បានរំលោភទេ លុះដល់នាងបានអាយុ ១០ ឆ្នាំទើបគាត់ចាប់រំលោភនាង ជាញឹកញាប់ ពេលខ្លះនៅក្នុងផ្ទះពេលខ្លះនៅក្រៅផ្ទះពេលគាត់រំលោភម្តងៗ គាត់បានបញ្ចេញទឹកកាមរបស់គាត់ ចេញមកក្រៅដាក់លើខ្លួននាងគ្រប់ពេល ហើយបានគម្រាមនាងមិនឲ្យប្រាប់ម្តាយ និងបងប្អូនឬអ្នកដទៃឡើយបើពុំដូច្នេះទេ គាត់នឹងសម្លាប់ចោល ។ លុះដល់ឆ្នាំ២០១៣ ប្រហែល២ខែចុងក្រោយនេះ នាងក៏បានប្រាប់បងប្រុសនាង ហើយដំណឹងនេះក៏បានដឹងដល់ម្តាយមីង និងសាច់ញាតិ ស្រាប់តែបែកធ្លាយរឿងនេះតែម្តង ។
ក្រោយមកនាងក៏បានសម្រេចចិត្តដាក់ពាក្យបណ្តឹងទៅសមត្ថកិច្ចនគរបាលប៉ុស្តិ៍ឃុំចែងមានជ័យ នៅថ្ងៃទី២៧ ខែមិថុនា ឆ្នាំ២០១៣តែម្តង។
នៅពេលទទួលពាក្យបណ្តឹងហើយ អធិការស្រុកបាណន់បានបញ្ជាឲ្យមន្រ្តីជំនាញ ចុះធ្វើការឃាត់ ខ្លួនជនសង្ស័យ នៅថ្ងៃទី២៨ ខែមិថុនានេះ នាំយកមកសួរនាំ រួចកសាងសំណុំរឿង បញ្ជូនខ្លួនជនសង្ស័យទៅស្នងការនគរបាលខេត្ត ដើម្បីចាត់ការបន្ត ។ ជនសង្ស័យបានឆ្លើយសារភាពថាខ្លួនពិតជាបានប្រព្រឹត្ត ចាប់រំលោភកូនស្រីដើមខ្លួនឯងជិត១០ឆ្នាំពិតប្រាកដមែន។
ក្រោយពីសមត្ថកិច្ច នគរបាលស្រុកបាណន់ បានបញ្ជូនខ្លួនជនសង្ស័យមកស្នងការខេត្តហើយ ការិយាល័យព្រហ្ម ទណ្ឌកម្រិតធ្ងន់ លោក សេង លុចបានបញ្ជាក់ថា យោងតាមពាក្យបណ្តឹងរបស់ជនរងគ្រោះ និងចម្លើយសារភាព របស់ជនសង្ស័យស្នងការនគរបាលខេត្ត លោក ស ថេត បានបញ្ជាឲ្យការិយាល័យេជំនាញ រៀបចំសំណុំរឿងបញ្ជូនខ្លួនជនសង្ស័យ ទៅតុលាការខេត្ត នៅព្រឹកថ្ងៃទី២៩ ខែមិថុនានេះដើម្បីចាត់ការតាមនិតិវិធីច្បាប់ ៕
ដោយ៖ ស.ស្អាត